________________
अनंतकित्तिकुमारकहा
३१५
दरं गयम्मि वहणे करिही कोलाहलं इमा घोरं । रे धाह धाह, पडिओ मह दइओ इत्थ सत्थाहो ॥१२००। वहणाणि नंगरित्ता सायरसलिलं निरक्खिही सयलं परिवारो पिच्छेइ न य तं मक्खं अभव्व व्व ।।१२०१ ।। वाहप्पवाह-धारा-धोरणि-सिप्पंत-कंचयाभोगा । सा तारतारसई पावा कवडेण विलवेही ॥१२०२॥ हा नाह ! नरसिरोमणि, दाणेसर, सुहय, सुंदरायार ! मं मुत्तूण अनाहं, कत्थ गओ देसु पडिवयणं ॥१२०३।। न हु मज्झ पहइनाहो, सत्थाहो वा न चेव संजायं ।। हय विहि-हयास ! अहयं, हा ! अबला धाइया तुमए ॥१२०४।। रयणायर ! रयणेहिं, इत्तियमित्तेहिं किं न तट्ठोसि ? | जं हरसि अभग्गाए, नररयणं मज्झ तं दइयं ॥१२०५॥ अज्ज वि न जाव दूरं, गच्छइ दइओ अहं पि गच्छिस्सं । इय जंपिऊण सहसा, परिकरबंध इमा करिही ॥१२०६॥ पवहणजणो वि सव्वो, तिस्सा नेहेण विम्हिओ संतो । कर-चरण-गहण-पव्वं, धरिही कट्टेण कहकह वि ॥१२०७॥ एवं सुकंठपमुहा, तं जंपिस्संति देवि ! अम्हाणं । काहिसि अकालमरणं, अज्जमती अणाहाणं ॥१२०८॥ तं दइया तं जीयं, तं विहओ तस्स सत्थवाहस्स । तो विहिवसेण वि गए, तम्मि तमं एत्थ सत्थाहो ॥१२०९॥ इत्तियमित्तेणं चिय, कज्जं तिस्सा वि ताण वयणेहिं । उवरोहिय व्व तत्तो, झड त्ति मोणं इमा करिही ॥१२१०॥ पवहणजणसमवायं, गिण्हित्ता पुण वि वहण-निवहं तं । पेराविस्सइ पमइयचित्ता, नियकज्जसिद्धीए ॥१२११।। सा तेण सुकंठेणं निब्भरराया रमिस्सए विविहं । चिंतिस्सइ सो चित्ते पिच्छसु एयाए धिट्टत्तं ॥१२१२।।
Jain Education International 2010_04
For Private & Personal Use Only
www.jainelibrary.org
