________________
१५९
सुरनरोरगकिन्नरनायकप्रणत ! मल्लिविभो ! शिवदायक!। त्वयि रता जनता लयमीहते शमरसेऽमरसेव्य ! जगत्पते ! १९ श्रयति यो मुनिपं मुनिसुव्रतं मदनमानहरं धृतसुत्रतम् । स इह जन्मजरामरणाकरे जिनपते ! न पतेद्भवसागरे ॥२०॥ प्रणतकौशिकशेखररत्नरुक्सलिलधौतपदाम्बुज ! नष्टरुक् ! । यतिपते! कृतसज्जनसम्मदं नवनमेव नमे! तव मुक्तिदम् ॥२१॥ हरिहरेन्द्रचतुर्मुखसंयुतं त्रिभुवनं लघु येन वशीकृतम् । प्रवरनेमिजिनेश! जितस्त्वया स मदनो मदनोदक ! हेलया २२ मदकृतच्छविभासुरविग्रहं सपदि नाशितदुर्मतकुग्रहम् । य इह पार्श्वजिनं ननु सेवते स परमं परमं पदमश्रुते ॥ २३ ॥ जयति यः सुरसङ्गममानहृत् जगति वीरजिनो जगतीसुहृत् । भवतु भीतिहरो मम सर्वदा स शरणं शरणं गुणसम्पदाम् २४
(इति नमस्काराः) विषयभूरुहभञ्जनवारणा मम हरन्तु तमो भववारणाः । भविकनेत्रसुधाञ्जनसोदरा जिनवरा नवरावपयोधराः ॥ २५॥ भुवनभासिशिवाध्वनि दीपकं विविधहेतुनयार्थनिरूपकम् । भविकलोकचकोरनिशाकरं जिनमतं नमत प्रतिवासरम् ॥२६॥ एवं श्रीजिननायका यमकितैर्वृत्तैर्मया संस्तुताः
सन्नम्रामरनाथमौलिमणिरुक्सम्भारनीराजिताः । श्रीमत्सद्गुरुदेवरत्नमहिमभ्राजिष्णुपादाम्बुजा जायन्तां सुखसंपदे तनुभृतां कुप्तोरुभद्रव्रजाः ॥ २७ ॥
॥ इति चतुर्विंशतिजिनस्तवनम् ॥
Jain Education International
For Private & Personal Use Only
www.jainelibrary.org
