Page Text
________________
जुयल-परिघनिभबाहू चम्मेट्ठग-दुहण-मुट्ठिय-समाहत - निचित-गत्तकाए उरस्सबलसमन्नागए लंघण पवणजइण-वायामसमत्थे छेए दक्खे पत्तट्ठे कुसले मेहावी निउणे निउणसिप्पोवगए एगं महतिं पडसाडियं वा पट्टसाडियं वा गहाय वा गहाय सयराहं हत्थमेत्तं ओसारेज्जा, तत्थ चोयए पन्नवयं एवं वयासी जेणं कालेणं तेणं तुण्णागदारएणं तीसे पडसाडियाए वा पट्टसाडियाए वा सयराहं हत्थमेत्तं ओसारिए से सम भवइ ? नो इणट्ठे समट्ठे, कम्हा ?, जम्हा संखेज्जाणं तंतूणं समुदय समिति-समागमेणं एगा पडसाडिया निप्फज्जइ उवरिल्लंमि तंतुंमि अच्छिन्ने हेट्ठिल्ले तंतू न छिज्जइ, अन्नंमि काले उवरिल्ले तंतू छिज्जइ, अन्नंमि काले हिट्ठिल्ले तंतू छिज्जइ, तम्हा से समए न भवइ, एवं वयंतं पन्नवयं चोयए एवं वयासी:- । जेणं कालेणं तेणं तुण्णागदारएणं तीसे पडसाडियाए वा पट्टसाडियाए वा उवरिल्ले तंतू छिन्ने से समए भवइ ?, न भवइ । कम्हा ? जम्हा संखेज्जाणं पम्हाणं समुदय समिति-समागमेणं तंतू निप्फज्जइ, उवरिल्ले पम्हे अच्छिन्ने हेट्ठिल्ले पम्हे न छिज्जइ अन्नंमि काले उवरिल्ले पन्हे छिज्जइ अन्नंमि काले हेट्ठिल्ले पम्हे छिज्जइ, तम्हा से समए न भवइ, एवं वयंतं पन्नवयं चोयए एवं वयासी जेणं कालेणं तेणं तुण्णागदारएणं तस्स तंतुस्स उवरिल्ले पम्हे छिन्ने से समए भवइ ?, न भवइ, कम्हा ? जम्हा अनंताणं संघायाणं समुदय समिति-समागमेणं एगे पम्हे निप्फज्जइ, उवरिल्ले संघाए अविसंघाइए हेट्ठिल्ले संघाए न विसंघाइज्जइ, अन्नंमि काले उवरिल्ले संघाए विसंघाइज्जइ अन्नंमि काले हेट्ठिल्ले संघाए विसंघाइज्जइ, तम्हा से समए न भवइ, एत्तो वि य णं सुहुतराए समए पन्नत्ते समणाउसो असंखेज्जाणं समयाणं समुदय समिति -समागमेणं सा एगा आवलिया त्ति वुच्चइ, संखेज्जाओ आवलियाओ ऊसासो, संखेज्जाओ आवलियाओ नीसासो ।
[२७६]
हट्ठस्स अणवगल्लस्स, निरुवक्किट्ठस्स जंतुणो । एगे ऊसास-नीसासे एस पाणु त्ति वुच्चइ || [२७७] सत्त पाणूणि से थोवे सत्त थोवाणि सेलवे । लवाणं सत्तहत्तरिए एस मुहुत्ते वियाहिए ।।
[२७८] तिन्नि सहस्सा सत्त य सयाई तेहत्तरि य ऊसासा ।
एस मुहुत्तो भणियो सव्वेहिं अनंतनाणीहिं ।
[२७९] एएणं मुहुत्तपमाणेणं तीसं मुहुत्ता अहोरत्तं, पन्नरस्स अहोरत्ता पक्खो, दो पक्खा मासो, दो मासा उऊ, तिन्नि उऊ अयण, दो अयणाई संवच्छरे, पंच संवच्छराई जुगे, वीसं जुगाई वाससयं,
सुत्तं-२७९
दसवाससयाइं वाससहस्सं, सयं वाससहस्साणं वाससयसहस्सं, चउरासीइं वाससयसहस्साइं से एगे पुव्वंगे, चउरासीइं पुव्वंगसयसहस्साइं स एगेपुव्वे, चउरासीइं पुव्वसयसहस्साइं स एगे तुडियंगे, चउरासीइं तुडियंगसय-सहस्साइं से एगे तुडिए, चउरासीइं तुडियसयसहस्साइं से एगे अडडंगे, चउरासीइं अडडंगसयसहस्साइं से एगे अड्डे, एवं अववंगे अववे हुहुयंगे हुहुए उप्पलंगे उप्पले पउमंगे पउमे नलिनंगे नलिने अत्थनिउरंगे अत्थनिउरे अउयंगे अउए नउयंगे नउए पउयंगे पउए चूलियंगे चूलिया सीसपहेलियंगे चउरासीइं सीसपहेलियंग-सयसहस्साइं सा एगा, सीसपहेलिया एतावता चेव गणिए एतावए चेवे गणियस्स विसए अतो परं ओवमिए पवत्तइ ।
[दीपरत्नसागर संशोधितः ]
[41]
I
[४५-अनुओगदाराई]
| SR No. | 003789 |
| Book Title | Agam 45 Anuogdaraim Beiya Chuliya Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 68 |
| Language | Prakrit |
| Classification | Book_Devnagari, Agam, Canon, Agam 45, & agam_anuyogdwar |
| File Size | 2 MB |