________________
महावीरचरितम्
माहणकुंडग्गामे, अवयरिओ सिय असाढछट्ठीए। विप्पोसहदत्तगिहे, देवाणंदाइ उदरम्मि॥ १० ॥ अह बासीइदिणंते, चउदससुमिणेहिं इंतजंतेहिं । हत्थुत्तरकयकल्लाणापणगअच्छरियचरिय तओ ॥ ११ ॥ जणनायनायखत्तिय-पसिद्धसिद्धत्थपत्थिवपियाए। चेडगनिव भगिणीए, तिसलादेवीएँ कुच्छीए ॥ १२॥ सक्कभणिएण हरिणेगमेसिणा गब्भविणिमयं काउं। आसोयकसिणतेरसि-निसाए तं नाह! साहरिओ॥ १३ ॥ खत्तियकुंडग्गामे, जाओ चित्तसियतेरसिनिसद्धे । कासवगुत्ते' कणगाभ!, कन्नरासीइ सीहंको ॥ १४॥ जेण-चिंतामणि तुमए, अवइन्ने रयणजणधणकणेहिं । वड्डित्ता नायकुलंति वड्डमाणुत्ति तोऽसि फुडं ॥ १५॥ तं जम्ममजणखणम्मि सक्ककुवियप्पसंकमुक्खणिउं । जेण महंतमवि गिरिमीरित्थ तओ महावीरो॥ १६॥ पियरमरणेवि तं जिट्ठभाऊवयणेण ठासि वासदुगं। गिहिवासिच्चिय निरवजवित्तिणा निच्छय मुणिव्व ॥ १७ ॥ सत्तकरदेह गेहम्मि अच्छिउं तीस वच्छरे कुमरो। लोगंतियतारविओ, संवच्छरमिच्छियं दाउं ॥ १८॥ सुरनरवइकयबहुविह-जलण्हवणो सुरविलेवणविलित्तो। रुइरालंकार धरो, चउदेवनिकायसमणुगओ ॥ १९ ॥ चंदप्पहसिवियाए, मग्गसिरे कसिणदसमिअवरण्हे । पढमवए पव्वइओ, छटे णं नायसंडवणे ॥ २० ॥ कुम्मारगामबाहिं, वयपढमनिसाइ एइ किर सक्को। वारइ गोवं वागरइ, निरुवसग्गं करे भंते ! ॥ २१ ॥
१. कासवगुत्तो इति ह।
२. निच्छिय इति ह०।
Jain Education International
For Private & Personal Use Only
www.jainelibrary.org
