Page Text
________________
मणोरमा-कहा
सुइ व्व तिक्ख-तुंडा, वसणंतरं लहिऊण पइट्ठा। अरे ! अत्थि कोइ जो एयं असिक्खिअ-पंडियं दुटु-दासिं मसिविलि]तगत्तं करिय अद्धचंदं दाऊण रायभवणाओ नीहारेइ?"
एत्यंतरे परिहासं वड्ढयंतेण चंदलेहमुद्दिसिऊण जंपियं राइणा--"सच्चो एस अहाणओ---'जन्न सुसिक्खिओ वि नाविओ नियसिरं मुंडेइ।' जओ चंदलेहाए मंगुलं काऊण अम्हाण पडियममंगलं अप्पणो पुण मज्झे समागयं।" सोऊण सयल-परियण-दिण्ण-समकाल-करताल-सद्द-भरिय-भुवणोदरो अट्टहासेण पहसिओ राया।
तओ “अहमेगा एत्थ दुहिया, न जुत्तं दुहिय-जणस्स सुहियजण मज्झे अवत्थाणं" ति, भणमाणी मोत्तूण भद्दासणं चलिया देवी।
_ 'देवि मरिसियव्वं' ति, भणमाणेण राइणा वामहत्थे गहेऊण तम्मि चेव भद्दासणे निवेसिया । भणिओ य परियणो'न तेण मह कज्जं जो देवीए न संगओ । ता लहं पसाएह।' तओ मणिय-नरवइ-हिययाभिप्पाओ विणय-विहियंजली"सामिणि ! खमेसु जं किंचि अवरद्धं" ति जंपिरो चलणेसु निवडिओ सव्वो वि परियणो । चंदलेहाए भणियं"सामिणि! मह विसेसेण खमियन्वं, न मए अहिय-बुद्धीए एवं पयंपिअं, किंतु सामिणी-दुक्ख-दुक्खिय-महाराय-विणोयणत्थं।" पियंगमंजरीए भणियं-"जइ एवं तो खमियं चेव । गच्छह, नियवावारवावडा होह" त्ति । भणिऊण विसज्जिओ परियणो।
___ तओ राइणा भणियं-"पिए ! पियंगुमंजरि ! "विसाय-बहुलो य इत्थियायणो' सच्चवियं तए एयं । मुंच संपयं विसायं, करहिं ताव अबलाजण-सज्झमुवायं । जइ तेण ते पुत्तो न भविस्सइ ताहमन्नं उवायंतरं चितिस्सा मि"त्ति, भणिऊण विसज्जिया देवी।
सयमवि रज्जकज्जाणि चितिउमाढत्तो पियंगमंजरी वि पसत्थ-वासरे संनिहिय-सयल-पूओवगरणा परिमियचेडिया-चक्कवाल-परिक्खित्ता, ण्हाया, परमसूइया, गहिय-सविसेस-उज्जल-नेवस्था, गया धरणीतिलयभूयं मयरंदसुंदरं नाम उज्जाणं । दिट्ठोय तत्थ बहुजणजणिय-पउर-पच्चओ अमरसुंदरो नाम जक्खो। पहाविओ सुगंध-गंधोदएणं । पिंजरिओ पवर-घणसार-जल-संमिस्स-कुंकुम-केसर-रसेणं। कया कवोलेसु मिगनाहिणा पतावली। पूइओ सरस-सयवत्त-पमुहकुसुमेहिं । आहरिओ पवराहरणेहिं । परिहाविओ पवर-वत्थाणि । समुद्धओ कालागरु-कप्पूर-पूर-परिमल-भरिय-भवणोदरो धूओ।
तओ काऊण पंचंगपणिवायं विण्णतो देवीए-“देव! मयरसुंदरुज्जाणभूसण! जइ तुह पसाएण पुत्तो भविस्सइ, तो ते सुवण्ण-सयसहस्सं दससहस्साणि घेतूगं सयल-विसयसारं गाम-दुगं च वियरिस्सामि। अट्ट दिणाणि महामहूसवं, दिण-मेगं सपरियणा रयणि-जागरणं च करिस्सामि" त्ति विण्णविया सभवणमागया ठिया।
तमेव जखं समाराहयंती मासमेगं त तेण सुय-संपत्ति-सूयगो सुमिणगो वि दिण्णो।
तओ सविसेसमधिकं कुणमाणी दण जंपियं-जराजज्जरिय-सरीराहि, वयण-कंदरंतर-पविरल-दीसंत-दसणाहिं, वुड्ढत्तण-महाराय-निवास-सूयगपयडि[अ]-सयल-धवल-सिरोरुह-धयवडाहिं, रायावरोहतत्ति-निउत्ताहि, महल्ल-महल्लीहिं"देवि! अस्थि-रयणपुरस्स उत्तर-पुरत्थिमे दिसाभाए सच्चोवायं य वडढजण-मणिय-माहप्पं, सडिय-पडियं चंडियाययणं । तहिं वच्च तुम्हे । मा तत्थ गयाए सामिणीए समीहिय संपत्ती न होज्जा ।" 'एवं भ [व]उ' त्ति भणिऊण पहाण-परि-[यणपरि] वुडा कइवय-थेरी-पुरस्सरा परियण-मणियमग्गा गया चंडियाययणं । तत्थ वि तहेव पहाणाइ-ण्हवणाइ-सयलपडिवत्ति काऊण विण्णविउमाढत्ता पियंगुमंजरी-"देवि ! महिसासुर-दप्पदारिणि, कर-कय-तिक्ख-तिसूल-धारिणी, पणयजण-मणवंछियकारिणि, पलय-काल-कंकाल-रूव-धारिणि कच्चायणि ! काऊण पसायं, देहि मे कूलनंदणं, जेणाहं करेमि पइदिणमेव तुह पायवंदणं। समुद्धरेमि सडिय-पडियं तुह मंदिरं। कारवेमि भयवईए जच्चकंचण-पडिमं। दंसेसु पुत्त-संपत्ति-सूयगं सुमिणगं, जेणाहं निव्वुया चिट्ठामि"त्ति, भणिऊण विहियपणामा जहाऽगयं गया देवी।
_Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |