Page Text
________________
सम्मत्त-बीय-लंभो णाम पढमो अवसरो तत्थ य धणदेवकहाणगे मणोरहदत्तकहा
करिक रसमाणजंघा कुम्मुण्णय-चलण-जुयल-रमणीया। कंकैल्लिपल्लवोवमाणपायंगुलिमणहरा सुहया ।३१८। गयवइगमणा वाला अहिण[व]विलसंतजोव्वणारंभा । सयलजणसवणसुहयरवसंत-कलकंठि-कंठा य ।३१९। मयण-विहीणा व रई, संकर परिवज्जिया व गिरितणया। लच्छि व्व विणा हरिणा हरइ मणं जा मुणीणं पि।। इय केत्तिउ वि कहिओ लेसुद्देसेण तीय गुण-नियरो। पडिपुण्णं मित्त ! पुणो को किर तं वन्निउं तरइ ॥३२१।। सो धण्णो एत्य जुआ, तुट्ठो मयरद्धओ धुवं तस्स । जो तीए बालीए करिस्सए पाणिगहणं तु ॥३२२।। दूरट्ठिएण दिट्ठा तह वि मणं मज्झ हरिय सा नट्ठा। संकप्पेण मए वि हु रमिया आलिंगिया य पिया॥३२३।।
मणोरहदत्तेण भणियं-वयंस सुलोयण ! [कि सच्चं वयसि?] तओ सुलोयणेण भणियंरायहंस-गयगामिणि कुवलयदलनयणि । अमिय-महुर-मिउ-भासिणि कुम्मुन्नयचलणि । बहु लायण्ण-सुवण्ण-वण्ण एक्कसि मई दिट्ठी । पर सव्वंगिहिं मित्त मुद्ध महु हियइ पइट्ठी॥ मित्त ! किं बहुयई भणियइ, जुवमण-चोरणइं । अमियसरिच्छइंदअच्छई सोक्खह कारणइं। जम्मु वि ताहं निरत्थउ अहलई लोयणइं । जेहिं न दिट्ठई ललियइं तसु मण-मोहणइं ।।३२४॥
अमरसुंदरेण भणियं-"वयंस सुलोयण ! विरमसु संपयं जहा जहा बहुवण्णेसि तुमं तहा अम्हाण वि मणो बुलइ ।" एवं सुणिय दिण्ण-समताल-पडिसद्द-भरिय-काणणंतरं अट्टहास-पुरस्सरं पहसिया सव्वे वि वयंसया । मणोरहदत्तण भणियं-“अहो महंतमच्छरियं कहं मणुय-मज्झि पायाल-कण्णयागमो कीडा-करणं वा ?" अमरसंदरेण भणियं''सत्थवाहपुत्ता ! जइ ते कुतूहलं ता गंतूण निरूविज्जउ ।” मणोरहदत्तेण भणियं-“एवं करेम्ह ।" तओ पच्छन्नमेव भणिओ सुलोयणो अमरसुंदरेण-"गच्छ तुम लहं चेव गहियसंबंधं करेहि अणंगलोलं इमं च भणेहि-'संपन्नं ते समीहियं । परं तहा तए कायव्वं जहा एगागी चेव मणोरहदत्तो कुबेरदत्ता समीवे समल्लियइ' । गओ सुलोयणो कयं जहाइटठं । खणंतरेण पत्तो सवयंसो मणोरहदत्तो तं पएसं । अब्भुट्ठिओ ससंभमाए अणंगलोलाए । निविट्ठा सव्वेवि दिण्णासणेस। कयं चलण-पक्खालणं । तओ अमुणिय-परमत्थाए इव जंपियं अणंगलोलाए-"किं भे समागमण-कारणं ?" अमरसुंदरेण भणियं-“अत्थि ते धवलहरोवरिमभूमियाए पायाल-कण्णया ?" तीए भणियं-'आम' । अमरसुंदरेण भणियं-"कह अम्हेहि सा दट्टव्वा ?" तीए भणियं-"न बहु-जण-दसणं सा सहइ । जो तुम्हाणं अच्चतं कोउहली सो एगो पेक्खउ ।" अमरसुंदरेण भणियं-“जइ एवं तो मणोरहदत्तेण दट्ठव्वा ।" तीए भणियं-“एवं भवउ।" ..., पयट्टो मणोरहदत्तो पुरओ अणंगलोला-पदंसिज्जमाणमग्गो पत्तो धवलहरोवरिमभूमियाए । ठिया अणंग-लोला
अप्पणा दुवारदेसे । दिट्ठा मणोरहदत्तेण कुबेरदत्ता । तीए वि सो । दंसणाणंतरमेव मोत्तूण पवरपल्लंक ससंभममन्भुटुयंती भणिया मणोरहदत्तेण-"सुंदरि ! अलमिमिणा अणुचिओवयारेण ।" तीए भणियं-"कहमणुचिओ?" तेण भणियं-"तुमं पायाल-कण्णगा । अहं पुण भूमि-गोयरो ।" तीए भणियं-"कहमेयं तए नायं ?" तेण भणियं"वयंसएहिं तुह जणणीए य मे कहियं ।" तीए भणियं-वयणमेयं । अहं पि भूमिगोयरा चेव । अओ मोत्तूण संकं उवविससू एत्थेव पल्लंके ।" तहेव कयं । ठियाणि खणमेत्तं संकहाए परोप्परं । वियंभिओ निब्भरो जम्मतराणुभावेण सिणेहाणुबंधो । वेलाइक्कमसंकिरहिं सपरिहासं भणिया अणंगलोला वयंसएहि-"अम्मो ! न सोहणमिणं जं चिरं देव-मणुयाण संगमो ? गंतूण भणाहि"-'सत्थवाहपुत्त ! तुमं ताव देवया-दंसणमणुहवंतो चिट्ठसि, अम्हाण पुण विणोयरहियाण नत्थेत्थ रई, भण किं करेमो ?' । गया अणंगलोला गहियपडिवयणा सिग्घमेव समागया भणिया मणोरहदत्तवयणेण वयंसया- “गच्छह तब्भे मह पूण अज्ज वि विलंबो भविस्सइ ।” गया ते निय-नियठाणेसू । भोयणवेलाए कया सेट्रिणा सारा । न दिठो मणोरहदत्तो । पुच्छिओ परियणो । तेण भणियं-"सवयंसो पभाए चेव उज्जाणं गओ एत्तियं चेव वियाणामो।" तओ सहिया वयंसया, पूच्छिया य । साहिओ तेहिं सव्वो वि अणंगलोलाघरपवेसावसाणो वइयरो। परितुट्ठो सेट्ठी । विसज्जिया वयंसया । कहिओ एस वुत्तंतो परिणीए । समाणंदियमाणसाए भणिओ तीए सेट्ठी-"अज्ज उत्त!
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |