Page Text
________________
सम्मत्त-बीय-लंभो णाम पढमो अवसरो तत्थ य धनदेवकहाणगे अणक्ख-बहुलकहा
तीए भणियं--"अणक्ख-निबंधणा, जओ तुमं परिहरियसयलघरवावारो कय-करयलंजली जगणीए पुरओ [किकरमिव] 'कि करेमि' ति, भणंतो चिद्रसि । कि तज्झ चेव एक्कस्स जणणी? अण्णो जगो नहयलाओ निवडिओ? इमेहि अणक्खएहिं जलिय-जलण-निवडियमिव दज्झइ मे] सरीरं, पणट्ठा निद्दा, न रोयइ भोयगं, बाढं बाहइ सिरोवेयणा।" नागदत्तेण भणियं--"पिए ! पराणक्खेहि अत्ताणयं कयत्थेमाणी अणक्खबहुल-कुलालमणुकरेसि ।" तीए भणियं"को एत्थ अणक्खबहुलो?" नागदत्तेण भणिअं--"सुणेहि।" अणवखबहुलकुम्भकारकहा:
___ अत्थि सयलमहीवलय-तिलय-भूयं कुसुमोक्केर-गंध-लुद्ध-मिलितालि-वलय-रुणुरुणारव-संगिज्जमाणगुणगणं कुसुमपुरं नाम नयरं। तम्मि कुंभप्पिओ नाम पयावई परिवसइ। सो पुण जइ केणावि अघडमाणयं पयंपिज्जतं निसामेइ तो अगक्ख-भर-भरिय-माणसो[ठि]क्करीहिं नियसिरं चूरेइ । कयं लोहिं 'अणक्खबहुलों' त्ति गुणनिप्फण्णं नाम । तं चेव पसिद्धिं गयं । तस्स य घरे विसाला [कुंभसाला] । वसंति तीए नाणादेसागया कप्पडिय-तडियादओ। जंपति मिलिया रयणीएअघडमाण-ठिक्कर-सयाणि य अणक्ख-वस-विगय-निद्दो । कयत्थेइ अणक्ख-बहुलो नियसिरं खलंकाहिं।२१२।
बहवण्णंकियं दद्रुण जणयं भणियं तणएहि-"ताय ! तुह घरे चेव अणक्खाण अंतो नत्थि, विसेसओ नयरमझेतिओ] जइ अणक्खपरिहारेण पओयणं ता अडवीए घरं करेसु "। पडिवण्णं तेण । गया तणयाए [सह] कतार-मज्झ-संठिय-पव्वयतल-संठियं सच्छ-सलिल-परिपूरियं एगं सरसियं । कयं तयासन्ने कूडीरयं । खाणियं आवाह-(अवड)-दुगं । निरय-संबलं मोत्तुण तत्थ जणयं समागया तणया [नयरं] । सो वि सरसी-कदम लाणि काउमाढत्तो। सुया वि समये समागंतूण [गहिऊण] कुलालाणि नगरे विक्किणंति । एवं वच्चइ कालो।
अण्णया मिगयाए निग्गओ महाकतारमणुपविट्ठो राया । निट्टियं सलिलं । पिवासिओ पुच्छइ समासन्नपुरिसे "अत्थेत्थ जलसंभवो?" तेण भणियं--"अतिथ इओ समासन्ना सरसी तहिं वच्चम्ह।" गया। द?ण रायाणं ससंभममन्भट्रिओ कुलालो। दिण्णमासणं। निसण्णो राया। आणीओ सच्छ-सीयल-सलिल-पडिपूण्णो पच्चग्ग-करवओ। पीयं पयं पयावइणा । जाओ समासत्थ-माणसो । परितुट्ठो कुलालस्स पुच्छिओ सिनेहसारं--"भह ! कि निमित्तं एगागी रणे निवससि ?" तेण भणियं--"अणक्खवयणसवणपरिहरणट्ठा ।" रण्णा भणियं-"जइ एवं ता एहि मए सद्धिं । नगरं पविसम्ह । तहाहं करिस्सामि जहा न को वि अणक्खे समुल्लवेइ।" तेण भणियं--'एवं हवउ ।' चलिओ नयराभिमुहं । नगरसमासण्णे दिट्ठा राइणा सागराभिहाणस्स वणिणो धूया खक्खा नाम कक्कंधु-फलाणि वीणयंती। पुच्छिओ रण्णा अमच्चो--"का एसा? कस्स वा सुया?" साहिओ सव्वो वि मंतिगा वुत्तंतो। पविट्ठा नयरं। धरिओ कुंभारो नियमंदिरे चेव पुहइपालेण । घोसावियं पुरवरे पडहएण-"जो अवडमाणयं पयंपिस्सइ तं राया दंडेण दंडिस्सइ।" एवं वच्चइ कालो।
अण्णम्मि दिण मुणियनरवईणो मणोगय-भावेण वरिया सा दुग्गय-कण्णगा रणो निमितममच्चेण । परिणीया संखेवेण। पक्खित्ता अंतेउरे । पुव्व-कय-सुकयाणुभावेण जाओ तदुवरि पणओ नरवइस्स । पत्ता पट्टमहादेविपयं । पवड्ढमाणपणएण राइणा सह विसय-सुहमणुहवंती कालं गमेइ।
अण्णया य तरुण-जण-मण-मोहणे, कल-कोइलालावपूरिय-भवणोदरे, विसट्ट-कंदो-रय-रेणु-रंजिय-सयलदियंतरे, सत्तच्छय-सुरहि-कुसुम-बहलपरिमलायड्ढिय-भमिर-भमरावलि-भंकार-मणहरे, सुरमंदिर-दीसंत-नाणा-विह-जत्ता-महसवे, पमुइय-जण-कोलाहलेण समंतओ वसंते वसंते समागए, निग्गच्छंतिसु म[य]मत्त-तरुण-तरनारि-चच्चरीसु, वियसियपलास-कुसुमच्छलेण रागं व उग्गि (गी)रंते जीवलोए, उज्जाण-सिरि-दसणत्थं समं खक्खमहादेवीए अणक्खबहुलेण य पत्थिओ पत्थिओ। निग्गच्छंतेण य दिट्ठा अकाल-फल-भर-भार-भज्जमाणसाहा-संचया एगा बोरी । पुच्छिया य रण्णा समासंण्णवत्तिणी खक्खामहादेवी-"पिए को एस पायवो ? किमभिहाणाणि एयस्स फलाणि।" सुइरं निरूविऊण
___JainEducation International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |