Page Text
________________
सम्मत्त-बीय-संभो णाम पढमो अवसरो तत्थ य धनदेवकहाणगे अवियारीनिव-निबुद्धिअमच्चकहा
तओ परिमिय-परिवारेण तुरयमारुहिऊण निरूविओ पायारो। राइणा दिह्र रायपहंतेण विणिग्गयं कोप्परं । कुवियो राया। पुच्छिओ सुत्तहारसामिओ---"अरे ! केणत्थ छज्जयं कयं?" तेण भणियं--'सुंदरेण' । निउत्ता नियपुरिसा महीवइणा--"आणह तं दुरायारं सुत्तहाराहम"। सयं च गंतूण रायमंदिरं निसण्णो अत्थाण-मंडवे। आणिओ बंधिऊण सुंदरो। तयणुमग्गेण समागया सुत्तहारसेणी । समाइट्ठो राइणा दंडवासिओ--"अरे ! एयस्स सुत्तहाराधमस्स कर-जुयलं छिदावेहि।" सुत्तहार-सामिएण भणियं-"देव ! वियारिऊण छिज्जउ?" राइणा भणियं-“को वियारो?" तेण भणियं--"पूच्छिज्जउ ताव एसो।" रण्णा भणियं-"कहेहि कहं ते पायारे कोप्परं कयं?" तेण भणियं-“नत्थेत्थ मह दोसो। दिट्ठा भए विणा कंचुएण उग्घाडुब्भडपओहरा इमं पएसमुवागया अणंगसुंदरी नाम विलासिणी। हरियं तीए मह चित्तं। अओ न नायं ल्हसियं सुत्तं। ता परमत्थेण तीए पायारे कोप्परं कयं।" राइणा भणियं-"जइ एवं तो निरवराहो तुम।" भणिओ दंडवासिओ-"अरे! आणेह तं दुहविलासिणीं।" आणीया, दंसिया राइणो । समागयाओ तयणमग्गेण मिलिऊण विलासिणीओ । भणिओ रण्णा दंडवासिओ--"अरे! इमाए रंडाए सिरं मुंडाविऊण कन्न-नक्के कट्टावेहि।” एत्यंतरे विण्णत्तो राया कामलयाए पहाण-विलासिणीए--“देव ! पुच्छिज्जउ ताव एसा।" पुच्छिया रण्णा--"कीस तुम उग्घाडिया तं पएसं गया ?" तीए भणियं-"रासल-सूइओ एत्थावरज्झइ । समप्पिया मए तस्स सीवणनिमित्तं कंचलिया । दिण्णमग्गसरं दविणजायं। गच्छामि पइदिणं मग्गिया। न उण सो सीवइ । अओ हिंडामि उग्घाडिया।" रण्णा भणियं--"एसा वि निहोसा वराई। आणेह लहं तं सुइयं ।” तहेव आणीओ। समागया सूइयरसेणी पुच्छिआ। भणिओ रण्णा तलवरो-“एयं सूलाए समारोवेहि ।” सुईयर-सामिणा भणियं-“देव ! पुच्छिज्जइ ताव एसो।" रण्णा भणियं-"कहेहि रे! कि न सोविया तए कंचुलिया ?" तेण भणियं-"देव! तुद्रनक्का सूई समप्पिया कालिगतेरमगस्स। दिण्णं पढममेव मोल्लं। न य सो समारेइ। ता को एत्थ मज्झ दोसो?" रण्णा भणियं--"तुम पि सुद्धो।" समाइट्ठो तलवरो--"आणेह तेरमगं।" आणिओ। समागया तेरमग्गसेणी । भणिओ नयरारक्खिओ--"एयं वयरकुट्टणियाए कुट्टेह ।" विण्णत्तो राया तेरमगसेणीसामिएण---"देव ! पुच्छिऊण मारेह । पुच्छिओ रण्णा--"कीस तए न समारिया सूई ?" तेण भणियं--"महाराय ! खवणगो विबंधगो।" रण्णा भणियं-- 'कहं?' तेण भणियं--"समप्पिया मह घडणनिमित्तं तिविडिया। सो पुण परघरभोयणसुत्थिओ पभाए चेव आगंतूण आगरणं रुंभेइ। न देइ मह अण्णकम्मतराणि काउं! तो को मम दोसो ?" रण्णा भणियं--"विगयवयणिज्जो तुमंपि गच्छसु नियघरं।" आणाविओ खवणगो। दुवारे धरिऊण पुच्छिओ राया--"देव ! को एत्थ दंडो ?" रण्णा भणियं-- मारेहि केणइ कुमारणेण ।" गहिऊण खवणयं निग्गओ दंडवासिओ । नत्थि कोइ तत्ति करितओ । तेण सविसायं पढियं दियंबरेण-- पहुं गुणहुं न कुसंगु करहुं कुसंग करंतुह वारितु न खुट्टहुं। ईवइ मित्तवसंतलोइ दुज्जणहं न छुट्टहं ।। निप्पक्खहं पडिवक्खु एहु सव्वत्तं आहाणउ । जसु रोवु न अत्थि कोइ सो मारहु खवणउ ॥३२६।। ता महाराय ! जहा सो खमणओ निप्पक्खो वियारं पि न लहइ एवमेसा वि वराई।"
तओ सद्दाविओ राइणा मणोरहसेट्ठी । साहिओ उवरोहियसंतिओ समुल्लाबो। सेट्टिणा भणियं-"सोहेउ राया ससुएण सेट्ठिणा।" रण्णा भणियं--"को एस ?" सेट्ठिणा भणियं--"सो एस तक्करो जेण साभरण-सुवण्णलक्ख-सहिया कुबेरदत्ता हरिया।" ईसि पहसिओ राया । विवण्णवयणा जाया उवरोहिय-माहवा। सेट्ठिणा भणियं-"देव! कीरउ संपयं सुद्धी। तहे[व] कया फालेण सुद्धी। 'सेट्ठी सुद्धो' त्ति समुट्ठिओ जयारवो । 'खुद्दो' त्ति, काऊण कयसव्वस्स हरणो ससुओ निव्विसओ समाणत्तो राइणा उवरोहिओ। वरवत्थाहरणाईहिं संपूइऊण विसज्जिओ मणोरहसेट्ठी । छिण्णकण्ण-नासा निद्धाडिया नयराओ वि बाइया। सेट्ठिणा वि कारावियं महया विच्छड्डेण वद्धावणयं । पयट्टावियाओ जिणाययणेसु अट्ठाहिया महिमाओ।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |