________________
हंसपालकहा
३
३
परिवज्जिय परपीला, वरसीला निच्चचत्तपरहीला ।। परिहरिय नम्मलीला, भज्जा लीलावई तस्स ॥४११॥ सो अन्नया य विहवज्जणाय देसतरम्मि वच्चेइ । अहवा धणस्स कज्जे, किज्जइ किं किं न लुद्धेहिं ? ॥४१२॥ गामंतराणि नगरंतराणि देसंतराणि विविहाणि । हिंडंतो वि न पावइ, लच्छिं तुच्छं पि निब्भग्गो ॥४१३॥ वलिओ तेणेव मुहेण झ त्ति पिच्छेइ सन्निवेसम्मि । एगत्थ बिल्लतरुणो, वडवायं धरणितललग्गं ॥४१४|| बिल्लपलासेसु धुवं, दव्वं ति विणिच्छिऊण निय चित्ते । वडवायं उम्मलइ, हत्थं सो हरिसपडिहत्थो ॥४१५॥ सो हेमटंकमिक्कं, तत्थ निरिक्खित्त चिंतइ विसण्णो । मेहे अमोहधारे, अहियं न वि लहइ बप्पीहो ॥४१६॥ पत्तो नियमावासं, सव्वं साहेइ निययभज्जाए । सा आह नाह ! अहियं, लिहियाउ न लब्भए कहवि ॥४१७॥ मा कुणसु सामि ! खेयं, सेयं तं चेव पत्तकालं जं । निच्चं निच्चतमणो, करेस सव्वाणि किच्चाणि ॥४१८॥ नियपियगिराए तत्तो, गंतं वीहीए तेण टंकेण । आणेइ कलमसालिं, दुद्धं घय-सक्करासहियं ॥४१९॥ छहियस्स दूरदेसंतराउ पत्तस्स निययनाहस्स ।। परमनं निम्माविय, सघयं परिवेसियं तीए ॥४२०॥ अह तस्स गिहे पत्तो, जयदत्तो नाम कामपरिचत्तो । मासोपवासकारी, महामणी मणिय परमत्थो ॥४२१॥ तस्सागमणमणब्भ, वरिसं पि व हरिसनिब्भरो एसो । मनतो उप्पाडइ, भाणं परमन्नसंपण्णं ॥४२२॥ तत्तो मुणिंदपत्ते, भवजलनिहिं जाणवत्तसारिच्छे । घय-सक्कराइसहियं, परमनं तेण पक्खित्तं ॥४२३॥
Jain Education International 2010_04
For Private & Personal Use Only
www.jainelibrary.org
