Page Text
________________
सतं - ७, वग्गो, सत्तंसत्तं-, उद्देसो- १
कहं णं भंते! अकम्मस्स गती पण्णायति ? गोयमा ! निस्संगताए, निरंगणताए, गति - परिणामेणं, बंधणछेयणताए, निरिंधणताए, पुव्वपओगेणं, अकम्मस्स गती पण्णायति ।
कहं णं भंते! निस्संगताए, निरंगणताए, गतिपरिणामेणं, अकम्मस्स गती पण्णायति ? गो.! से जहानामए केयि पुरिसे सुक्कं तुंबं निच्छिद्दं निरुवहतं आणुपुव्वीए परिकम्मेमाणे परिकम्मेमाणे दब्भेहि य कुसेहि य वेढेति, वेढित्ता अट्ठहिं मट्यिालेवेहिं लिंपति, २ उन्हे दलयति, भूइं भूइं सुक्कं समाणं अत्थाहमतारमपोरिसियंसि उदगंसि पक्खिवेज्जा, से नूणं गोयमा ! से तुंबे तेसिं अट्ठण्हं मट्यालेवाणं गुरुयत्ताए भारियत्ताए गुरूसंभारियताए सलिलतलमतिवतित्ता अहे धरणितलपतिट्ठाणे भवति ? हंता, भवति । अहे णं से तुंबे तेसिं अट्ठण्हं मट्यिालेवाणं परिक्खएणं धरणितलमतिवतित्ता उप्पिं सलिलतलपतिट्ठाणे भवति ? हंता, भवति। एवं खलु गोयमा ! निस्संगताए निरंगणताए गतिपरिणामेणं अकम्मस्स गती पण्णायति ।
कहं णं भंते! बंधणछेदणताए अकम्मस्स गती पण्णायति ? गोयमा ! से जहानामए कलसिंबलिया ति वा, मुग्गसिंबलिया ति वा, माससिंबलिया ति वा, सिंबलिसिंबलिया ति वा, एरंडमिंजिया वा उन्हे दिण्णा सुक्का समाणी फुडित्ताणं एगंतमंतं गच्छ एवं खलु गोयमा!. | कहं णं भंते! निरिंधणताए अकम्मस्स गती ? इंधणविप्पमुक्कस्स उड्ढं वीससाए निव्वाघातेणं गती पवत्तति एवं खलु गोतमा!.।
गोयमा ! से जहानामए धूमस्स
कहं णं भंते! पुव्वप्पयोगेणं अकम्मस्स गती पण्णायति ? गोतमा ! से जहानामए कंडस्स कोदंडविप्पमुक्कस्स लक्खाभिमुही निव्वाघातेणं गती पवत्तति एवं खलु गोयमा ! नीसंगयाए निरंगणयाए जाव पुव्वप्योगेणं अकम्मस्स गती पन्नायति ।
[३३४]दुक्खी भंते! दुक्खेणं फुडे? अदुक्खी दुक्खेणं फुडे ? गोयमा ! दुक्खी दुक्खेणं फुडे, नो अदुक्खी दुक्खेणं फुडे।
दुक्खी भंते! नेरतिए दुक्खेणं फुडे ? अदुक्खी नेरतिए दुक्खेणं फुडे? गोयमा ! दुक्खी रति दुक्खणं फुडे, नो अदुक्खी नेरतिए दुक्खेणं फुडे ।
एवं दंडओ जाव वेमाणियाणं ।
एवं पंच दंडगा नेयव्वा-दुक्खी दुक्खेणं फुडे, दुक्खी दुक्खं परियादियति, दुक्खी दुक्खं उदीरेति, दुक्खी दुक्खं वेदेति, दुक्खी दुक्खं निज्जरेति ।
[३३५] अणगारस्स णं भंते! अणाउत्तं गच्छमाणस्स वा, चिट्ठमाणस्स वा, निसीयमाणस्स वा, तुयमाणस्स वा; अणाउतं वत्थं पडिग्गहं कंबलं पादपुंछणं गेण्हमाणस्स वा, निक्खिवमाणस्स वा, तस्स णं भंते! किं इरियावहिया किरिया कज्जति? संपराइया किरिया कज्जति ? गो. ! नो ईरियावहिया किरिया कज्जति, संपराइया किरिया कज्जति।
से केणट्ठेणं.? गोयमा ! जस्स णं कोह-माण - माया लोभा वोच्छिन्ना भवंति तस्स णं रियावहिया किरिया कज्जति, नो संपराइया किरिया कज्जति । जस्स णं कोह- माण- माया लोभा अवोच्छिन्ना भवंति तस्स णं संपराइया किरिया कज्जति, नो रियावहिया । अहासुतं रियं रीयमाणस्स रियावहिया किरिया कज्जति । उस्सुत्तं रीयमाणस्स संपराइया किरिया कज्जति, से णं उस्सुत्तमेव रियति । से तेणट्ठेणं।
[दीपरत्नसागर संशोधितः ]
[121]
[५-भगवई]
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |