________________
६४ ]
[वृहद् आध्यात्मिक पाठ संग्रह आनन्दाश्रु-स्नपित-वदनं गद्गदं चाभिजल्पन् यश्चायेत त्वयि दृढ़-मनाः स्तोत्र-मन्त्रैर्भवन्तम्। तस्याभ्यस्तादपि च सुचिरं देह-वल्मीक-मध्यान् निष्कास्यन्ते विविध-विषम-व्याधयः काद्रवेयाः ॥३॥
प्रागेवेह त्रिदिव-भवनादेष्यता भव्य-पुण्यात् पृथ्वी-चक्रं कनकमयतां देव! निन्ये त्वयेदम्। ध्यान-द्वारं मम रुचिकरं स्वान्त-गेहं प्रविष्ट: तत्कि चित्रं जिन वपुरिदं यत्सुवर्णीकरोषि ॥४॥
लोकस्यैकस्त्वमसि भगवन्निर्निमित्तेन बन्धुस्त्वय्येवासौ सकल-विषया शक्तिरप्रत्यनीका। भक्ति-स्फीतां चिरमधिवसन्मामिकां चित्त-शय्यां मय्युत्पन्नं कथमिव ततः क्लेश-यूथं सहेथाः ॥५॥
जन्माटव्यां कथमपि मया देव दीर्घ भ्रमित्वा प्राप्सैवेयं तव नय-कथा स्फार-पीयूष-वापी। तस्या मध्ये हिमकर-हिम-व्यूह-शीते नितान्तं निर्मग्नं मां न जहति कथं दुःख-दावोपतापाः ॥६॥
पाद-न्यासादपि च पुनतो यात्रया ते त्रिलोकीं। हेमाभासो भवति सुरभिः श्रीनिवासश्च पद्मः। सर्वाङ्गेण स्पृशति भगवंस्त्वय्यशेषं मनो मे। श्रेयः किं तत्स्वयमहरहर्यन्न मामभ्युपैति ॥७॥
Jain Education International
For Private & Personal Use Only
www.jainelibrary.org
