Page Text
________________
दिव्वेणंगंधेणं जाव दिव्वाए लेसाए दस दिसाओ उज्जोवेमाणा पभासेमाणा ते णं तत्थ साणं-साणं भवणावाससतसहस्साणं साणं-साणं सामाणियसाहस्सीणं साणं-साणं तावत्तीसाणं साणं-साणं लोगपालाणं साणं-साणं अग्गमहिसीणं साणं-साणं परिसाणं साणं-साणं अणियाणं साणं-साणं अणियाधिवतीणं साणं-साणं आयरक्खदेवसाहस्सीणं अण्णेसिं च बहूणं भवणवासीणं देवाण य देवीण य आहेवच्चं पोरेवच्चं जाव विहरंति चमर-बलिणो इत्थ दुवे असुरकुमारिंदा असुरकुमाररायाणो परिवसंति-काला महानीलसरिसा नीलगुलिय-गवल-अयसिकुसुमप्पगासा वियसियसयवत्तनिम्मलईसीसित-रत्त-तंबणयणा गरुलाययउज्जुतुंगणासा ओयवियसिलप्पवाल-बिंबफलसन्निभाहरोहा पंडरससिसगलविमल-निम्मलदहिघण-संख-गोखीर-कुंददगरय-मुणालियधवलदंतसेढी हुयवहनिदंतधोयत-त्ततवणिज्जरत्ततल-तालु-जीहा अंजण-घण कसिणरुयगरमणिज्जणिद्धकेसा वामेयकुंडलधरा अद्दचंदणाणुलित्तगत्ताईसीसिलिंधपुप्फपगासाइं असंकिलिट्ठाई सुहुमाइं वत्थाई पवर परिहिया वयं च पढम समइक्कंता बिइयं तु असंपत्ता भद्दे जोव्वणे वट्टमाणातलभंगय-तुडित-पवरभूसण-निम्मलमणि-रयणमंडितभुया दसमुद्दामंडितग्गहत्था चूडामणिचित्तचिंधगता सुरूवा महिढिया जाव असुरकुमारे एवं चेव दिव्वाइं भोगभोगाइं भुंजमाणा विहरंति ।
कहि णं भंते दाहिणिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता कहि णं भंते दाहिणिल्ला असुरकुमारा देवा परिवसंति गोयमा जंबुद्दीवे दीवे मंदरस्स पव्वतस्स दाहिणेणं इमीसे रयणप्पभाए पुढवीए असीउत्तरजोयणसतसहस्सबाहल्लाए उवरिं एगं जोयणसहस्सं ओगाहित्ता हेट्ठा वेगं जोयणसहस्सं वज्जित्ता मज्झे अट्ठहत्तरे जोयणसतसहस्से एत्थ णं दाहिणिल्लाणं असुरकुमाराणं देवाणं चोत्तीसं भवणावाससतसहस्सा भवंतीति मक्खातं ते णं भवणा बाहिं वट्टा अंतो चउरंसा सो च्चेव वण्णओ जाव पडिरूवा एत्थ णं दाहिणिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता तिसु वि लोगस्स असंखेज्जइभागे तत्थ णं बहवे दाहिणिल्ला असुरकुमारा देवा य देवीओ य परिवसंति-काला लोहियक्खबिंबोट्ठा तहेव जाव भुंजमाणा विहरंति एतेसि णं तहेव तावत्तीसगलोगपाला भवंति एवं सव्वत्थ भाणितव्वं भवणवासीणं चमरे अत्थ असुरकुमारिंदे असुरकुमारराया परिवसति-काले महानीलसरिसे जाव पभासेमाणे से णं तत्थ चोत्तीसाए भवणावाससतसहस्साणं चउसट्ठीए सामाणियसाहस्सीणं तायत्तीसाए तावत्तीसाणं चउण्हं लोगपालाणं पंचण्हं अग्गमहिसीणं सपरिवाराणं तिण्हं परिसाणं सत्तण्हं अणियाणं सत्तण्हं अणियाधिवतीणं चउण्हं य चउसट्ठीणं आयररक्खदेवसाहस्सीणं अण्णेसिं च बहूणं दाहिणिल्लाणं देवाणं देवीण य आहेवच्चं पोरेवच्चं जाव विहरति कहि णं भंते उत्तरिल्लाणं असुरकुमाराणं देवाणं पज्जत्तापज्जत्ताणं ठाणा पन्नत्ता कहि णं भंते उत्तरिल्ला असुरकुमारा देवा परिवसंति गोयमा जंबद्दीवे दीवे मंदरस्स पव्वयस्स उत्तरेणं इमीसे रयणप्पभाए पुढवीए असीउत्तरजोयणसयसहस्सबाहल्लाए उवरिं एगं जोयणसहस्सं ओगाहेत्ता हेढा वेगं जोयणसहस्सं वज्जेत्ता मज्झे अट्ठहत्तरे जोयणसतसहस्से एत्थ णं उत्तरिल्लाणं असुरक्माराणं देवाणं तीसं भवणावाससतसहस्सा भवंतीति मक्खातं ते णं भवणा बाहिं वट्टा पद-२
अंतो चउरंसा सेसं जहा दाहिणिल्लाणं जाव विहरंति, बलि यत्थ वइरोयणिंदे वइरोयणराया परिवसति-काले महानीलसरिसे जाव पभासेमाणे से णं तत्थ तीसाए भवणावाससयसहस्साणं सट्ठीए सामाणियसाहस्सीणं तायत्तीसाए तावत्तीसगाणं चउण्हं लोगपालाणं जाव चउण्हं य सट्ठीणं आयरक्खदेवसाहस्सीणं अण्णेसिं च बहूणं उत्तरिल्लाणं असुरकुमाराणं देवाण य देवीण य आहेवच्चं पोरवच्चं कुव्वमाणे विहरति ।
दीपरत्नसागर संशोधितः]
[30]
[१५-पन्नवणा]]
| SR No. | 003729 |
| Book Title | Agam 15 Pannavana Chauttham Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 202 |
| Language | Prakrit |
| Classification | Book_Devnagari, Agam, Canon, Agam 15, & agam_pragyapana |
| File Size | 3 MB |