________________
सतं-२५, वग्गो- ,सत्तंसत्तं- , उद्देसो-७
अहक्खायसंजए जहा नियंठे।
सामाइयसंजए णं भंते! किं सलेस्से होज्जा, अलेस्से होज्जा? गोयमा! सलेस्से होज्जा, जहा कसायकुसीले।
एवं छेदोवट्ठावणिए वि। परिहारविसुद्धिए जहा पुलाए । सुहुमसंपराए जहा नियंठे । अहक्खाए जहा सिणाए, नवरं जइ सलेस्से होज्जा एमाए सुक्कलेसाए होज्जा।
[९४८]सामाइयसंजए णं भंते! किं वड्ढमाणपरिणामे होज्जा, हायमाणपरिणामे, अवट्ठियपरिणामे? गोयमा! वड्ढमाणपरिणामे, जहा पुलाए।
एवं जाव परिहारविसुद्धिए।
सुहमसंपराय0 पुच्छा। गोयमा! वड्ढमाणपरिणामे वा होज्जा, हायमाणपरिणामे वा होज्जा, नो अवट्ठियपरिणामे होज्जा।
अहक्खाते जहा नियंठे।
सामाइयसंजए णं भंते! केवतियं कालं वड्ढमाणपरिणामे होज्जा? गोयमा! जहन्नेणं एक्कं समयं, जहा पुलाए ।
एवं जाव परिहारविसुद्धिए।
सुहमसंपरागसंजए णं भंते! केवतियं कालं वड्ढमाणपरिणामे होज्जा? गोयमा! जहन्नेणं एक्कं समय, उक्कोसेणं अंतोमुहत्तं।
केवतियं कालं हायमाणपरिणामे? एवं चेव।
अहक्खातसंजए णं भंते! केवतियं कालं वड्ढमाणपरिणामे होज्जा? गोयमा! जहन्नेणं अंतोमुहतं, उक्कोसेण वि अंतोमहत्तं।
केवतियं कालं अवट्ठियपरिणामे होज्जा? गोयमा! जहन्नेणं एक्कं समयं, उक्कोसेणं देसूणा पुव्वकोडी।
[९४९]सामाइयसंजए णं भंते! कति कम्मपगडीओ बंधइ? गोयमा! सत्तविहबंधए वा, अट्ठविहबंधए वा, एवं जहा बसे।
एवं जाव परिहारविसुद्धिए। सुहमसंपरागसंजए0 पुच्छा। गोयमा! आउय-मोहणिज्जवज्जाओ छ कम्मप्पगडीओ बंधइ। अहक्खायसंजए जहा सिणाए । सामाइयसंजए णं भंते! कति कम्मप्पगडीओ वेदेति? गोयमा! नियमं अट्ठ कम्मप्पगडीओ वेदेति। एवं जाव सुहमसंपरागे। अहक्खाए0 पुच्छा।
गोयमा! सत्तविहवेदए वा, चठविहवेदए वा। सत्त वेदेमाणे मोहणिज्ज वज्जाओ सत्त कम्मप्पगडीओ वेदेति। चत्तारि वेदेमाणे वेदणिज्जाऽऽउय-नाम-गोयाओ चत्तारि कम्मप्पगडीओ वेदेति।
[दीपरत्नसागर संशोधितः]
[494]
[५-भगवई
