Page Text
________________
संखेज्जा जोतिसियविमाणावासससहस्सा भवंतितिमक्खायं ते णं विमाणं अद्धकविट्ठकसंठा-णसंठिया एवं जहा- ठाणपदे जाव चंदिम-सूरिया य एत्थ णं जोतिसिंदा जोतिसरायाणो परिवति महिढिया जाव विहरंति चंदस्स णं भंते जोतिसिंदस्स जोतिसरण्णो कति परिसाओ पन्नत्ताओ गोयमा तिण्णि परिसाओ पन्नत्ताओ तं जहा- तुंबा तुडिया पव्वा अभिंतरिया तुंबा मज्झिमिया तुडिया बाहिरिया पव्वा सेसं जहाकालस्स परिमाणं ठिती अट्ठो जहा- चमरस्स एवं सूरस्स वि |
० तच्चाए पडिवत्तीए देवाधिकारो समत्तो .
। दीवसमुद्दवत्तव्वयाधिकारो [] [१६१] कहि णं भंते दीवसमुद्दा केवइया णं भंते दीवसमुद्दा केमहालया णं भंते दीवसमुद्दा किंसंठिया णं भंते दीवसमुद्दा किमाकारभावपडोयारा णं भंते दीवसमुद्दा पन्नत्ता गोयमा जंबुद्दीवाइया दीवा लवणादीया समुद्दा संठाणओ एकविधिविधाणा वित्थरतो अणेगविधिविधाणा दुगुणादुगुणे पडुप्पाएमाणापडुप्पाएमाणा पवित्थरमाणा-पवित्थरमाणा ओभासमाणवीचिया बहुउप्पल-पउम-कुमुद-नलिण-सुभग सोहंधिय-पंडरीय-महापोंडरीय-सतपत्त-सहस्सपत्त-पप्फुल्लकेस-रोवचित्ता पत्तेयं-पत्तेयं परमवरवेइयापरिक्खित्ता पत्तेयं-पत्तेयं वनसंडपरिक्खित्ता सयंभुरमण-पज्जवसाणा अस्सिं तिरियलोए असंखेज्जा दीवसमुद्दा पन्नत्ता समणाउसो ।
[१६२] तत्थ णं अयं जंबुद्दीवे नाम दीवे सव्वदीवसमुदाणं सव्वब्भंतरए सव्वखुड्डाए वट्टे तेल्लापूयसंठाणसंठिते वट्टे रहचक्कवालसंठाणसंठिते वट्टे पुक्खरकण्णियासंठाणसंठिते वट्टे पडिपन्नचंदसंठाणसंठिते एककं जोयणसयसहस्सं आयाम-विक्खंभेणं तिण्णि जोयणसयसहस्साइं सोलस य सहस्साइं दोण्णि य सत्तावीसे जोयणसते तिण्णि य कोसे अट्ठावीसं च धणुसयं तेरसं अंगुलाई अद्धंगुलकं च किंचिपडिवत्ति-३
विसाहियं परिक्खवेणं पन्नत्ते से णं एक्काए जगतीए सव्वतो समंता संपरिक्खित्ते सा णं जगती अट्ठ जोयणाई उड्ढं उच्चत्तेणं मूले बारस जोयणाइं विक्खंभेणं मज्झे अट्ठ जोयणाइं विक्खंभेणं उप्पिं चत्तारि जोयणिं विक्खंभेणं मूले विच्छिण्णा मज्झे संखित्ता उप्पिं तणुया गोपुच्छसंठाणसंठिता सव्ववइरामई अच्छा सण्हा जाव अभिरूवा पडिरूवा सा णं जगती एक्केणं जालकडएणं सव्वतो समंता संपरिक्खित्ता से णं जालकडए अद्धजोयणं उड्ढं उच्चत्तेणं पंचधणुसयाई विक्खंभेणं सव्वरयणामए अच्छे सण्हे जाव पडिरूवे
[१६३] तीसे णं जगतीए उप्पिं बहुमज्झदेसभाए एत्थ णं महई एगा पउमवरवेदिया पन्नत्ता सा णं पउमवरवेदिया अद्धजोयणं उड्ढं उच्चत्तेणं पंच धणुसयाई विक्खंभेणं जगतीसमिया परिक्खवेणं सव्वरयणामई अच्छा जाव पडिरूवा तीसे णं पउमवरवेइयाए अयमेयारूवे वण्णावासे पन्नत्ते तं जहावइरामया नेमा रिट्ठामया पइट्ठाणा वेरुलियामया खंभा सुवण्णारुप्पामया फलगा लोहितक्खमईओ सूईओ वइरामया संधी नानामणिमया कलेवरा नानामणिमया कलेवरसंघाडा नानामणिमया रूवा नानामणिमया रूवसंघाडा अंकामया पक्खा पक्खबाहाओ जोतिरसामया वसा वंसकवेल्लया रययामईओ पट्टियाओ जातरूवमईओ ओहाडणीओ वइरामईओ उवरिपुंछणीओ सव्वसेयरययामए छादणे सा णं परमवरवेइया एगमेगेणं हेमजालेणं एगमेगेणं गवक्खजालेणं एगमेगेणं खिंखिणिजालेणं एगमेगेणं घंटाजालेणं एगमेगेणं मत्ताजालेणं एगेमेगेणं मणिजालेणं एगमेगेणं कणगजालेणं एगमेगेणं रयणजालेणं एगमेगणं पउमजालेणं
[दीपरत्नसागर संशोधितः]
[53]
[१४-जीवाजीवाभिगम]
| SR No. | 003727 |
| Book Title | Agam 14 Jivajivabhigam Taiam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 152 |
| Language | Prakrit |
| Classification | Book_Devnagari, Agam, Canon, Agam 14, & agam_jivajivabhigam |
| File Size | 3 MB |