________________
ललितांगकुमरकथा
२४९
घणसारसारचंदणकालागुरु-कुसुमपडलहत्थेहिं । वरगंधतिल्लजालियदीवियहत्थेहिं पुरिसेहिं ॥३४८॥ परियरिओ संपत्तो नियकारिय रायलच्छिभवणम्मि । तीसे ण्हवण-विलेवण-पूयणपुव्वं थुणइ एवं ॥३४९॥ लहुया वि हुति गुरुणो जडा य विबुहा पसायओ जीसे । ते भुवणसिद्धकम्मणसरिसं सरिमो सिरि देविं ॥३५०॥ जइया सुतुठुहियया होउं मह देसि नंदणं तइया । भोयण-तंबोल-विहिं देवी सहिओ विहिस्सामि ॥३५१ ॥ इय निच्छयं पयंपिय राया नवदब्भसंथरे थक्को । मन्नतो वि व अप्पं मुक्कं कुससंथरे अं सुयं ॥३५२॥ अह दिणतिगपज्जते रहंगमिहुणाण दिणयरासंकं । जणयंती मणिनिम्मियविमाणउज्जोयनिवहेण ॥३५३।। कमलासणमासीणा पंकेरुहकलियललियभुयदंडा । मयगलजुयलेण तहा कलसकरेणं ण्हविज्जती ॥३५४।। जणपिच्छणिज्जरूवा होउं लच्छी भणेइ सच्छंदं । वरसु वरं निवपुंगव ! तुट्ठा तुह निच्छएणाह ॥३५५।। ललियंगनिवो तत्तो जंपइ तं देवि ! देसु मह तणयं । अह रायलच्छिदेवी सप्परिहासं भणइ एवं ॥३५६॥ जह रयणाण निहाणा मज्झ वसे संति भुवणमज्झत्था । तह जइ पुत्तनिहाणा हवंति तो देमि तुह पुत्तं ॥३५७|| इच्चाइ सपरिहासं जंपित्ता रायलच्छिदेवीए । पुत्तुप्पत्तिनिमित्तं, दिब्रो मुत्तामओ हारो ॥३५८॥ राया वि देविसहिओ, हरसियहियओ करित्तु पारणयं । देवी कंठे हार काउं, अणुहवइ विसयसुहं ॥३५९॥ उत्तमसुरभवणाओ, उत्तमजीवो चवित्तु आउ-खया । लीलावइ देवीए तइया कुच्छिम्मि अवइनो ।।३६०॥
Jain Education International 2010_04
For Private & Personal Use Only
www.jainelibrary.org
