________________
सिरिपउमप्पहसामिचरियं
किं एस अंतरप्पा ? पत्तो वा ? मज्झ जीवियं अहवा ? | एवं चितंतीए, खीरमुरुरुहेसु से जायं ॥८३५।। जइ मे मणं पमाणं, मह अंगरूहो इमो धुवं तत्तो । इय चितंती एसा, अणिमिसनयणा तया जाया ॥८३६॥ चिंतइ सो वि किमेसा, मह जणणी देवया समक्खाया ? एत्थंतरम्मि पत्तो, सुजसो नंदीसरे गंतं ॥८३७॥ जंपइ सुरिंददत्तं, चिट्ठसि किं वच्छ ! संसयावडिओ ? रिसहेसरप्पसाया, पत्ता इह सा तहं जणणी ॥८३८॥ मणवंछियत्थमीलणकरेण रिसहेण मंडियं भवणे । पत्तं पसिद्धिमेयं, वणं पि पियमेलणं वच्छ ! ॥८३९॥ भद्दे मयंकलेहे ! तुह पुत्तो एस जो तया मुक्को । तुमए जक्खाययणे, इह पत्तो तुज्झ पुनेहिं ॥८४० ।। तत्तो सुरिंददत्तो, गंतुं सहस त्ति नमइ नियजणणिं । हरिसवसगलिरजलभरपक्खालियचारुकमकमलं ॥८४१ ।। काऊण इमो सहसा,. मयंकलेहाए अंकपालीए । पुट्ठो सव्वं वइयरमामूलं साहए निययं ॥८४२ ।। सुच्चा इमं पयंपइ, एसा कलकंठिसारसी अहयं । हा वच्छ ! जीए पुत्तो, पवड्ढिओ निच्चमण्णत्थ ॥८४३॥ हे धणवइ ! जुवईसु, रेहा तुह चेव जीए उच्छंगे । बालत्तणम्मि सायरचंदसओ वढिओ एसो ॥८४४|| इत्थंतरम्मि जंपइ निब्भररोमंचबंधुरो सुजसो । वद्धाविज्जसि परमूसवेण अवरेण हे वच्छ ! ॥८४५॥ एगागी पिच्छंतो, पट्टणकाणणसएस नियदइयं । पत्तो सायरचंदो, इमस्स नयरस्स आसने ॥८४६।। सोऊण इमं सहसा, तुट्टिर कंचुय-सुसंधि-संदोहा । अइपयडपलयदेहा, मयंकलेहा तहा जाया ॥८४७॥
Jain Education International 2010_04
For Private & Personal Use Only
www.jainelibrary.org
