Page Text
________________
सम्मत्त-बीय-लंभो णाम पढमो अवसरो तत्थ य धणदेवकहाणयं
संवा हिया सिरोहराए, वीजिया वत्थंचलेण, दिणयर[क]रकरंबियं व कमलं उम्मीलियं तीए लोयण-जुयलं । संजाया पयडचेयणा। पुच्छिया मए चित्तण्णुया,-"सुंदरि ! का एसा सरय-ससि-जोण्ह व्व दिट्ठा वि जणमणाणंदकारिणी कि निमित्तं वा मरणमज्झवसिया ? साहेउ मे सुंदरी महन्तं मे कोऊहलं ।” चित्तण्णुयाए भणियं---"महाभाग ! सुणसु,"
"अत्थि एत्थेव नयरे नियकुल-नहयल-चंदो धणचंदो नाम सेट्टी। धणावहा से भारिया। ताणं बहूण पुत्तभंडाणमुवरि एसा एगा दुहिया जाया । पइट्ठावियं मासावसाणे 'गुणवइ' त्ति, गुणनिप्फण्णं नामं । कमेण पवड्ढमाणा पत्ता तरुण-जण-मोहणं जोव्वणं । अण्णया य मयणतेरसीए पूइऊण कामदेवं नयराभिमुहं पडिनियत्ताए अंतरा चेव दिट्ठो धणसारसेट्ठिसुओ धनदेवो । सो पुण पयड-तक्करो ब्व सहियण-मज्झाओ वि गओ हरिऊण हिययमिमीए । तम्मि दढं वद्धाणुरागा एसा, अमुणिय-परमत्थाए जणणीए दिण्णा नियसहोयर-चंदसेहरमित्तस्स अमरकेऊणो पुत्तस्स चंदजसस्स । कओ अज्ज वरणय-महूसवो । पुच्छ्यिाहमिमीए--“चित्तण्णुए ! किं निमित्तं तायघरे महूसवो दीसइ ?" मए भणियं"दिण्णा तुमं अमरकेउपुत्तस्स चंदजसस्स।"
तओ एसा परसु-छिण्ण व्व चंपयलया सव्वंगेहि निस्सहा पडिया धरणीयले । कहकह वि लद्ध-चेयगाए जंपियमणाए “चित्तन्नए ! सज्जं करेहि सयणिज्जयं, दहइ दाहो मे सरीरयं, संपाडियं मए इमीए सासणं । नुवण्णाए साहिओ एस वइयरो जणणीए। समागया सा सिग्घमेव, निरूवियं इमाए सरीरयं, दिट्ठ सत्थावत्थं । पुच्छिया--"पुत्ति! किं ते वाहइ ?" तीए भणियं - अवजलिय-जलणजालावलीठियं व संतप्पइ मे सरीरयं । एयं सुणिय पुच्छ्यिा हं धणावहाए-“चित्तण्णुए ! नियछाय व्व सया सहवत्तिणी तुमं वच्छाए, ता न कत्थइ पुरिस-विसेसे बद्धाणुरागा एसा?" मए भणियं--"धणेसरसिट्रिसूए धणदेवे ।" एयं सोऊण सकोवमिव समीवमागंतूण जंपियमंबाए---"हला, गुणवइ! कि कारणं तुम अज्जेव वरिया अज्जवव्बरिया ?" पडिभणियमिमीए-"देव्वमेत्थ पुच्छियव्वं ?" | 'चित्तन्नए सविसेसं सन्निहिया हवेज्जस' त्ति, ममं तज्जिऊण गया जगणी । अत्थमिओ दिणयरो, बोलीणो पढमपहरो रयणीए पसुत्ताहं अलिय-निदाए, उट्ठिया एसा विज्झाविओ पइवो, समुप्पण्णा महमणे संका । मोत्तूण सयणिज्जं निरुद्धपयसंचारा चलिया एसा उज्जाणाभिमहं। अहं पि पिट्रओ उज्जाणं जाव पेच्छमाणी गया।
__ तओ उज्जाण-पायवेहि मोहिया इओ तओ गवेसमाणी इमाए सरसीए समीव[मा]मया । तओ "जमन्नाणवसगाए अवरद्धं मए तं खमियव्वं ताएण, जणणि ! जाय-वच्छले मरिसेज्जसु ममावराहं। जइ पत्थियं पि पावेज्जइ ता भवे तुम चेव मह जणणी हवेज्ज । सम सुह-दुक्खे चित्तन्नुए ! तुम पि संपयं दूरवत्तिणी जाया। सुहय धनदेव ! मुंच मे माणसं पा[साव]रुद्ध-कंधराए दुन्निस्सरं भवओ भविस्सइ” त्ति, सुया मए एरिसा सद्दा । सद्दाणुसारेण य तुरियतुरियमह-मेत्थमागया। दिट्ठा य एवंविहमवत्तरमणुहवंती एसा।
___ तओ अप्पणा पासय-विमोक्खणं काउमसमत्था एवं विलविउमारद्धा। एवं साहियं मए जं तए “एसा के निमित्तं मरणमज्झवसिया?" "संपयं तुम पुच्छिज्जसि, को तुमं? किं निमित्तं वा अकाले इह समागओ? कहेउ भवं जइ अकहणीयं न होइ।" अहं पि अदिण्ण-पडिवयणो अहोमुहो ठिओ। तओ सवणंते होऊण भणियं गुणवईए"हला, चित्तन्नुए ! सो चेव एसो, जो रायहंसो ब्व मह माणसे सया निवसइ । न एस पुच्छिज्जतो वि नियचरियं साहिस्सइ? अओ विरमसू तुम।" चित्तन्नयाए भणियं-“सामिणि ! जइ एवं तो परमोवयारी जीवियपयाणेण एस ते, कीरउ पच्चुवयार-करणं, पक्खालिज्जउ चलण-जुयलं, दिज्जउ सहत्थेण तंबोलाइयं ।" गुणवईए भणियं-- "तुमं चेव जाणासि ।"
तओ कया चित्तन्नुयाए तंबोलाई सामग्गी। पारद्धो उवयारो गुणवईए। करे घेत्तूण वारिया मए–“सुंदरि ! अलमुवयारकरणेण ? जओ--- उवयारकए जो होइ सज्जणो मामि को गुणो तस्स । उवयारबाहिरा जे, जयम्मि ते सुंदरा सुथणा ।।१४५।।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |