Page Text
________________
सम्मत्त-बीय-लंभो णाम पढमो अवसरो तत्थ य कावालियसाहणा
इओ य सो दुग्गिलो वरवत्थाहरण-विभूसिओ, गंधुद्धर-विलेवण-विलित्त-सव्वंगो, तक्खणवियसंतमालइमालाविरइयसिर-सेहरो, समप्पण्णपेक्खणय-दसणाहिलासो, उदिऊण तओ ठाणाओ गंतुं पयट्टो । पत्तो अणंगसिरिधवलहरहेट्ठओ, दिट्टा लंबमाणा रज्जू, गहिया करेण, चालिया मणागं, ''सुलग्गो हवेज्जसु"त्ति, जंपियं वियक्खणाए। दुग्गिलेण चितियं-"अहो! एवं बीयमिव नाडयं लक्खियइ हवउ सउणा विलसंति" लग्गो दढयरं । खंचिया ताहिं रज्जू । आरोविओ सो धवलहर-गवखे । तं अंधयारत्तणओ सव्वरीए निरुद्ध-वयण-वावारत्तणओ य न पच्चभिण्णाओ। तक्खणा चेव कयाणि वियक्खणाए तहेव विलेवण-कुसुम-वत्थाहरण-कंकण-बंधणाईणि सव्व-कज्जाणि । निव्वत्तियं पुव्वपओगेण पाणिग्गहणं,। तहेव भुत्तो कासारो, कयं जलसोयं, दिण्णं तंबोलं, उवविट्ठ वहु-वरं, पुरओ होऊण आणंदभर-निब्भराए जंपियं क्मिक्खणाए"अज्ज चिय मह सहलो परिस्समो अज्ज सुत्थिया जाया । अज्जंचिय कज्जभरो, उत्तिण्णो मह सरीराओ।१०१। अणुरूव-रूव-सोहग्गसिरि समद्धासियाण तुम्हाण। अणुकूल-विहिवसेणं समागमो जं मए दिट्ठो ॥१०२।। ... संपय तह कह वि विही विहेउ जहा एसो आजम्मं चेव पवड्ढमाणो होउ । दुग्गिलेण भणियं--"एवं होउ।" सई सोऊण संकिया वियक्खणा । साहियं अनंगसिरीए, "हद्धी ! मुटुम्ह, अण्णो वि य एस कोइ लक्खीयइ?"" अणंगसिरीए भणियं"जइ एवं तो लहुं विसज्जेहि।" तहेव विसज्जिओ। गओ सट्टाणं । दुग्गिलो मुग्गवडियं ऊसीसए काऊण सुत्तो। साहिओ एस वइयरो वियक्खणाए अणंगसिरि-जणणीए । तीए वि राइणो।
इओ य मइविहवमंती अण्णमवायंतरमलभमाणो दुहिया-वइयर-साहणत्थं रण्णो समीवमागओ। विण्णत्तो राया--"देव ! मह दुहियाए निय-कूल-कलंकमगणंतीए अबलायण-सूलहं महासाहसमवलंबिऊण पच्छण्णमेव केणावि अप्पा परिणाविओ। जमेत्थ कायव्वं तं महाराओ जाणइ ।" राइणा भणियं--"मह दुहियाए वि तुह दुहिया सरिसमेव चेट्रियं । अहो ! विहिणा समदुक्खाण समागमो विहिओ। अलमेत्थ वियारेण । लह गवेसावेहि वरदुयं पि।" निग्गओ मंती । पेसिया दिसोदिसं वर-गवेसणत्थं पच्चइय-पुरिसा । हिंडिया तिय-चउक्क-चच्चर-चउमह-महापह-सुन्न-घर-देउल-आराम ज्जाण-काणणाइ-ठाणेसु । न लद्धा कत्थ वि वरपउत्ती। पडिनियत्ता पूरिसा । समागया सुण्ण-वणसमीवे। समागओ सुण्ण-वणाओ वर-कुसुम-विलेवणाण सुरहि-परिमलो । संजायसंका पविट्ठा तत्थ पुरिसा । दिट्ठो य विवाह-वेस-परिगओ कंकण-जुयल-परिमंडियदाहिणकरो दुग्गिलो। करे घेत्तूण नीओ तेहिं अमच्च-समीवं । तेण वि दंसिओ राइणो । पच्चभिण्णाओ। रण्णा भणिओ य सो-"मुग्गवाणियगो तुम?" तेण भणियं--"जं देवो जाणइ।" कओ नरिदेण आयार-संवरो । समाणत्तो मंती एयमित्थ पत्तयालं जमेसो घर-जामाउओ चेव कीरइ, ता समप्पेहि धवलहरमेगं, वियरिज्जउ पंचसय-गामणिसामी।' 'जं देवो आणवेइ' त्ति, भणिऊण तहेव सव्वं संपाडियं मंतिणा । राय-अमच्चाण सम्मओ मणुय-भव-दुल्लह विसय-सुहमणुहवंतो सुहं सुहेण कालं गमेइ दुग्गिलो। एवमेसो सुहसउण-सामत्थेण सुहिओ जाओ।
___“अउ चंदलेहे ! सुहिया चिट्ठउ देवी, अणुक्लसउण-सूइयं सिज्झइ चेव देवीसमीहियं ।" एवं अणुकूल-वयण वित्थरेण समासासिऊण देवि गओ सट्ठाणं राया । निसण्णो सहा-मंडव-सीहासणे।।
इत्थंतरे कालायस-कडय-कढिण-दंड-हत्थो समागओ पडिहारो । पणामपुव्वयं विण्णत्तो तेण राया--"देव ! दसणुसुओ अघोरघंटो नाम कावालिगो दुवारे चिट्टइ।" रण्णा भणियं--"सिग्धं पवेसय, का तवस्सिजणे वि पुच्छा?" गओ पडिहारो। पवेसिओ महावइगो, समागओ पत्थिव-समीवं, पणमिऊणं दिण्णासणो, निसण्णो, पुच्छिओ राइणा--"कि केवलाणुग्गह बुद्धीए उयाहु पओयण-वसेण केण वि नियपय-कमलेण समलंकियं मह भवणं भगवंतेहिं ?" तेण भणियं--"पओयणं विणा दट्टव्वा चेव तुम्हारिस पुरिसा किमंग पुण पओयणवसेण ? अस्थि मह किंपि पओयणं पि।" राइणा भणियं"केरिसं?" तेण भणियं-"सिरिसेहरवेयालं साहेमाणस्स वोलीणा मे छम्मासा । कया पुव्व-सेवा। एगरयणिसज्झा संपयं उत्तर-सेवा । तत्थ पुण महासाहसेण उत्तर-साहगेण पओयणं । अण्णहा निरत्थया चेव पूव्व-सेवा । सत्तवंतो य तुम, ता जइ अतिहि-जण-वच्छलो, अब्भत्थणा-भंग-भीरुओ, 'परोवयारकरणफलं महापूरिस-जीवियं' ति, ते अवगयं, ता करेहि रयणिमेगं उत्तर-साहगत्तणेण मह सन्निज्झं ।” राइणा भणियं-“जीवियं पि मे तवस्सि-जण-साहीणं पि किमंग पुण एगरयणिसन्निज्झ
_Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |