Page Text
________________
सतं - ५, वग्गो, सत्तंसत्तं-, उद्देसो-२
अत्थि ।
अत्थि णं भंते! पुरत्थिमेणं ईसिं पुरेवाता, पत्था वाता, मंदा वाता, महावाता वायंति? हंता,
एवं पच्चत्थिमेणं, दाहिणेणं, उत्तरेणं, उत्तर-पुरत्थिमेणं, पुरत्थिमदाहिणेणं, दाहिण-पच्चत्थिमेणं
पच्छिम-उत्तरेणं ।
जदा णं भंते! पुरत्थिमेणं ईसिं पुरेवाता पत्था वाता मंदा वाता महावाता वायंति तदा णं पच्चत्थिमेण वि इसिं पुरेवाता.? जया णं पच्चत्थिमेणं ईसिं पुरेवाता. तदा णं पुरत्थिमेण वि? हंता, गोयमा जदा णं पुरत्थिमेणं तदा णं पच्चत्थिमेण वि ईसिं, जया णं पच्चत्थिमेणं तदा णं पुरत्थिमेण वि ईसिं। एवं दिसासु ।
जाव वायंति।
एवं विदिसासु वि।
अत्थि णं भंते! दीविच्चया ईसिं०? हंता, अत्थि ।
अत्थि णं भंते! सामुद्दया ईसिं०? हंता, अत्थि ।
जया णं भंते! दीविच्चया ईसिं तदा णं सामुद्दया वि ईसिं०, जदा णं सामुद्दया ईसिं तदा० णं दीविच्चया वि ईसिं० ? णो इणट्ठे समट्ठे ।
से केणट्ठेणं भंते! एवं वुच्चति `जदा णं दीविच्चया ईसिं० णो णं तया सामुद्दया ईसिं, जया णं सामुद्दया ईसिं० णो णं तदा दीविच्चया ईसिं० ? गोयमा ! तेसि णं वाताणं अन्नमन्नस्स विवच्चासेणं लवणे समुद्दे वेलं नातिक्कमति से तेणट्ठेणं जाव वाता वायंति।
अत्थि णं भंते! ईसिं० पुरेवाता पत्था वाता मंदा वाता महावाता वायंति ? हंता, अत्थि । कया णं भंते! ईसिं० जाव वायंति? गोयमा ! जया णं वाउयाए अहारियं रियति तदा णं ईसिं
अत्थि णं भंते! ईसिं? हंता, अत्थि ।
कया णं भंते! ईसिं० ? गोतमा ! जया णं वाउयाए उत्तरकिरियं रियइ तया णं ईसिं।
अत्थि णं भंते! ईसिं० ? हंता, अत्थि ।
कया णं भंते ईसिं० पुरेवाता पत्था वाता. ? गोयमा ! जया णं वाउकुमारा वाउकुमारीओ वा अप्पणो वा परस्स वा तदुभयस्स वा अट्ठाए वाउकायं उदीरेंति तया णं ईसिं पुरेवाया जाव वायंति। वाठका णं भंते! वाउकायं चेव आणमति वा पाणमति वा? जहा खंदए तहा चत्तारि आलावगा नेयव्वा-अणेगसतसहस्स. । पुट्ठे उद्दाति वा । ससरीरी निक्खमति।
[२२१] अह भंते! ओदणे कुम्मासे सुरा एते णं किंसरीरा ति वत्तव्वं सिया? गोयमा ! ओदणे कुम्मासे सुराए य जे घणे दव्वे एए णं पुव्वभावपण्णवणं पडुच्च वणस्सतिजीवसरीरा, तओ पच्छा सत्थातीता सत्थपरिणामिता अगणिज्झामिता अगणिज्झसिता अगणिपरिणामिता अगणिजीवसरीरा इ वत्तव्वं सिया। सुराए य जे दवे दव्वे एए णं पुव्वभावपण्णवणं पडुच्च आउजीवसरीरा, ततो पच्छा सत्थातीता जाव अगणिसरीरा ति वत्तव्वं सिया ।
अह णं भंते! अये तंबे तउए सीसए उवले कसट्टिया, एए णं किंसरीरा इ वत्तव्वं सिया? गोयमा ! अए तंबे तउए सीसए उवले कसट्टिया, एए णं पुव्वभावपण्णवणं पडुच्च पुढविजीवसरीरा, तओ पच्छा सत्थातीता जावं अगणिजीवसरीरा ति वत्तव्वं सिया ।
[दीपरत्नसागर संशोधितः]
[83]
[५-भगवई]
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |