Page Text
________________
मणोरमा-कहा
तिव्वाभिग्गहसंजुत्ता ठाणमोणासणे रया। साहू दहति गच्छे वसंता कम्मकयवरं ॥३४३।।
ता गच्छवासो चेव सोहणो विसेसओ नवजोव्वणाण तुम्हारिसाण ।" पुरंदरेण भणियं--"जइ एवं तो इमम्मि चैव गामासण्णे पव्वए एगागिणा वासारत्तो गमियव्वो" त्ति, भणिऊण निग्गओ। नाऊण निच्छ्यं मोणमासिया सूरिणो।
इओ य तीए चेव पल्लीए सोमिलो नाम माहणो परिवसइ। नम्मया से भारिया, सरस्सई दुहिया। सा पूण रूवेण ओराल-सरीरा पढमजोव्वणा चेव वट्टमाणा विहिवसेण विहविया। विसण्णा जणणि-जणया । अण्णम्मि दिणे भणिया सोमिलेण नम्मया--"पिए ! स्वस्सिणी वच्छा सरस्सई । वियारबहुलं जोवणं । बहुजणाहिलसणीयं च । जओ तारुण्णय तह अंतरिण, अण्णु न भल्ला कोइ। लिंबू वि नव नव कुंपलिहि, ओ खज्जता जोइ ।।३४४॥
‘विणडिय-वासाइ-मणिगणो विसमो विसमसरो। अओ तह कह वि सिक्खवेसु जहा नाणेइ कुलमइलणं ।” 'जमज्जउत्तो आणवेइ' त्ति, भणिऊण उठ्ठिया बंभणी।
अण्णया रहसि भणिया सरस्सई--"पुत्ति ! चितावरो ते पिया ता सीलसंरक्खणे पयत्तेण जइयव्वं । जेण खेयणिज्जण विणा जस्स जंतुणो जाइ जोव्वणं । जोयणं सयल देसाण सहलं तस्स जीवियं ॥३४५।। पसुसाहारणा कामा कामाहारो य जोव्वणं । ता वच्छे ! तह करेज्जसु जह न जायइ लंछणं ।।३४६।।
तीए भणिय-"अंब! भणाहि य मे तायं जहा सीलपरिपालणे महंतो पयत्तो वच्छाए ता न संतप्पियव्वं ताएण"। साहियं नम्मयाए सोमिलस्स, परितुट्ठो सो।
अण्णया गया पओयणवसेण समासण्णगिरिवरं सरस्सई। दिट्ठो य णाए ईओ तओ परियडंतीए गिरिसु गुहामुहासण्णे काउसग्गेण संठिओ छत्तायारमणोरमसिरो, सुसिलिट्ठ-विसिट्ठ-सुप्पइट्ठमीचंदसमाणभालयलो, कुवलयदलदीहलोयणो, सरलसमुन्नयनासावंसरेहिरो, रइमयणहिंदोलयसरिस-सवण-पासजणिय-जणपहरिसो, परिणयबिंबीफलसरिसाहरो, संखसरिसरेहा-तिय-विराइय-कंधरो, पुरवरकवाड-वित्थिंण्णवच्छत्थलो, नगर-परिह-पलंब-बाहु-जुयलो, नवकंकेल्लि-पल्लवायंब-करयलो, छहियझससमाणोदरो पंचाणण-कडियडाणकारिकडियडो, करिवर-कर-सरिसोरु-जुयलो, अणुपुट्विवट्टसंठाणाजंघाजुयलविराइओ, कणय[वण्णसरिस]-कमल-कोमल-चलण-जुयल-जणिय-जण-विम्हओ, रंभारहिओ पुरंदरो ब्व पुरंदरो नाम मुणिवरो।
एत्यंतरे सहसा चेव गहिरं गज्जिओ जलहरो । घणसद्द-सवणाणंतरमेव माणिणा माणगंठिदलणपच्चलो समंतओ तड्डवियसिहामंडलेहिं को कल-केयारवो सिहंडीहिं झलझलिया नयले विज्जुलिया। अणुकूलपवणपणोल्लिओ पसरिओ समंतओ कुडय-कयंब-बउल-नीव-सत्तच्छय-कुसुमाण पउरपुरंदरो व्व परिमलो।
तओ सा वागरावडियकुरंगि व निस्संक विद्धा निसिय-सर-धोरणीए मयरद्धय-लोद्धएण असिक्खिया वि पयट्टा तक्खणा चेव तीए मयणवियारा । पेसेइ वारंवारं पुरंदराणगारं पइ भू-चाव-विमुक्क-कडक्ख-विक्खेव-बाणावलीं। वामहत्थेण सणियं सणियं संजमेइ ईसि ल्हसियं कडिल्लयं। दाहिणकरेणमाणेइ खसंतमुत्तरिज्जयं । पियालिंगणसमूसुअं व पुणोपुणो समूसवेइ बाहु-लया-जुयलं । पवणायतरुकंकेल्लिपल्लवं व दसण-दह्र काऊण पुणो-पुणो ईसिं चलंतं दंसेइ सहावारुणमहरोठें। निन्निमित्तमेव विलिहेइ वामचलणंगुलीहिं धरणीयलं ।
एत्यंतरे तयणुमग्गेण समागयाए--"पुत्ति सरस्सई ! कत्थ तुमं? वेलाइक्कमो वट्टइ। एहि घरं गच्छामो"त्ति, पयंपमाणीए निसुओ सद्दो जणणीए । तओ ईसि लज्जिरमाणसा नेहनियलसंदाणिय व्व, खलंत-पय-संचारा पुणो-पुणो पच्छाहुत्तं पलोइंती वारं-वारं जिभायमाणी गया थेवभूमिभागं । निसण्णा कुसुमिय-कुडवहे?ओ । दिट्ठा खणंतरेण गवेसमाणीए जणणीए मुणियमयण-वियाराए पुच्छिया तीए--"पुत्ति ! निरामयं ते सरीरयं?" सरस्सईए भणियं----"अंब ! जलिय-जलण-जालावली-ठियाणीव डझंति मह अंगाणि। दिसामुढ व्व न याणामि पुवावराइदिसिविभागं । सन्निवायगहिय व्व न तरामि भासिउं। अओ गच्छ तुम अहं पुण सत्य-सरीरा खणंतरेण समागमिस्सामि ।"
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |