________________
२३६
सिरिपउमप्पहसामिचरियं
एयं तु अहं मन्ने, आसनगिहम्मि अमियनिसंदं । गुरुणो पढंति धम्मं, जीवदयालक्खणं सम्मं ॥१८१॥ सोऊण इमं कुमरो सहसा संवेगवेगहयमोहो । चिंतइ अहो अणप्पं, गुरुवएसाण माहप्पं ॥१८२॥ हा हा अहयं पावो, नियकुलमज्जाय वज्जिओणज्जो। जाओ रसायलमूले, एयं पुरिसत्तणं मज्झ ॥१८३।। नूनं विवेयवंता, एए गुरुवयणगहियपरमत्था । न वि हुंति सारमेया, किंतु अहं सारमेउ त्ति ॥१८४॥ इच्चाइ चिंतिऊणं, संकलबंधाउ मिल्लिउं भणइ । जइ तुज्झे पडिबुद्धा, वच्चह सूरिपासम्मि ॥१८५॥ सव्वे वि सारमेया चलिया पत्ता य सूरिपयमूले । कमरो वि कोउगेणं परिवारजुओ तहिं पत्तो ॥१८६॥ सम्म सम्मत्ताईधम्मं साहिति सूरिणो तस्स । सो वि पयंपइ भयवं, तुमए सह सारमेयाए ॥१८७॥ एयाण मोहसंकलबंधं तह लोहसंकलाबंधं । छिंदित्तु धम्ममग्गो पयासिओ सयलसुहजणओ ॥१८८।। तुह पुरुओ मह सम्म सम्मत्तं होउ तह य निद्दोस । न हणेमि सयं जीवं थूलं संकप्पियं सव्वं ॥१८९।। अइभारसमारोवण-वह-बंधण-भत्त-पाणवुच्छेया । तह चेव छविच्छेओ अइयारा पंच पढमवए ॥१९०॥ इअ अइयारविमुक्कं सह पढमवएण गहिय संमत्तं । कयकिच्चं पिव अप्पं मनंतो सो गओ सगिहं ॥१९१ ।। सव्वे वि सारमेया बंधणमुक्का कुमारपासाए । तेरिच्छ-जाइ-उचियं नियमं कुव्वंति चिटुंता ॥१९२॥ राया विम्हिय-हियओ, विरयं नाऊण जीवघायाओ । जुवरायपए कुमरं ठावइ सम्माणणापुव्वं ॥१९३ ।।
Jain Education International 2010_04
For Private & Personal Use Only
www.jainelibrary.org
