Page Text
________________
संखिज्जाइं जोयणाइं दंड निसिरंति तं जहा- रयणाणं जाव संवगवाए विउव्वंति विउव्वित्ता तेणं सिवेणं मउएणं मारुएणं अनुद्धएणं भूमितलविमलकरणेणं मणहरेणं सव्वोउयसुरभिकुसुमगंधाणुवासिएणं पिंडिमनीहारिमेणं गंधद्ध-रेणं तिरियं पवाइएणं भगवओ तित्थयरस्स जम्मणभवणस्स सव्वओ समंता जोयणपरिमंडलं से जहानामए-कम्मगरदारए सिया जाव तहेवजं तत्थ तणं वा पत्तं वा कटुं वा कयवरं वा असुइमचोक्खं पूइयं दुब्भिगंधं तं सव्वं आहुणिय-आहुणिय एगंते एडेंति एडेत्ता जेणेव भगवं तित्थयरे तित्थयरमाया य तेणेव उवागच्छंति उवागच्छित्ता भगवओ तित्थयरस्स तित्थयरमायाए य अदूरसामंते आगाय-माणीओ परिगाय-माणीओ चिट्ठति ।
[२१५] तेणं कालेणं तेणं समएणं उड्ढलोगवत्थव्वाओ अट्ट दिसाकुमारीमहत्तरियाओ सएहिंसएहिं कूडेहिं सएहिं-सएहिं भवणेहिं सएहि-सएहिं पासायव.सएहिं पत्तेयं-पत्तेयं चउहिं सामाणियसाहस्सीहिं एवं तं चेव पुव्ववण्णियं जाव विहरंति [तं जहा]- |
[२१६] मेहंकरा मेहवई सुमेहा मेहमालिणी ।
सुवच्छा वच्छमित्ता य वारिसेणा बलाहगा । [२१७] तए णं तासि उड्ढलोगवत्थव्वाणं अट्ठण्हं दिसाकुमारीमहत्तरियाणं पत्तेयं-पत्तेयं आसणाई चलंति एवं तंचेव पुव्ववण्णियं भाणियव्वं जाव अम्हे णं देवाणुप्पिए उड्ढलोगवत्थव्वओ अट्ठ दिसाकुमारीमहत्तरियाओ भगवओ तित्थगरस्स जम्मणमहिमं करिस्सामो तुब्भाहिं न भाइयव्वंतिकट्ट उत्तरपुरत्थिमं दिसीभागं अवक्कमंति अवक्कमित्ता जाव अब्भवद्दलए विउव्वंति विउव्वित्ता जाव तं निहयरयं नहरयं भट्ठरयं पसंतरयं उवसंतरयं करेंति करेत्ता खिप्पामेव पच्चुवसंमंति पच्चुवसमित्ता तच्चपि वेउव्वियसमुग्धाएणं समोहण्णंति समोहणित्ता पुप्फवद्दलए विउव्वंति से जहाणामए-मालागारदारए सिया तरुणे जाव निउसिप्पो व गए एगं महं पुप्फछज्जियं वा पुप्फपडलगं वा पुप्फचंगेरियं वा गहाय रायंगणं वा रायंतउरं वा आरामं वा उज्जाणं वा देवउलं वा सभं वा पवं वा अतुरियमचवलसंभंतं निरंतरं सुनिउणं सव्वतो समंता कयग्गहगिहयकरयलपब्भट्ट-विप्पमुक्केणं दसद्धवण्णेणं कुसुमेणं मुक्कपुप्फपुंजोवयारकलियं करेज्जा एवामेव ताओ दिसाकुमारीमहत्तरियाओ पुप्फवद्दलए विउव्वंति विउव्वित्ता खिप्पामेव पतणतणायंति पतण-तणाइत्ता खिप्पामेव विज्जुयायंति विज्जुयाइत्ता भगवओ तित्थयरस्स जम्मणभवणस्स सव्वओ समंता जोयणपरिमंडलं जलयथलयभासुरप्पभूयस्स बेंटट्ठाइस्स दसद्धवण्णकुसुमस्स जण्णुस्सेहप-माणमेत्तिं ओहिं वासं वासंति वासित्ता कालागरु-पवरकुंदुरुक्क-तुरुक्कधूव-मघमघेतगंधुदुयाभिरामं सुगंधवरगंधगंधियं गंधवट्टिभूत्तं दिव्वं सुरवराभिगमणजोग्गं करेंति करेत्ता जेणेव भयवं तित्थ-यरे तित्थयरमाया य तेणेव उवागच्छंति जाव आगायमाणीओ परिगायमाणीओ चिट्ठति
वक्खारो-५
[२१८] तेणं कालेणं तेणं समएणं पुरत्थिमरुयगवत्थव्वाओ अट्ठ दिसाकुमारीमहत्तरियाओ सएहिं-सएहिं कडेहिं तहेव जाव विहरंति [तं जहा]- |
[२१९] नंदुत्तरा य नंदा आणंदा नंदिवद्धणा ।
विजया य वेजयंति जयंति अपराजिया ।
दीपरत्नसागर संशोधितः]
[87]
[१८-जंबूद्दीवपन्नत्ति]
| SR No. | 003735 |
| Book Title | Agam 18 Jambudivpannatti Sattam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 122 |
| Language | Prakrit |
| Classification | Book_Devnagari, Agam, Canon, Agam 18, & agam_jambudwipapragnapti |
| File Size | 2 MB |