________________
२६२ ]
[जम्बूद्वीपप्रज्ञप्तिसूत्र
देवच्छन्दए, अट्ठजोअणाई आयामविक्खम्भेणं, साइरेगाई अट्ठजोअणाई उद्धं उच्चत्तेणं जाव जिणपडिमावण्णओ देवच्छन्दगस्स जाव ध्रुवकडुच्छुआणं इति ।
मन्दरस्स णं पव्वयस्स दाहिणेणं भद्दसालवणं पण्णासं एवं चउद्दिसिंपि मन्दरस्स, भद्दासालवणे चत्तारि सिद्धाययणा भाणिअव्वा । मन्दरस्स णं पव्वयस्स उत्तरपुरत्थिमेणं भद्दासालवणं पण्णासं जोअणाई ओगाहित्ता एत्थ णं चत्तारि णन्दापुक्खरिणीओ पण्णत्ताओ तं जहा— पउमा १, पउमप्पभा २, चेव कुमुदा ३, कुमुदप्पभा ४, ताओ णं पुक्खरिणीओ पण्णासं जोअणाई आयामेणं, पणवीसं जोअणाइं विक्खंभेणं, दसजोअणाई उव्वेहेणं, वण्णओ वेइआवणसंडाणं भाणिअव्वो, चउद्दिसिं तोरणा जाव
तासि णं पुक्खरिणीणं बहुमज्झदेसभाए एत्थ णं महं एगे ईसाणस्स देविंदस्स देवरण्णो पासायवडिंसए पण्णत्ते । पञ्चजोअणसयाई उद्धं उच्चत्तेणं, अद्धाइज्जाई जोअणसयाई विक्खंभेणं, अब्भुग्गयमूसिय एवं सपरिवारो पासायवडिंसओ भाणिअव्वो ।
मंदरस्स णं एवं दाहिणपुरत्थिमेणं पुक्खरिणीओ - उप्पलगुम्मा, णलिणा, उप्पला, उप्पलुज्जला तं चेव पमाणं, मज्झे पासायवडिंसओ सक्कस्स सपरिवारो । तेणं चेव पमाणेणं दाहिणपच्चत्थिमेणवि पुक्खरिणीओ - भिंगा भिंगनिभा चेव, अंजणा अंजणप्पभा । पासावडिंसओ सक्कस्स सीहासणं सपरिवारं । उत्तरपुरत्थिमेणं पुक्खरिणीओ - सिरिकंता १, सिरिचन्दा २, सिरिमहिआ ३, चेव सिरिणिलया ४ । पासायवडिंसओ ईसाणस्स सीहासणं सपरिवारंति ।
मन्दरे णं भंते ! पव्वए भद्दसालवणे कइ दिसाहत्थिकूडा पण्णत्ता ? गोयमा ! अट्ठ दिसाहत्थिकूडा पण्णत्ता, तं जहा
पउमुत्तरे १, णीलवन्ते २, सुहत्थी ३, अंजणागिरी ४ । कुमुदे अ५, पलासे अ ६, वडिंसे ७, रोअणागिरी ८ ॥ १ ॥
कहि णं भंते ! मन्दरे पव्वए भद्दसालवणे पउमुत्तरे णामं दिसाहत्थिकूडे पण्णत्ते ?
गोयमा ! मन्दरस्स पव्वयस्स उत्तरपुरत्थिमेणं, पुरत्थिमिल्लाए सीआए उत्तरेणं एत्थ णं पउमुत्तरे णामं दिसाहत्थिकूडे पण्णत्ते । पञ्चजोअणसयाई उद्धं उच्चत्तेणं, पञ्चगाउसयाई उव्वेहेणं एवं विक्खम्भपरिक्खेवो भाणिअव्वो चुल्लहिमवन्तसरिसो, पासायाण य तं चेव पउमुत्तरो देवो रायहाणी उत्तरपुरत्थिमेणं १ ।
एवं णीलवन्तदिसाहत्थिकूडे मन्दरस्स दाहिणपुरत्थिमेणं सीआए दक्खिणेणं । एअस्सवि नीलवन्तो देवो, रायहाणी दाहिणपुरत्थिमेणं २ ।
एवं सुहत्थिदिसाहत्थिकूडे मंदरस्स दाहिणपुरत्थिमेणं दक्खिणिल्लाए सीओआए पुरत्थिमेणं । एअस्सवि सुहत्थी देवो, रायहाणी दाहिणपुरत्थिमेणं ३ ।
एवं चेव अंजणागिरिदिसाहत्थिकूडे मन्दरस्स दाहिणपच्चत्थिमेणं, दक्खिणिल्लाए
