Page Text
________________
४२
मणोरमा-कहा
सुलक्खणण भणिअं-दीहदंसी पसंसणिज्जो। जहा मइसागरो मंती।" कुमारेण भणियं-"मित्त ! को एस मइसा[ग]रो?" सुलक्खणेण भणियं-सुण, मइसागरदिट्टतो
अत्थि वंगाविसयसारा मुत्तिवई नाम नगरी तीए इत्थि-लोलुओ रयणसेहरो राया । संपिडियं तेण पभूयमंतेउरं । ठावियं तरुण-मज्झिमड्ढि -विभागेण । निरूविया पत्तेयं महल्लया। दंसिति ते पासायमारुहंतस्स राइणो पढमभमीयाए तरुणं, बीयाए मज्झिमं, तइयाए वुड्ढं । तओ राया जत्थे व दिट्ठी अभिरमइ तं चेव अभिरमइ। एवं वच्चंति वासरा।
अण्णया दिट्टा राइणा रिउ-ण्हाया नियवग्ग-विच्छोहिया हरणि व्व एगागिणी महल्लएण सह एगा तरुणी । निरूविया सूइरं । संजायाणरागेण पूच्छिओ समासन्नपुरिसो---"का एसा? किं वा एगागिणी?" पुरिसेण "सिंधुसेण-राइणो दुहिया कणयसंदरी नाम। देवपाएहिं महा-रयणेण परिणीया। एगागिणी जेण कारणेण तं महल्लओ वियाणइ।" पुच्छिओ राइणा कंचुई। तेण भणियं--"देव ! दोहग्ग-दूसिया परिणयणाणंतरमेव देवेण अंतेउराओ वि बाहिं कारिया। अज्ज पुण रिउण्हाया समुप्पण्ण-कारुण्णे मए एगागिणी चेव देव-दंसणगोयरे धरिया।" राइणा भणियं"अज्ज तए पओससमए समागंतूण पुप्फ-तंबोल-विलेवणाइ-परिभोगो गहेयव्वो। 'महापसाओ' त्ति, पडिच्छ्यिरायसासणं गओ कंचुई। [पओस]समए समागंतूण गहियं पुप्फाइयं । समप्पियं कणयसुंदरीए । भणिया य--"वच्छे ! सुपसन्नो अज्ज ते महाराओ। पउणीकरेहि वासभवणं ।” सा वि तं सुणियहरिसिय-माणसा कयमज्जणाइ-कज्जा, बरवत्थाहरणाइ-विभूसिया, वास-भवण-दुवार-दिण्ण-पुण्णकलसा, निबद्धचंदणमाला पउणा संवत्ता । समागओ राया । पविट्ठो वास-भवणं । विहियविविहोवयारो निसण्णो पल्लंके । कणयसुंदरी वि अणवरय-पवेस-निग्गमे कुणमाणी भणिया राइणा-“पिए ! अउव्वो कोइ एस-उवयारो।" तीए भणियं-"अज्जउत्त! दुविहविनयाओ कयरं विनयं पउंजामि ? एवंविचिताए समाउल मे माणसं ।" राइणा भणियं-"कहं दुविहो विणओ?" तीए भणियं--'वियड्ढजणजोग्गो, इयरजणसमुचिओ य। जइ पढमं पउंजामि तो असिक्खिय-पंडिया दुटुसीला एसत्ति, अज्जउत्तो मन्नेइ । अह बीयं पउंजामि तो गामीणा कलिज्जामि।" इसि
जंपियं राइणा--सुनिरूवियकारिए पढम पउंजाहि ।' पउत्तो तीए । रंजिओ राया। उचिय-समये गओ नियमंदिरं। नवण्णो पवर-पल्लंके। चितिउं च पउत्तो-'कहं न नाम पोढंगण व्व वियडढावियविणय-कसला एसा। नण खंड-सीला संभाविज्जइ। हा! मए वि रमियं । रमतेण अप्पा चेव लहुइओ। एवं विगप्पयंतस्स राइणा समुद्दीविओ कोवानलो। भणिओ एगते मंती-“एवं खंडिय-सील कणयसुदरि खड्डाऊरियं करेहि।" 'तह'त्ति पडिवज्जिऊण निग्गओ मंती । गओ कणयसुंदरि-मंदिरे । साहिओ एस वृत्तंत्तो । तीए भणियं-"करेहि रायसासणं । को दोसो आएसकारिणो जणस्स ?" गहिऊण खडियं लिहिया वास-भवण-दुवारदेसे तीए गाहासंकप्पियदोसवसा पिययम ममं वि . . . . । होही पच्छायावो अकज्जमेयं कुणंतस्स ।।२२० ।।
नीया मंतिणा नियमंदिरे । पच्छण्णदेसे धरिऊण दीहं मंतिउमारद्धो मंती--"न ताव इमीए तहाविहो को वि दोसो दीसइ सावेसो य समाएसो नरवइणो । ता एयमेत्थपत्तकालं, जमेसा पच्छण्णा चेव चिट्ठउ । जइ राइणो तहेव पवड्ढमाणो कोवाणुबंधो भविस्सइ तो जहाइटें करिस्सामि। अह वलियचित्तो इमीए कज्जं करिस्सइ तो एवमेव समप्पिस्सामि।" एवं दीहं मंतिऊण धरिया तेण कणयसुंदरी। वच्चंति दिणाणि । - इओ य तम्मि चेव नयरे लोगववहार-कूसलो पच्छिम-वए वद्रमाणो, धण-धणदत्त-धणमित्त-धणचंदाभिहाणाणं चउण्हं पुत्ताणं पिया धणगुत्तो सेट्ठी, जराजज्जरिय-काओ सूलाइ-तिब्व-रोगाभिभूओ पाण-संसए वट्टइ । मिलिया सुहिसयणा । भणिओ तेहिं सेट्ठी-धरमाणो चेव तहा करेहि जहा पुत्ताणं पच्छा विरोहो न हवइ" । तेण भणियं--"तुम्ह 'साहेज्जेणं एयं सिज्झइ !' तेहिं भणियं-'सहाया वयमेत्थ पओयणे ।'सेट्ठिणा भणियं-जइ तो संति णे चउसु वि कोणेसु मंदिरस्स चत्तारि कलसा । किज्जंतु पत्तेयं धणाइनामंकिया। जस्स जत्थ नामयं सो चेव तेण लेयव्वो । विसंवाए
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |