Page Text
________________
सम्मत-बीय-लंभो णाम पढमो अवसरो
चरिम-जामद्धे ससंभमा समागया राइणो समीवं देवी पियंगमंजरी । पणामपुरस्सरं विण्णत्तो राया--"अज्जउत्त! अज्ज मए ईसि सावसेसाए रयणीए कडार-केसर-सडा-भासुरो, लंबलंगूला-हय-भूमि-मंडलो, इसि-विय[सिय]मुहो, मंद-मंद जिभायमाणो दिट्ठो सुमिणम्मि वयणेणमुदरं पविसमाणो पंचाणणो । रण्णा भणियं-'देवि ! सीहपरक्कमो ते पुत्तो भविस्सइ ।” तं सोउं हरिसियमणा गया नियसयणिज्जे पियंगुमंजरी । 'मा मे एस पहाणसुमिणओ अण्णेहिं पावसुमिणेहि अंतरिज्जउ' ति, ठिया देव-गुरु पडिबद्धाहिं धम्मिय कहाहिं जावुग्गओ दिणयरो। इओ य पढियं कालनिवेयग-मागहेण गाहा जुयलं-रविसंगम-सुहियाए वियसिथविमलदलकमल-नेत्ताए। भमरारवेण गीयं व, हरिस-पडहत्थनलिणीए।१२१॥ अहियजणं य दुहओ, पवड्डमाणो कमेण नरनाह ! तुझ पयावो व्व जए, वित्थरिओ रवि-करपयासों ।१२२। - एवं सुणिअ पहाउयतूर-रवेण पडिबुद्धो राया। कयं गोस-करणिज्ज । निसण्णो अत्थाण-मंडव-सीहासणे । धरिया जवणियंतरिया पियंगुमंजरी । सद्दाविया सुमिण-सत्थ-पाढगा पुप्फ-तंबोलाईहिं कयसम्माणा, निसण्णा दिण्णासणेसु । पुच्छिया राइणा सक्नियं सुविणय-फलं । तेहिं वि परोप्परं सुविणय-सत्थं संवाइऊण जंपियं--"देव ! सयल-पत्थिवपहाणो सीह-साहसो अचिरादेव देवीए पुत्तो भविस्सइ।"
.: । तओ पीइदाण-पुरस्सरं वत्थाहरणाइहि सम्माणिऊण विसज्जिया सुमिण-सत्थ-पाढगा । सुह-सुहेण गब्भमुव्वहतीए देवीए समइक्कता. तिण्णि मासा । ....................
• अण्णया समुप्पण्णो दोहलो-“देमि दीणाणाहाइयाण महादाणं । करेमि उक्करं सत्त-दिणाणि जणवयं। समुद्धरेमि सडिय-पडियाणि देवयाययणाणि । करेमि सुहियाणि कारागारगय-सत्ताणि । पू[ए]मि देव-गुरु-चलणाणि ।" संपाडिओ तहेव राइणा । “संपण्ण-सयल-दोहलाए जहा समीहिय-संपज्जंतासेस-मणोरहाए . वोलीणा नवमासा अट्ट राइंदिया, तो पसूया देवी सुकुमाल-पाणि-पाय, अहीण-पडिपुण्ण-पंचिदियसरीरं, लक्खण-वंजण-गुणोववेयं, निय-तेयसा दस-दिसाओ उज्जोवितं, निय-कुल-तुट्टिकारयं दारय । हरिसिओ चंदलेहापमुह-पहाणपरियणो । जंपियमिवरोप्परमणेण-'संपण्णा महाराय-मणोरहाऽसेस परियणस्स य । ता लहुं गंतूण वद्धावेह महारायं।' . तओ तुरियं गंतूण हरिसियाभिहाणाए दास-चेडीए पुत्त-जम्मेण वद्धाविओ नरवई। परितुट्ठो राया। दिण्णं तीए अंगलग्गं वत्थाहरणाइयं । परमाणंद-भरनिब्भरो गंतूण अत्थाण-मंडवे निसण्णो राया। सद्दाविओ सुगुत्ताभिहाणो नगरारक्खिओ। भणिओ मंतिणा--"अरे ! गंतूण अकालहीणं तिय-चउक्क-चच्चरमहापहेसु घोसणं कारवेह । जहा-- 'भो नायरया ! समुप्पण्णो सयल-भुवणे वि अप्पडिहय-सासणस्स महाराय-नरकेसरीणो पहाणदेवीपियंगुमंजरीए पुत्तो, ता निव्वत्तेह महामहूसवं, करेह हट्ट-सोहाओ, उन्भेह धय-पडागाओ, बंधेह तोरणाणि, ऊसियाणि करेह घर-दुवारेसु जुग्गमुसलाणि, पयडेह घर-दुवारोभयपासेसु जल-पडिपुण्णे पुण्ण-कलसे । एवमाइ सव्वंपि कालोचियं काऊण लहुं निवेएहि ।” तहेव कयं सुगुत्तेण।
. तओ पयट्टो रायभवणे नयरे य महामहूसवो। पविसंति रत्तंसुय-नियंसियाओ पुण्ण-अक्खयवत्तधारिणीओ अविहवनारीओ। इओ तओ परियउंति कज्जवावडाओ महल्ल-महल्लीओ, सच्चवियसरविसेसा य गाइया कलकंठ-गायणा, आनंद-भरनिन्भराई पणच्चियाइं पायमूलाणि, वित्थरियाणि थेरी-वयण-विणिग्गयाणि आसीस-वयण-सहस्साणि, पसरिया समंतओ मागहाण जय-जय-रवा, परमाणंद-सूयगं समतालं गुहिर-निग्घोसं वज्जए वद्धावणयतूरं । .ठाण-ठाणेसु बद्ध-मंडलाणि नच्चंति चंदलेहापमुह-दासीण विंदाणि, कुंकुम-रस-पिंजरिय-सुक्किल-कुच्चकेसाहुयवह व्व मुंचंति मुहेण महल्लिया, किज्जति पडिच्छिज्जति य सइया साहस्सिया सयसाहस्सिया य लोयाण उवयारा, ठाण-ठाणेस पयडिज्जति महादाणाणि, सम्माणिज्जति मंति-सामंतवग्गा, पूरिज्जति पणइयगमणोरहा, मोक्कलिज्जति चारगय-जणा, कीरइ बंदियणमोक्खों, दिज्जइ सयल-जियाण अभय-पयाणं एवं समइक्कते वद्धावणय-महूसवे कमेण वोलीणो मासे सुविण-दसणाणुसारेण पइट्ठाक्यिं. 'नरसीहो' त्ति, नामं दारयस्स ।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |