________________
४१२
सिरिपउमप्पहसामिचरियं
जइ अत्थि तुज्झ नेहो, इमेण सह विससु तं हुयासम्मि । अहयं तु कबंधेणं, पविसिस्सं नत्थि संदेहो । ३०७ ।। तो दो वि कामणीओ कमसो सीसेण तह कबंधेण ॥ जलणम्मि पविट्ठाओ, विम्हियलोयाण पच्चक्खं ॥ ३०८ ॥ इय वइयरं निसामिय, कुमरो चिंतेइ अहह तरुणेण । तेण बहतरुणरमणीवसेण पत्तं अहो मरणं ॥ ३०९ ।। सहयारमंजरि च्चिय, एगा भज्जा हवेउ तो मज्झ ॥ इय चिंतिय सीलंधरगुरुणो पासम्मि वच्चेइ ।। ३१० ॥ गिण्हेइ इमं नियम, मह पहु ! सहयारमंजरिं मोत्तुं ।। अवराणं रमणीणं, परिहारो हवइ सव्वाण ।। ३११ ॥ अह अन्नया कुमारो पियाए सहिओ नियम्मि पासाए । मणिमयजालगवक्खय-उवविट्ठो चिट्ठए जाव ।। ३१२ ।। ताव सहस त्ति दिट्ठो, तेण कुरंगो सुवन्न-रुइ-रंगो । भुवणजणमणोहारी,असोयवणयाए मज्झम्मि ॥ ३१३ ॥ दट्ठण नयणहरणं, तं हरिणं सुहमरोमराइल्लं ।। विम्हिय वियसिय नेत्तो, तत्तो कुमरो विचितेइ ॥ ३१४ ॥ परिहाणि बुद्धि कलियं विडप्पमुहकुहरकवलियं मन्ने । हरिणकमंकहरिणो, परिहरिय इमो इहं पत्तो ।। ३१५ ।। अहव नवफुल्लकाणणमज्झम्मि इहेव गंधवाहस्स ।। परिवीसंतस्स इमो, वाहणहरिणो परिब्भमइ ॥ ३१६ ।। विज्जाहरस्स कस्स वि, अहवा कीए वि तियसरमणीए ।। दिव्ववसा पब्भट्ठो, कीलाहरिणो इमो अहवा ।। ३१७ ।। सहयारमंजरीए इय चिंतंतो इमो इमं भणिओ ।। हे नाह ! मज्झ कीलणकज्जे आणेसु हरिणमिणं ॥ ३१८ ॥ सो तव्वयणाणंतरमासारिय पवरवल्लई हत्थो ।। उल्लसियकोउहल्लो, उवहरिणं वच्चए निहुयं ।। ३१९ ॥
Jain Education International 2010_04
For Private & Personal Use Only
www.jainelibrary.org
