________________
३७२
सिरिपउमप्पहसामिचरियं
आह मह वराईए, कज्जे खिन्नोसि खणमित्तं ।। १९२७ ।। सरणागयरक्खटुं, खयरेणं तेण जुज्झयंतेण ।। हे कुमर ! तए विहिओ धीराण धुरंधरो अप्पा ।। १९२८ ।। नवरं कुमर ! मए च्चिय अज्ज अणज्जाए विगयलज्जाए। उच्छंगमणुसरंतीए, एस दुहिओ तुमं विहिओ ।। १९२९ ।। अहवामन्ने उवयारि च्चिय, मह सो खयरो भएण जस्साहं ।। पत्तम्हि जम्मसयकयसुकयसुलभं तुहुच्छंगं ।। १९३० ।। ता तिहुयणसिरसेहर ! नंदसु तं जाव सासयं कालं ॥ अम्हारिसा वि दुहिया, हवंतु सुहिया तुमाहितो ।। १९३१ ॥ सो आह महुरभासिणि ! कासि तुमं? कह इमेण खयरेण ? ।। पत्तासि कहसु कह वा, तुह जाया एरिसी भासा? ।। १९३२ ।। अह सा हंसी जंपइ, कणयपुरीए पुरीए महुसमए ॥ दिट्ठा असोयमंजरिकन्ना अंदोलणारूढा ।। १९३३ ।। वेयड्डसिहर-संगय-रहनेउर-चक्कवालपुर-पहुणा ॥ खयरेसरेण तरुणी, मयंकनामेण दिव्ववसा ।। १९३४ ।। (जुयलं) अह तीए चारु-तारुन्न-रम्मलायन्न-हरिय-हियएण ।। वायं विउव्विऊणं, हरिया दोला जुया बाला ।। १९३५ ॥ सा कुमर ! सबरसेनाए घोरअडवीए मज्झयारम्मि ।। मुक्का निकुंजमज्झे, भयवस-कंपंत-सव्वंगा ॥ १९३६ ।। खयरेसरो पयंपइ, कंपसि किं भीरु ! रूयसि किं मुद्धि ! । किं तरलतारनेत्ता, दिसाउ पिच्छेसि पसयच्छि ! ।। १९३७ ।। नाहं चोरो परदारिओ वररंभोरू ! किंतु खयरो हं ।। अब्भत्थेमि मए सह, मनसु वीवाहसंबंधं ॥ १९३८ ।।
Jain Education International 2010_04
For Private & Personal Use Only
www.jainelibrary.org
