________________
२८६
कामं दोलण - सरिसा, भांति सवणा निकाम-कामंधा । न मुणंति कूडपासा, कामय - हरिणाण गहणत्थं ॥८२६॥ जे उण विवेयवंता, सम्मं मन्नंति ते इमं इत्थं । असुइ-मल-भरियमेयं, अणवट्ठिय कुट्ठियारूवं ॥८२७॥ तो इक्कारस मुत्तासुइप्पवाहा सव्व इत्थओ | मुत्तुं जइ वि न सक्का, परदारं तह विवज्जेह ||८२८।। नेरइया तह तिरिया, कुंटा मुंटा नपुंसगा रोरा । दोहग्ग-दहण-दद्धा, परदार - रया सया हुंति ॥ ८२९॥ देवा उत्तम-मणुया, धणिणो सव्वंग - सुंदरावयवा । सोहग्ग-महानिहिणो, सदार - तुट्ठा नरा हुंति ॥ ८३० ॥ जह परदारं पुरिसा, विवेयवंता चयंति आजम्मं । इत्थीहिं पर–पुरिसो, तहेव वज्जो पत्ते ||८३१ ॥ परदार-विरत्ताणं, इहेव महिमा हवेइ सुरविहिया । इह अत्थे दिट्ठतो, अणंतकित्तिस्स कुमरस्स ॥ ८३२ ॥ अणंतकित्तिकुमारकहा
जंबूदीवे दीवे, भारहवासम्म आसि वरनयरी | नामेण वेजयंती, नयरेसुं वेजयंति व्व ॥ ८३३ ॥ उच्छलिय- सिन्न -धूली - छायइमायंड - मंडलो तत्थ । राया जहत्थ नामो, अनंतसेणो कुणइ रज्जं ॥ ८३४|| सयलावरोहसारा, सारासारत्थ - विहिय-सुवियारा । तस्सासि पट्टदेवी, जयलच्छी नाम कमलच्छी ||८३५॥ रनो य तस्स पुत्ता, अवरावर - देवि - गब्भ-संभूया । आसि सयममरकित्तीसयकित्तिप्पमुहनामाणो ||८३६॥ जामणि- विरामसमए, सा जयलच्छी वि पिच्छए सुमिणे । पविसंतं नियवयणे, अनंतमुत्तियमयं हारं ॥ ८३७ ।।
सा पडिबुद्धा देवी, पासाए नरवइस्स गंतूणं । आइक्खइ तं सुमिणं, सुयजम्मं संसए राया ॥ ८३८ ॥
Jain Education International 2010_04
For Private & Personal Use Only
सिरिपउमप्पहसामिचरियं
www.jainelibrary.org
