Page Text
________________
सम्मत्त-बीय-भो णाम पढमो अवसरो तत्थ य धणदेवकहाणयं
४५
ता [जा]वत्थि बलं जावत्थि वित्थरो जा न एइ वुड्डत्तं । वयणकरा जाव जणा, ताव पमायं पमोत्तण ।।२३१।। नीसेस-जंतुसुहयं, जीव-दया-सव्व-सोय-संजुत्तं । जिणयंदविंद-भणियं, सुद्धं धम्म समायरह ।।२३२॥
एयं सोऊण संजाय-चरण-परिणामेण भणियं-"अरिहदेव [पसा]एण भयवं ! संसार-भ[उव्विग्गो पव्वयामि अहं देवाणुप्पियाणं अंतिए ।” सूरिणा भणियं--"धण्णो तुमं जो बहु-दुह-पलित्त-पलिवणाओ सार-भंडभूयं नियजीयं नित्थारेसि।"
एत्थंतरे भणियं नाहियवाइणा कविजल-माहणेण "अहो ! समइ-संकप्पियसत्थवित्थरेहि अलिय-पंडिएहि धम्मच्छलेण मुद्ध-लोगो वंचिज्जइ । अण्णाय-परमत्थेहि य तव-करण-बंभचेराइणा किलेसिज्जइ । केण दिठो पंचभयाइरित्तो जीवो? जओ-"असंता चेयणा भूय-समवाए उप्पज्जइ जहा जलानल-कट्ठ-पिट्ठ-संजोगे मदिराए मय-सत्ती. जया भयाणि विजज्जति तया चेयणं पि विजज्जइ ।' एवं च निच्छओ, भूआइरित्तो न कोइ जीवो। तया भावेण न पूण्ण-पावाई। अओ जं विलसिज्जइ सो लाहो । जं पुण बंभचेर-तवकरणाडणा भुयाणि सोसिज्जति सा बचणा।" सरिणा भणियं-"सोम ! जीवाभावे, सोहं जेण समईय-संवच्छरे एवं कयं, वट्टमाणे करेमि, भविस्से करिस्सामिएवंविहो तिकाल-विसयाभिण्णाणसंधाण-पच्चओ कस्स हबउ । तम्हा अणुमाण-गेज्झो आया छउमत्थाण । पच्चक्खेण पुण सिद्धा केवलिणो य पासंति। जइ पुण जं जं विसेस-विण्णाण-विरहिया पायय-पुरिसा तुम्हारिसा न पेच्छंति, तं नत्थि त्ति ववहरिज्जइ तो तए नियजणणि-जणयविवाहो न दिट्ठो, नियपूट्टि पि न पेच्छसि, कूडाइतिरोहिय-विविहवत्थुवित्थर पि न याणसि, न य ताणि न संति ? तम्हा जीव-सता पुण्ण-पावाणि पुण छउमत्थेहिं वि फलओ पच्चक्खेणं चेव लक्खिज्जति। जओएगे नाणा-मणि-खचिय-कणय-मुत्ताहाल भडाहरणा । विज्जाहर व्व वियरंति, जणियजण-विम्हया लोया [अण्णाण कंपणिज्जा, कुकम्मकरणुज्जुया कुनेवत्था । ईसरजणाण हिंडंति, चाडुकम्माणि कुव्वंता ।२३४। एगाण समाएसो छणभूओ मण्णए जणो सयलो । अण्णाण भणंताण वि को वि [न] पच्चुत्तरं देइ ।२३५॥ एगे पूरिति मणोरहाइं सुहि-सयण-बंधुवग्गस्स । अण्ण ण पुणो दुभरं नियं पि उयरं किमण्णण ? ।२३६। एगे गइंद-सयसंदण-जंपाण-जाण-तुरएहिं । वच्चंति सुकयपुण्णा, अण्णे अणुवाहणा पुरओ। एगे चंदण-मयणाहि घुसिण-पंकंकिया परियडंति । अण्णे मसि-निम्मिय-टिक्कयं पि मण्णंति छणभूयं ।२३८ । एगाण वित्थरिज्जइ सिप्पी-कच्चोलथाल-संघाओ । अण्णाण कहव दुक्खेण पत्त-पुडियावि संपडइ ।।२३९।। एगाण भक्ख-भोयण-विजण-रस-जुत्त-विविह-आहारो। अण्णाण नेह-रहियं हिज्जइ जरदड्ढ-वल्ल रयं ।२४०। तंबोलेला-जाईफलेहिं एगाण होइ मुह-सुद्धी । अण्णाण पुणो जइ कहवि खइर-खंडं पि संपडइ ।।२४१।। एगे पढ़ेसुय-देवदूस-बरवत्थ-सुकय-नेवत्था । अण्णे उ सिण्ण-सडियजरदंडी-खंडयाउरणा ॥२४२।। एगेहिं सा [नि]निज्जइ सुवण्ण-मणि-रयण-चारु-सयहिं । भूमीतलम्मि अण्णे हिं, धूलि-भसलियंगेहि । सेज्जं मुयंति एगे थुइ-मंगल-वीण-विविह वज्जेहि। अण्णे साहिक्खेवं खर-निठुर-दुट्ठवयणेहि ।२४४। इय पुण्णापुण्णफलं पच्चक्खं चेव दीसइ जीयाण। ता सुपसिद्धा सत्ता संति य इह पुण्ण-पावाण ।।२४५।।
__तओ संजाया जीव-पुण्ण-पावाण पडिवत्ती कविजलस्स । भावसारं वंदिऊण भणिओ तेण गुरु-"भयवं ! एयमेयं । परिचत्तो नाहियवाओ । भणसु संपयं जं करेमि ।" सूरिणा भणियं"सुन्दर ! भीम-भवण्णव-निवडिय-सत्ताण तारण-समत्थं । जिण-निज्जामग-कलिय, गिण्हसु सद्धम्म-बोहित्थं ।। धम्मो नराण माया, पिया य धम्मो सुही य बंधू य । भाया भइणी सुण्हा पुत्तो दुहिया य धरिणी य ।।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |