Page Text
________________
सम्मत्त-बीय-लभो णाम पढमो अवसरो तत्थ य धनदेव-गुणवईण पुव्वजम्मवुत्तंतो
७.
करयले निवेसिया सयणिज्जे। पूच्छिया य "पिए! कि कारणं असमंजसं रोइज्जइ ? कत्थ वा पत्थिया?" गुणवईए भणियं-"अज्जउत्त ! दिवो तुमं सुमिणयम्मि विणयवईपाणिग्गहणं कुणमाणो, तेण परुण्णागमण-कारणं, पुण मरणज्झवसाओ।" जओ“दुक्खेण लब्भइ पियो, लद्धो दुखेण होइ अणुकूलो । लद्धो वि अलद्धो च्चिय बहु साहीणो मुणेथव्वो ।।१६१।।
__मए भणियं-"सुंदरि ! अलमणिट्ठांचे]ट्ठाए ?" गुणवईए भणियं-“एवं विहाणि चेव इत्थीणं हिययाणि भवंति।" मए चितियं-"जइ कहवि विनयवई परिणमि वा निच्छयं मरइ एसा।" तओ मए भणियं-"पि आजम्मं चेव तुमं मोत्तण अहं बंभयारी। एस मे नियमो।" एवं सूणिऊण पमुइय-माणसा जाया गुणवई। पडिसिद्धो धणदत्तसेट्ठी उवलद्धममाभिप्पाएण ताएण। निसुओ एस वइयरो विणयवईए । समुप्पण्ण-महामणो-दुक्खा अत्ताणयमुब्बंधिऊण रयणीए मया। जाओ नयरम्मि हाहारवो। पुच्छिओ हं सद्दाविऊण राइणा-“सत्थवाहपुत्त ! किं न तए परिणीया एसा?" कहिओ मए गुणवइ-वइयरो । तओ मोणमासिओ राया। दाऊण तंबोलं विसज्जिओहं । गओ सभवणं। विसय-सुहमणुहवंतस्स वच्चइ कालो।
___अण्णया अणेग-साहुजण-परिवुडो गामाणुगामं विहरंतो संपत्तो तत्थ खेमंकरो नाम आयरिओ। समोसरिओ मणोरमज्जाणे। निग्गया वंदणनिमित्तं नागरया । अहं पि तिपयाहिणी काऊण वंदिउं भयवं निसण्णो उचिय-दाणे। पारद्धा भगवया धम्मदेसगा। पडिबुद्धा बहवे पाणिणो। पडिवण्णो जहाजोग्गं सम्मत्ताइयं धम्म । तओ अवसर लहिऊण पूच्छिओ मए खेमंकरसूरि, “भयवं! किं कारणं निविड-
सिहा मइ पिययमा अहं पि तीए ?" भगवया भणियं'सोम ! सुण" धनदेवगुणवइपुव्वजम्मवुत्तंतो
अत्थि इहेव जंबुद्दीवे भारहे वासे रोहणगिरीगुणरयणाणं रयणायरो सुकवि-कव्वामयस्स, कुलहरं तिहुयणसिरिकण्णयाए, पभवो सयलभोगाणं, केलास-पव्व[ओ व्व] महेसर-जणाहिट्रिओ, नीसेस-देस-चूडामणी 'अंगा' नाम जणवओ। तम्मि य नयर-गणगणोवेयं सिरिउरं नाम नयरं। तत्थ पणमंताणेग-सामंत-मोलि-माला-महिय-पायवीढो, अणुवम-रूवसोहग्गाइन्गुणगणालंकिओ, तिविक्कमो व्व असम-परक्कमो विक्कमसारो नाम राया । रइ व्व मयर-के उणो परम-रइकारणं रई नाम से महादेवी। तीसे अच्चंत-वल्लहा रइसंदरी नाम दुहिया। परिणीया रयणसेहररायउत्तण रयणसंदरेण । तम्मि चेव दिवसे वासभवण-पसुत्तो डक्को सो कुसुम-गंध-लुद्ध-भुयंगमेण। उट्रिओ संभंत-चित्तो सयणिज्जाओ। तयाणुगा रइसुंदरीए पुच्छिओ तीए--"अज्जउत्त! किमेवं समाउलो ?" कहिओ तेण सप्प-वइयरो । कओ णाए कोलाहलो। मिलिया दो वि राय-वग्गा। समाया गारुडिया। पउत्ता णाणाविहा मंत-तंता। काराविओ वमण-विरेयणाणि । न जाओ को वि गुणो। पेच्छंताणं चेव उवरओ। उढिओ अक्कंद-सद्दो । रइसुंदरी वि रयणसुंदरमणुसरंती धारिया कहकहवि जणणि-जणएहि, भणिया य,-"वच्छे ! बाला तुम अदिविसय-सुहा चेव विहिणा विडं कुसलाणुटुाणं, जेण जम्मतरे वि नेवं दुक्खाण भायणं भवसि ।" रयणसेहरेण वि एवं चेव भणियं । पडिवण्णमेईए। गओ सनगरं रयणसेहरो। भणिओ विक्कमसारेण भंडारिओ “जं मग्गेइ रयणसुंदरी तं तए दायव्वं ।" "तुमं पि वच्छे ! करेसु देव-गुरु-पाय-पूयण', आसेवसु जहासत्तीए तवो-कम्मं । पारणग-दिणे भोयावेसु परिव्वायगे।" तहेव कुणमाणीए गच्छंति दिणाणि रइसुंदरीए।
. अत्थि य तत्थ अणेगमंत-तंत-तीयाणागय-निमित्त-वियाणगो, अणेगाणं नरनारिगणाणं सेवणिज्जो 'नाणगब्भो' नाम परिव्वायओ। करेइ [पइ]दिणं तस्स सुस्सूसणं। पइदिणमालाव-संलावेहि. अईवरुढिमागओ सिणेहाणुबंधो । जओ-- सविलासा ससिणेहा, कडक्ख-विक्खेव-गब्भिणा धणियं । कस्स न हरंति हिययं, मणोरमा मम्मुणुल्लावा ।१६२। ते धण्णा ते सूरा, पुणो-पुणो ताण चेव नमिमो हं । जे महिला-यण-मणहर-संगेण न गंजिया पुरिसा ।।१६३।।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |