Page Text
________________
पडिवत्ति- ३
साहणेज्जा से णं तं उसिणं उसिणभूतं अयोमएणं संडासएणं गहाय असब्भावपट्ठवणाए सीयवेदणिज्जेसु नरएसु पक्खिवेज्जा से तं उम्मिसियनिमिसियंतरेणं पुनरवि पच्चुद्धरिस्सामीति कट्टु पविरायमेव पासेज्जा जाव नो चेव णं संचाएज्जा पुनरवि पच्चुद्धरित्तए से जहानामए मत्तमायंगे जाव सायासोक्खबहुले यावि विहरेज्जा एवामेव गोयमा असब्भावपट्टवणाए सीतवेदणेहिंतो नरएहिंतो नेरइए उव्वट्टिए समाणे जाई इमाइं इहं माणुस्सलोए हवंति तं जहा - हिमाणि वा हिमपुंजाणि वा हिमपडलाणि वा हिमकूडाणि वा सीयाणि वा सीयपुंजाणि वा सीयपडलाणि वा सीयकूडाणि वा तुसाराणि वा तुसारपुंजाणि वा तुसारपडलाणि वा तुसारकूडाणि वा ताइं पासति पासित्ता ताई ओगाहति ओगाहित्ता से णं तत्थ सीतंपि पविणेज्जा तहंपि पविणेज्जा खुहंपि पविणेज्जा जरंपि पविणेज्जा दाहंपि पविणेज्जा निद्दाएज्ज वा पयलाएज्जा वाजव उसिणे उसिणभूए संकसमाणे संकसमाणे सायासोक्खबहुले यावि विहरेज्जा गोयमा सीयवेयणिज्जेसु नरएसु नेरइया एत्तो अणिट्ठतरियं चेव सीतवेदणं पच्चणुभवमाणा विहरंति ।
[१०६] इमीसे णं भंते रयणप्पभाए पुढवीए नेरइयाणं केवतियं कालं ठिती पन्नत्ता गोयमा जहण्णेणवि उक्कोसेणवि ठिती भाणितव्वा जाव अधेसत्तमा ।
[१०७] इमीसे णं भंते रयणप्पभाए पुढवीए नेरइया अनंतरं उव्वट्टियं कहिंगच्छंति कहितं उववज्जंति-किं नेरइयसु उववज्जंति किं तिरिक्खजोणिएसु उववज्जंति एवं उव्वट्टणा भाणितव्वा जहावक्कंतीए तहा इहवि जाव अहेसत्तमा ।
[१०८] इमीसे णं भंते रयणप्पभाए पुढवीए नेरइया केरिसयं पुढविफासं पच्चणुभवमाणा विहरंति गोयमा अणिट्टं जाव अमणामं एवं जाव अहेसत्तमाए इमीसे णं भंते रयणप्पभाए पुढवीए नेरइया केरिसयं आउफासं पच्चणुभवमाणा विहरंति गोयमा अणिट्ठे जाव अमणामं एवं जाव अहेसत्तमाए एवं जाव वणप्फतिफासं अधेसत्तमाए पुढवीए, इमा णं भंते रयणप्पभापुढवी दोच्चं पुढविं पणिहाय सव्वमहंतियाबाहल्लेणं सव्वक्खुड्ड्डिया सव्वंतेसु हंते गोयमा इमा णं रयणप्पभापुढवी दोच्चं पुढविं पणिहाय व सव्वक्खुड्डिया सव्वंतेसु हंता गोयमा इमा णं रयणप्पभापुढवी दोच्चं पुढविं पणिहाय जाव सव्वक्खुड्डिया सव्वंतेसु दोच्चा णं भंते पुढवी तच्चं पुढविं पणिहाय सव्वमहंतिया बाहल्लेणं पुच्छा हंता गोयमा दोच्चा णं पुढवी जाव सव्वक्खुड्ड्डिया सव्वंतेसु एवं एएणं अभिलावेणं जाव छट्ठिया पुढवी अहेसत्तमं पुढविं पणिहाय सव्वक्खुडुड्डिया सव्वंतेसु ।
[१०९] [इमीसे णं भंते रयणप्पभाए पुढवीए निरयपरिसामंतेसु जे पुढविक्काइया जाव वणप्फतिकाइया ते णं भंते जीवा महाकम्मतरा चेव महाकिरियतरा चेव महाआसवतरा चेव महावेयणतरा चेव हंता गोयमा इमीसे णं रयणप्पभाए पुढवीए निरयपरिसामंतेसु तं चेव जाव महावेदणतरा चेव एवं जाव अधेसत्तमा] |
[११०] इमीसे णं भंते रयणप्पभाए पुढवीए तीसाए नरयावाससयसहस्सेसु इक्कमिक्कंसि निरयावासंसि सव्वेपाणा सव्वेभूया सव्वेजीवा सव्वेसत्ता पुढवीकाइयत्ताए जाव वणस्सइ-काइयत्ता नेरइयत्ताए उववन्नपुव्वा हंता गोयमा असतिं अदुवा अनंतखुत्तो एवं जाव अहेसत्तमाए [पुढवीए] । [१११] पुढवीं ओगाहित्ता नरगा संठाणमेव बाहल्लं I विक्खंभपरिक्खेवे वण्णो गंधो य फासो य [११२] तेसिं महालयत्तं उवमा देवेण होइ कायव्वा I
||
[दीपरत्नसागर संशोधितः]
[34]
[१४- जीवाजीवाभिगमं ]
| SR No. | 003727 |
| Book Title | Agam 14 Jivajivabhigam Taiam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 152 |
| Language | Prakrit |
| Classification | Book_Devnagari, Agam, Canon, Agam 14, & agam_jivajivabhigam |
| File Size | 3 MB |