________________
(४
सूत्रकृतांग सूत्र
समारंभावेति अन्ने समारभंते वि न समणुजाणंति इति से महतो आयाणाओ उवसंते उवट्ठिए पडिविरए स भिक्खू ।
जे इमे कामभोगा सचित्ता वा अचित्ता वा ते णो सयं परिगिण्हंति, णो अन्नेणं परिगिण्हावेति, अन्नं परिगिण्हतंपि ण समणुजाणंति, इति से महतो आयाणाओ उवसंते उवट्ठिए पडिविरए से भिक्खू ।
जंपि य इमं संपराइयं कम्मं कज्जइ, णो तं सयं करेइ, णो अण्णाणं कारवेइ, अन्नपि करतं ण समणुजाणइ इति, से महतो आयाणाओ उवसंते उवट्ठिए पडिविरए।
से भिक्खू जाणेज्जा असणं वा पाणं वा खाइमं वा साइमं वा अस्सिं पडियाए एगं साहम्मियं समुद्दिस्स पाणाइं भूयाइं जीवाइं सत्ताई समारंभ समुद्दिस्स कीयं पामिच्चं अच्छिज्ज अणिसट्ठ अभिहडं आहटुद्दे सियं तं चेतियं सिया तं णो सयं भुजइ, णो अण्णेणं भुजावेइ, अन्न पि भुजंतं ण समणुजाणइ इति, से महतो आयाणाओ उवसंते उवट्ठिए पडिविरए।
से भिक्खू अह पुणेवं जाणेज्जा तं विज्जइ तेसि परक्कमे जस्सट्ठा ते वेइयं सिया, तं जहा-अप्पणो पुत्ता इणट्ठाए जाव आएसाए पुढो पहेणाए सामासाए पायरासाए संणिहिसंणिचओ किज्जइ, इह एएस माणवाणं भोयणाए, तत्थ भिक्खू परकडं परणिट्ठियमुग्गमुप्पायणेसणासुद्ध सत्थाइयं सत्थपरिणामियं अविहिंसियं एसियं वेसियं सामुदाणियं पत्तमसणं कारणट्ठा पमाणजुत्तं अक्खोवंजणवणलेवणभूयं संजमजायामायावत्तियं बिलमिव पन्नगभूएणं अप्पाणणं आहारं आहारेज्जा अन्न अन्नकाले, पाणं पाणकाले, वत्थं वत्थकाले, लेणं लेणकाले, सयणं सयणकाले।
से भिक्खू मायन्ने अन्नयरं दिसं अणुदिसं वा पडिवन्ने धम्म आइक्खे, विभए, किट्टे उवट्ठिएसु वा अणुवट्ठिएसु वा सुस्सूसमास पवेदए, संतिविरति उवसमं निव्वाणं सोयवियं अज्जवियं महवियं लाघवियं अणतिवाइयं सवेसि पाणाणं सर्वेसि भूयाणं जाव सत्ताणं, अणुवाई किट्टए धम्म । से भिक्खू धम्म किट्टमाणे णो अन्नस्स हेउं धम्ममाइक्खेज्जा, णो पाणस्स हेउं धम्ममाइक्खेज्जा, णो वत्थस हेउं धम्म माइक्खेज्जा, णो लेणस्स हेउं धम्ममाइक्खेज्जा, णो सयणस्स हेउं धम्ममाइक्खेज्जा, णो अन्नेसि विरूवरूवाणं कामभोगाणं हेउं धम्ममाइक्खेज्जा, अगिलाए धम्ममाइक्खेज्जा, नन्नत्थ कम्मनिज्जरट्ठाए धम्ममाइक्खेज्जा।
Jain Education International
For Private & Personal Use Only
www.jainelibrary.org
