________________
गाहा-१०१
[१०१] जं अन्नाणी कम्म खवेइ बहआहिं वासकोडीहिं ।
तं नाणी तिहिं गुत्तो खवेइ ऊसासमित्तेणं ।। [१०२] न हु मरणंमि उवग्गे सक्को बारसविहो सुयक्खंधो ।
सव्वो अनुचिंते धणियंपि समत्थचित्तेणं ।। [१०३] एक्कंमि वि जंमि पए संवेगं कुणइ वीयरायमए ।
सो तेन मोहजालं छिंदइ अज्झप्पओगेणं ।। [१०४] एक्कंमि वि जंमि पए संवेगं कुणइ वीयरायमए ।
तं तस्स होइ नाणं जेण विरागत्तणमुवेइ ।। [१०५] एक्कंमि वि जंमि पए संवेगं कुणइ वीयरायमए ।
वच्चइ नरो अभिक्खं तं मरणं तेण मरियव्वं ।। [१०६] जेण विरागो जायइ तं तं सव्वायरेण कायव्वं ।
मुच्चइ ह संवेगी अनंतओ होइ संवेगी ।। [१०७] धम्म जिनपन्नतं सम्ममिणं सद्दहामि तिविहेणं ।
तस थावर भूयहियं पंथं निव्वाण नगरस्स ।। [१०८] समणो मित्ति य पढमं बीयं सव्वत्थ संजओ मि ति ।
सव्वं च वोसिरामि जिनेहिं जं जं च पडिकुठं ।। [१०९] उवही सरीरगं चेव, आहारं च चव्विहं ।।
मनसा वय काएणं, वोसिरामि ति भावओ ।। [११०] मनसा अचिंतणिज्जं सव्वं भासाइ अभासणिज्जं च ।
काएण अकरणिज्जं सव्वं तिविहेण वोसिरे [१११] अस्संजमत्तोगसणं उवही विवेगकरणं उवसमो य ।
___ अप्पडिरूवजोगविरओ खंती मुत्ती विवेगो य ।। [११२] एयं पच्चक्खाणं आठरजन आवईसु भावेण ।
___ अन्नयरं पडिवण्णो जंपतो पावइ समाहिं ।। [११३] एयंसि निमित्तंमी पच्चक्खाऊण जइ करे कालं ।
तो पच्चखाइयव्वं इमेण इक्केण वि पएणं ।। [११४] मम मंगलमरिहंता सिद्धा साहू सुयं च धम्मो य ।
तेसिं सरणोवगओ सावज्जं वोसिरामि ति ।। [११५] अरहंता मंगलं मज्झ, अरहंता मज्झ देवया ।
अरहंते कित्तइताणं, वोसिरामि त्ति पावगं ।। [११६] सिद्धा य मंगलं मज्झ, सिद्धा य मज्झ देवया ।
सिद्धे य कित्तइत्ताणं वोसिरामि ति पावगं ।। [११७] आयरिया मंगलं मज्झ आयरिया मज्झ देवया ।
आयरिए कित्तइत्ताणं वोसिरामि ति पावगं ।।
दीपरत्नसागर-संशोधितः
[8]
[२६|महापच्चक्खाण
