Page Text
________________
(६) णायाधम्मकहाओ प. सु.
१६ अ. अवरकका [७८]
अवसव्वसे मुहुत्तमेत्तं संचिट्ठति । तते णं से सागरए दारए सूमालियं दारियं सुहपसुत्तं जाणित्ता सयणिज्जाओ उट्ठे, २ वानघरस्स दारं विहाडेति, २ त्ता मारामुक्के विव काए जामेव दिसं पाउब्भूए तामेव दिसं पडिगते । ११२. तते णं सा सूमालिया दारिया ततो मुहुत्तंतरस्स पडिबुद्धा समाणी पतिवया जाव अपासमाणी सयणिज्जाओ उट्टेति, २ सागरस्स दारगस्स सव्वतो समंता मग्गणगवेसणं करेमाणी २ वासघरस्स दारं विहाडियं पासइ, २ एवं वयासी गए णं से सागरए ति कट्टु ओहयमणसंकप्पा जाव झियायति । तते णं सा भद्दा सत्थवाही कल्लं पाउ० दासचेडिं सद्दावेति, सद्दावेता एवं वयासी गच्छहणं तुमं देवाणुप्पिए ! वहुवरस्स मुधोवणियं उवणेहि । तते णं सा दासचेडी भद्दाए सत्थवाहीए एवं वुत्ता समाणी एयमद्वं तह त्ति पडिसुणेति, पडिसुणेत्ता मुहधोवणियं गेण्हति, २ जेणेव वासघरे तेणेव उवागच्छति, उवागच्छित्ता सूमालियं दारियं जाव झियायमाणि पासति, पासेत्ता एवं वयासी किन्नं तुमं देवाणुप्पिए ! ओहयमण जाव झियाहि ? तते णं सा सूमालिया दारिया तं दासचेडिं एवं वयासी एवं खलु देवाणुप्पिए ! सागरए दारए ममं सुहपसुत्तं जाणित्ता मम पासाओ उट्ठेति, उट्ठेत्ता वासघरदुवारं अवगुणति, वासघरदुवारं अवगुणित्ता जाव पडिगए। तते णं हं ततो मुहुत्तंतरस्स जाव विहाडियं पासामि पासेता गए णं से सागरए ति कट्टु ओहयमण जाव झियायामि। तते सादास चेडी मालियाए दारियाए एयमहं सोच्चा जेणेव सागरदत्ते सत्थवाहे तेणेव उवागच्छइ, २ त्ता सागरदत्तस्स एयमहं निवेएइ । तते णं से सागरदत्ते सत्थवाहे दासचेडीए अंतिए एयमद्वं सोच्चा निसम्मा आसुरुत्ते रुट्ठे कुविए चंडिक्किए मिसिमिसेमाणे जेणेव जिणदत्तस्स सत्यवाहस्स गिहे तेणेव उवागच्छति, २ त्ता जिणदत्तं सत्यवाहं एवं वयासीकिण्णं देवाणुप्पिया ! एवं जुत्तं वा पत्तं वा कुलाणुरूवं वा कुलसरिसं वा जण्णं सागरए दारए सूमालियं दारियं अदिट्ठदोसवडियं पइंवयं विप्पजहाय इहमागते ? बहूहिं खिज्जणियाहिं य रूटणियाहिं य उवालभति । तए णं जिणदत्ते सत्थवाहे सागरदत्तस्स सत्थवाहस्स एयमहं सोच्चा णिसम्मा जेणेव सागरए दारए तेणेव उवागच्छति, २ सागरयं दारयं एवं वयासी दुट्टु णं पुत्ता ! तुमे कयं सागरदत्तस्स सत्थवाहस्स गिहाओ इहं हव्वमागच्छंतेणं, तं गच्छह णं तुमं पुत्ता ! एवमवि गते सागरदत्तस्स गिहे । तते णं से सागरए दारए जिणदत्तं सत्थवाहं एवं वयासी- अवि यातिं अहं ताओ! गिरिपडणं वा तरुपडणं वा मरूप्पवायं वा जलप्पवेसं वा विसभक्खणं वा सत्थोवाडणं वा वेहाणसं वा गद्धपिट्टं वा पव्वज्जं वा विदेसगमणं वा अब्भुवगच्छेज्जा, नो खलु अहं सागरदत्तस्स गिहं गच्छेज्जा । तते णं से सागरदत्ते सत्थवाहे कुटुंतरिए सागरयस्स एयमहं निसामेति, २ त्ता लज्जिए विलिए विड्डे जिणदत्तस्स सत्थवाहस्स गिहातो पडिनिक्खमइ, २ त्ता जेणेव सए गिहे तेणेव उवागच्छति, २ त्ता सुकुमालियं दारियं सद्दावेइ, २ अंके निवेसेइ, २ त्ता एवं वयासी किण्णं तव पुत्ता ! सागरएणं दारगेणं ? अहं णं तुमं तस्स दाहामि जस्स तुमं इट्ठा जाव मणामा भविस्ससि त्ति सूमालियं दारियं ताहिं इट्ठाहिं कंताहिं पियाहिं मणुष्णाहिं मणामाहिं वग्गूहिं समासासेइ, २ पडिविसज्जेइ । तए णं से सागरदत्ते सत्थवाहे अन्नया उप्पिं आगासतलगंसि सुहनिसण्णे रायमग्गं ओलोएमाणे २ चिट्ठति । तते गं से सागरदत्ते एगं महं दमगपुरिसं पासइ दंडिखंडनिवसणं खंडमल्लग-खंडघडगहत्थगयं मच्छियासहस्सेहिं जाव अन्निज्जमाणमग्गं । तते गं से सागरदत्ते सत्थवाहे कोडुंबियपुरिसे सद्दावेति, २ त्ता एवं वयासी- तुब्भे णं देवाणुप्पिया ! एवं दमगपुरिसं विउलेणं असण- पाण- खाइम साइमेणं पलोभेह, २ गिहं अणुपवेसेह, २ खंडमल्लगं खंडघडगं च से एगंते एडेह, २ अलंकारियकम्मं कारेह, २ दमगं हायं कयबलिकम्मं जाव सव्वालंकारविभूसियं करेह, २ मणुण्णं असण- पाण- खाइम साइमं भोयावेह, २ मम अंतियं उवणेह । तए णं ते कोडुंबियपुरिसा जाव पडिसुणेति, २ जेणेव से दमगपुरिसे तेणेव उवागच्छंति, २ तं दमगं असण-पाण- खाइम साइमेणं उवप्पलोभेति, २ सयं गिहं अणुपवेसंति, तं खंडमल्लगं खंडघडगं च तस्स दमगपुरिसस्स एगंते एडेंति । तते णं से दमगे तंसि खंडमल्लगंसि खंडघडगंसि य एडिज्नमाणंसि महया महया सद्देणं आरसति । तए णं से सागरदत्ते तस्स दमगपुरिसस्स तं महता २ आरसियसद्दं सोच्चा निसम्मा कोटुंबियपुरिसे सद्दावेति, सद्दावेत्ता एवं वयासी-किण्णं देवाणुप्पिया ! एस दमगपुरिसे महया २ सद्देणं आरसति ? तते णं ते कोटुंबियपुरिसा एवं व्यासी एस णं सामी ! तंसि खंडमल्लगंसि खंडघडगंसि य एडिज्जमाणंसि महया २ सद्देणं आरसइ । ततेां से सागरदत्ते सत्थवाहे ते कोटुंबियपुरिसे एवं वयासी माणं तुब्भे देवाणुप्पिया ! एयस्स दमगस्स तं खंड जाव एडेह, पासे से ठवेह, जहा अपत्तियं ण भवति । ते श्री आगमगुणमंजूषा ६६८
কএএরএ এ
| SR No. | 003256 |
| Book Title | Agam 06 Ang 06 Gnatadharma Sutra Shwetambar Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 116 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 11 MB |