________________
हसपालकहा
बारस वि भावणाओ, भावविसुद्धा जिणिंद-चरियाणि । कम्मविवागं विविहं, निय चित्ते चिंतए निच्चं ॥२०३॥ इत्तो य सत्थवाहो, परमो दीवंतरेसु गंतूणं । पत्तो तत्थ नियच्छइ, पवणहयं तं ज्झयं झ त्ति ॥२०४॥ वहणाउ समुत्तिण्णो विम्हिओ सायरस्स तीरम्मि । लक्खणराइविराइयमेसो पयपद्धई नियइ ॥२०५॥ तं चेव पसंसंतो, गच्छंतो तयणुसारओ पत्तो । रयणगिरिगुहादारे, तं हरणच्छिं नियच्छेइ ॥२०६॥ पूयंति जिणपडिमं, पडिवालिय जाव ताव जिणपूयं । पुच्छइ मयच्छि ! कत्तो पत्ता ? किं वा कुलं तुज्झ ? ॥२०७॥ नाहं विरुद्धकारी, कयाविहे जामि ! कुणसु वीसंभं । धारेसु मज्झ विसए, बंधुमिव बंधुरं बुद्धिं ॥२०८॥ तत्तो कयवीसंभा,जंपइ हे भाय ! सत्थवाहेण । नियनाहेणं मयंकाभिहेणं चलिया इहं पत्ता ॥२०९॥ भग्गम्मि वहणनिवहे, अहयं फलिहेण एत्थ दीवम्मि । पत्ता ता जइ सच्चं, भाया ता नेसु वसिमम्मि ॥२१०॥
आम ति तेण भणिए, चलिया सह तेण दुद्ध-मुद्धच्छी । निययपणं गोवित्ता वच्चइ निच्चं पि निच्चिंता ॥२११॥ इत्तो य सत्थवाहो, तिस्सा पिच्छित्तु अच्छिविच्छोहो । चिंतइ विचलिय चित्तो, अहह अहो ! रूवसव्वस्सं ॥२१२॥ लच्छी व रई अहवा, सुरी व असुरी व किनरी एसा । नूणं न मणुस्सीणं, एवं रूवं भवे एवं ॥२१३॥ मन्ने सो च्चिय मयणो, जयं जयंतो वि जेण जस्स इमा । अभिरूवरूवरेहा, लग्गइ कंठे सउक्कंठा ॥२१४॥ इय चिंतिय सो जंपइ, संपइ मह मुद्धि ! माणसं लुद्धं । जइ वि निवारसि मारसि, ता नूणमखुट्टए काले ॥२१५॥
Jain Education International 2010_04
For Private & Personal Use Only
www.jainelibrary.org
