Page Text
________________
भगवई
'दामेणं छत्तेणं धरिज्जमाणेणं, अणेगगणनायग'- दंडनायग-राईसर-तलवरमाडंबिय-कोडुबिय-इब्भ-सेटि-सेणावइ-सत्थवाह-दूय-संधिपालसद्धि संपरिवुडे मज्जणघरानो पडिनिक्खमति, पडिनिक्खमित्ता जेणेव बाहिरिया उवट्ठाणसाला, जेणेव चाउग्घंटे प्रासरहे तेणेव उवागच्छइ, उवागच्छित्ता चाउग्घंट प्रासरहं दुरुहइ', दुरुहित्ता हय-गय-रह- पवरजोहकलियाए चाउरंगिणीए सेणाए सद्धि संपरिवुडे, महयाभडचडगरविंदपरिक्खित्ते जेणेव रहमुसले संगामे तेणे व
उवागच्छइ, उवागच्छित्ता रहमुसलं संगामं प्रोयाए । १६७. तए णं से वरुणे नागनत्तुए रहमुसलं संगामं प्रोयाए समाणे अयमेयारूवं अभिग्गहं
अभिगेण्हइ-कप्पति मे रहमुसलं संगाम संगामेमाणस्स जे पुवि पहणइ से पडिहणित्तए', अवसेसे नो कप्पतीति; अयमेयारूवं अभिग्गहं अभिगेण्हइ अभिगेण्हेत्ता
रहमुसलं संगाम संगामेति ।। १६८. तए णं तस्स वरुणस्स नागनत्तुयस्स रहमुसलं संगाम संगामेमाणस्स एगे पुरिसे
सरिसए 'सरित्तए सरिव्वए' सरिसभंडमत्तोवगरणे रहेणं पडिरहं हव्वमागए ।। १९६. तए णं से पुरिसे वरुणं नागनत्तुयं एवं वदासी-पहण भो वरुणा ! नागनत्तुया !
पहण भो वरुणा ! नागनत्तुया ! २००. तए णं से वरुणे नागनत्तुए तं पुरिसं एवं वदासी-नो खलु मे कप्पइ देवाण
प्पिया ! पुवि अहयस्स पहणित्तए, तुमं चेव णं पुवि पहणाहि ॥ २०१. तए णं से पुरिसे वरुणेणं नागनत्तुएणं एवं वुत्ते समाणे आसुरुत्ते •रुटे कुविए
चंडिक्किए ° मिसिमिसेमाणे धणु परामुसइ, परामुसित्ता उसु परामुसइ, परामुसित्ता ठाणं ठाति, ठिच्चा पाययकण्णाययं उसु करेइ, करेत्ता वरुणं नागनत्तुयं
गाढप्पहारीकरेइ ।। २०२. तए णं से वरुणे नागनत्तुए तेणं पुरिसेणं गाढप्पहारीकए समाणे आसुरुत्ते
•रुटे कुविए चंडिक्किए० मिसिमिसेमाणे धणु परामुसइ, परामुसित्ता उसं परामुसइ, परामुसित्ता प्राययकण्णाययं उसु करेइ, करेत्ता तं पुरिसं एगाहच्चं
कडाहच्चं जीवियाग्रो ववरोवेइ ।। २०३. तए णं से वरुणे नागनत्तुए तेणं पुरिसेणं गाढप्पहारीकए समाणे अत्थामे अबले
अवीरिए अपुरिसक्कारपरक्कमे अधारणिज्जमिति कटु तुरए निगिण्हाइ, निगिण्हित्ता रहं परावत्तेइ, परावत्तेत्ता रहमुसलामो संगामाग्रो पडिनिक्खमति,
१. सं० पा०-अणेगगणनायग जाव दूय । २. संधिवाल० (अ, क, ब, म); संधिवालंग०
(ता)। ३. द्रुहेति (क); द्रुहति (ता, ब)। ४. सं० पा०-रह जाव संपरिवुडे ।
५. गर जाव परिक्खित्ते (अ, क, ता, ब, म, स) ६. पडिपह० (ता) । ७. सरिसत्तए सरिसव्वए (क)। ८. सं० पा.-आसुरुत्ते जाव मिसि । ६. सं० पा०-आसुरुत्ते जाव मिसि ।।
For Private & Personal Use Only
Jain Education International
www.jainelibrary.org
| SR No. | 003552 |
| Book Title | Angsuttani Part 02 - Bhagavai |
| Original Sutra Author | N/A |
| Author | Tulsi Acharya, Nathmalmuni |
| Publisher | Jain Vishva Bharati |
| Publication Year | 1975 |
| Total Pages | 1158 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 19 MB |