Page Text
________________
(६) णायाधम्मकहाओ प. सु.
./ १६ अ. अवरकंका (७९)
फफफफफफफ
वि तहेव ठावेंति, २ तस्स दमगस्स अलंकारियकम्मं कारेति, २ सयपाग-सहस्सपागेहिं तेल्लेहिं अब्भंगेति, अब्भंगिए समाणे सुरभिणा गंधट्टएणं गायं उब्वट्टेति, २ त्ता उसिणोदगगंधोदगेणं ण्हाणेंति, २ सीतोदगेणं ण्हाणेति, २ पम्हलसुकुमालाए गंधकासाईए गायाइं लूहेति, २ त्ता हंसलक्खणं पडगसाडगं परिहेति, २ ता सव्वालंकारभूसियं करेति, २ विउलं असण- पाण- खाइम - साइमं भोयावेंति, २ त्ता सागरदत्तस्स उवर्णेति । तए णं से सागरदत्ते सत्थवाहे सूमालियं दारियं हायं जाव सव्वालंकारभूसियं कारेत्ता तं दमगपुरिसं एवं वयासी एस णं देवाणुप्पिया ! मम धूया इट्ठा कंता पिया मणुण्णा मणामा, एयं णं अहं तव भारियत्ताए दलामि, भद्दियाए भद्दतो भवेज्जासि। तते णं से दमगपुरिसे सागरदत्तस्स एयमहं पडिसुणेति, पडिसुणेत्ता सूमालियाए दारियाए सद्धिं वासघरं अणुपविसति, २ सूमालियाए दारियाए सद्धिं तलिमंसि निवज्जइ । तते णं से दमगपुरिसे सूमालियाए दारियाए इमेयारूवं अंगफासं पडिसंवेदेति, सेसं जहा सागरगस्स जाव सयणिज्जा उट्ठेइ, २ उत्ता वासघराओ निरगच्छति, वासघराओ निग्गच्छित्ता खंडमल्लगं खंडघडगं च गहाय मारामुक्के विव काए जामेव दिसं पाउब्भूए तामेव दिसं पडिगए। तते णं सा सूमालिया जाव गए णं से दमगपुरिसे त्ति कट्टु ओहयमण जाव झियायति । ११३. तते णं सा भद्दा कल्लं पाउप्पभाया० दासचेडिं सद्दावेति, सद्दावेत्ता एवं वयास जाव सागरदत्तस्स एयमहं निवेदेति । तते णं से सागरदत्ते तहेव संभंते समाणे जेणंव वासघरे तेणेव उवागच्छति, २ त्ता सूमालियं दारियं अंके निवेसेति निवेसित्ता एवं वयासी अहो णं तुमं पुत्ता ! पुरा पोराणाणं जाव पच्चणुब्भवमाणी विहरसि, तं मा णं तुमं पुत्ता ! ओहयमण जाव झियाहि, तुमं णं पुत्ता ! मम महाणसंसि विपुलं असण- पाण- खाइम साइमं जहा पोट्टिला जाव परिभाएमाणी विहराहि । तते णं सा सूमालिया दारिया एयमहं पडिसुणेति, पडिसुणेत्ता महाणसंसि विपुलं असण-पाण-खाइम - साइमं जाव दलमाणी विहरइ । ते णं काले णं ते समए णं गोवालियाओ अज्जाओ बहुस्सुयाओ जहेव तेतलिणाए सुव्वाओ समोसढाओ, तहेव संघाडओ जाव अणुपविट्ठो, तहेव जाव सूमालिया पडिलाभेत्ता एवं वदासी एवं खलु अज्जाओ ! अहं सागरस्स दारगस्स अणिट्ठा जाव अमणामा, नेच्छइ णं सागरए दारए मम नामं वा जाव परिभोगं वा, जस्स जस्स वि य णं दिज्जामि तस्स तस्स वि य णं अणिट्ठा जाव अमणामा भवामि, तुब्भे यणं अज्जाओ ! बहुनायाओ एवं जहा पोट्टिला जाव उवलब्द्धे जेणं अहं सागरस्स दारगस्स इट्ठा कंता जाव भवेज्जामि, अज्जाओ तहेव भांति, तहेव साविया जाया, चिंता, तहेव सागरदत्तं सत्थवाहं आपुच्छति, जाव गोवालियाणं अंतिए पव्वइया । तते णं सा सूमालिया अज्जा जाया इरियासमिया जाव गुत्तबंभयारिणी बहूहिं चउत्थ-छट्ठ-ट्ठम जाव विहरति, तते णं सा सूमालिया अज्जा अन्नया कयाइ जेणेव गोवालियाओ अज्जाओ तेणेव उवागच्छति, २ त्ता वंदति नम॑सति, २ एवं वयासी इच्छामि णं अज्जाओ! तुब्भेहिं अब्भणुन्नाया समाणी चंपाए बाहिं सुभूमिभागस्स उज्जाणस्स अदूरसामंते छछट्टेणं अणिक्खित्तेणं तवोकम्मेणं सूराभिमुही आयावेमाणी विहरित्तए । तते णं ताहो गोवालियाओ अज्जाओ सूमालियं अज्जं एवं वयासी अम्हे णं अज्जे ! समणीओ निग्गंथीओ इरियासमियाओ जाव गुत्तबंभचारिणीओ, नो खलु अम्हं कप्पति बहिया गामस्स वा जाव सणिवेसस्स वा छछट्टेणं जाव विहरित्तए, कप्पति णं अम्हं अंतो उवस्सयस्स वतिपरिक्खित्तस्स संघाडिद्धियाणं समतलपतियाए आयावेत्तए । तते णं सा सूमालिया गोवालियाए एयमहं नो सद्दति, नो पत्तियति, नो रोएति, एयमठ्ठे असद्दहमाणी अपत्तियमाणी अरोएमाणी सुभूमिभागस्स उज्जाणस्स अदूरसामंते छद्वंछद्वेणं जाव विहरति । ११४. तत्थ णं चंपाए ललिया नाम गोट्ठी परिवसति, णरवइदिणविया रा अम्मापिइनियगनिप्पिवासा वेसविहारकयनिकेया नाणविहअविणयप्पहाणा अड्डा जाव अपरिभूया । तत्थ णं चंपाए नयरीए देवदत्ता नामं गणिया होत्था सूमाला जहा अंडणाए । तते णं तीसे ललियाए गोट्ठीए अन्नया पंच गोट्ठिल्लगपुरिसा देवदत्ताए गणियाए सद्धिं सुभूमिभागस्स उज्जाणस्स उज्जाणसिरिं पच्चणुब्भवमाणा विहरंति । तत्थ णं एगे गोट्ठिल्लगपुरिसे देवदत्तं गणियं उच्छंगे धरेति, एगे पिट्ठओ आयवत्तं धरेइ, एगे पुप्फपूरयं रएइ, एगे पाए रएइ, एगे चामरुक्खेवं करेइ । तते णं सा सूमालिया अज्जा देवदत्तं गणियं तेहिं पंचहिं गोट्ठिल्लपुरिसेहिं सद्धिं ओरालाई माणुस्सगाई भोगभोगाई भुंजमाणी (णि) पासति, २ त्ता इमेयारूवे संकप्पे समुप्पज्जित्था - अहो णं इमा इत्थिया पुरा पोराणाणं जाव विहरइ । तं जति णं केइ इम्मस्स सुचरियस्स तव नियम- बंभचेरवासस्स कल्लाणे फलवित्तिविसेसे अत्थि
श्री आगमगुणमंजूषा - ६६९
6666666666
| SR No. | 003256 |
| Book Title | Agam 06 Ang 06 Gnatadharma Sutra Shwetambar Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 116 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 11 MB |