________________
सतं-१८, वग्गो - ,सत्तंसत्तं- , उद्देसो-१
___[] अट्ठारसमं सयं[] [७२१] पढमा विसाह मायंदिए य पाणातिवाय असुरे य।
गुल केवलि अणगारे भविए तह सोमिलऽट्ठरसे।।
0 पढमो उद्देसो 0 [७२२] तेणं कालेणं तेणं समएणं रायगिहे जाव एवं वयासीजीवे णं भंते! जीवभावेणं किं पढमे, अपढमे? गोयमा! नो पढमे, अपढमे। एवं नेरइए जाव वेमाणिए। सिद्धे णं भंते! सिद्धभावेणं किं पढमे, अपढमे? गोयमा! पढमे, नो अपढमे। जीवा णं भंते! जीवभावेणं किं पढमा, अपढमा? गोयमा! नो पढमा, अपढमा। एवं जाव वेमाणिया। सिद्धा णं0 पुच्छा। गोयमा! पढमा, नो अपढमा। आहारए णं भंते! जीवे आहारभावेणं किं पढमे, अपढमे? गोयमा! नो पढमे, अपढमे। एवं जाव वेमाणिए। पोहत्तिए एवं चेव। अणाहारए णं भंते! जीवे अणाहारभावेणं0 पुच्छा? गोयमा! सिय पढमे, सिय अपढमे। नेरतिए णं भंते!0? एवं नेरतिए जाव वेमाणिए नो पढमे, अपढमे। सिद्धे पढमे, नो अपढमे। अणाहारगा णं भंते! जीवा अणाहारभावेणं0 पुच्छा! गोयमा! पढमा वि, अपढमा वि। नेरतिया जाव वेमाणिया णो पढमा, अपढमा। सिद्धा पढमा, नो अपढमा। एक्केक्के पुच्छा भाणियव्वा। भवसिद्धीए एगत्त-पुहत्तेणं जहा आहारए । एवं अभवसिद्धीए वि। नोभवसिद्धीय-नोअभवसिद्धीए णं भंते! जीवे नोभव0 पुच्छा। गोयमा! पढमे, नो अपढमे। णोभवसिद्धीय-नोअभवसिद्धीये णं भंते! सिद्धे नोभव0? एवं चेव। एवं पुहत्तेण वि दोण्ह वि। सण्णी णं भंते! जीवे सण्णिभावेणं किं0 पुच्छा। गोयमा! नो पढमे, अपढमे। एवं विगलिंदियवज्जं जाव वेमाणिए। एवं पुहत्तेण वि। असण्णी एवं चेव एगत्त-पुहत्तेणं, नवरं जाव वाणमंतरा। नोसण्णीनोअसण्णी जीवे मणुस्से सिद्धे पढमे, नो अपढमे। एवं पुहत्तेण वि। सलेसे णं भंते!0 पुच्छा। गोयमा! जहा आहारए। एवं पुहत्तेण वि।
[दीपरत्नसागर संशोधितः]
[361]
[५-भगवई
