________________
सतं-२५, वग्गो- ,सत्तंसत्तं- , उद्देसो-५
पोग्गलपरियो णं भंते! किं संखेज्जा समया, असंखेज्जा समया0 पुच्छा। गोयमा! नो संखेज्जा समया, नो असंखेज्जा समया, अणंता समया।
एवं तीतद्ध-अणागयद्ध-सव्वद्धा।
आवलियाओ णं भंते! किं संखेज्जा समया0 पुच्छा। गोयमा! नो संखेज्जा समया, सिय असंखेज्जा समया, सिय अणंता समया।
आणापाणू णं भंते! किं संखेज्जा समया०? एवं चेव। थोवा णं भंते! किं संखेज्जा समया0? एवं चेव। एवं जाव उस्सप्पिणीओ ति।
पोग्गलपरिया णं भंते! किं संखेज्जा समया0 पुच्छा। गोयमा! नो संखेज्जा समया, नो असंखेज्जा समया, अणंता समया।
आणापाणू णं भंते! किं संखेज्जाओ आवलियाओ0 पुच्छा। गोयमा! संखेज्जाओ आवलियाओ, नो असंखेज्जाओ आवलियाओ, नो अणंताओ आवलियाओ।
एवं थोवे वि। एवं जाव सीसपहेलिय ति।
पलिओवमे णं भंते! किं संखेज्जाओ0 पुच्छा। गोयमा! नो संखेज्जाओ आवलियाओ, असंखेज्जाओ आवलियाओ, नो अणंताओ आवलियाओ।
एवं सागरोवमे वि। एवं ओसप्पिणीए वि, उस्सप्पिणीए वि।
पोग्गलपरियटो पुच्छा। गोयमा! नो संखेज्जाओ आवलियाओ, नो असंखेज्जाओ आवलियाओ, अणंताओ आवलियाओ।
एवं जाव सव्वद्धा।
आणापाणू [?ओ] णं भंते! किं संखेज्जाओ आवलियाओ0 पुच्छा। गोयमा! सिय संखेज्जाओ आवलियाओ, सिय असंखेज्जाओ, सिय अणंताओ।
एवं जाव सीसपहेलियाओ।
पलिओवमा णं0 पुच्छा। गोयमा! नो संखेज्जाओ आवलियाओ, सिय असंखेज्जाओ आवलियाओ, सिय अणंताओ आवलियाओ।
एवं जाव उस्सप्पिणीओ।
पोग्गलपरियटा णं0 पुच्छा। गोयमा! नो संखेज्जाओ आवलियाओ, नो असंखेज्जाओ आवलियाओ, अणंताओ आवलियाओ।
थोवे णं भंते! किं संखेज्जाओ आणापाणूओ, असंखेज्जाओ0? जहा आवलियाए वत्तव्वया एवं आणापाणूओ वि निरवसेसा।।
एवं एएणं गमएणं जाव सीसपहेलिया भाणियव्वा।
सागरोवमे णं भंते! किं संखेज्जा पलिओवमा0 पुच्छा। गोयमा! संखेज्जा पलिओवमा, नो असंखेज्जा पलिओवमा, नो अणंता पलिओवमा। [दीपरत्नसागर संशोधितः]
[474]
[५-भगवई
