Page Text
________________
२४२
मणोरमा-कहा
तीए भणियं-“केरिसो ?" मुणिणा भणियं-"जिणधम्म-पडिवत्तीए पुवकय-दुक्कड-निंदणं, पडुपण्ण-संवरणं, अणागयपच्चक्खाणं, जिणिद-वयण-सवण-सलिलेण पावमल-मलिणचित्त-रयण-सोहणेणं सव्वसावज्जारंभ-परिच्चाएण चारित्तपडिवज्जणं, सयल-सत्तेसु मेत्ती-भावो, गुण-गरुयजणदंसणे पमोय-करणं, दुक्खत्त-सत्तेसु कारुण्ण-बुद्धी, निग्गुणसजण-उवेहा ५ सयल-दुह-दावाणल-विज्झवणाम[य]वुट्ठि-सरिसं गीयत्थ-गुरुवयणासेवणं, गुरुजण-वयणासत्ताहिं जंतुणो अप्पमाणयाइसएण पवढमाणसंवेगा विसं व विसयासेवणं मण्णमाणा, निविण्णा संसार-चारग-वासाओ पइदियहमुल्लसंत-सुहपरिणामा खविऊण चिरसंचियासुहकम्माइं, निमित्ताभावाओ निरंभिऊण नवासुहकम्मबंध, सुक्कज्झाणानलनिद्दड्ढ-घण-घाइकम्मिधणा, उप्पाडिऊण लोयालोय-पयासगं केवलनाणं, जरा-मरण-रोग-सोग-वज्जियं परमपयंपि पाउणं ति । चरण-करणासमत्था देसविरई पालिंति । तत्थ वि असमत्था पडिवण्ण-विसुद्ध-सम्मत्ता पुप्फाइ-जल-भरिय-भायणपेरंताए अविह पूयाए जिण-पडिमाए पूइंति ।" विजयाए भणियं-“भयवं ! कि जल-भरियभायणेहिं वि पूया हवइ?" साहुणा भणियं-"आमं ।" तयाहजल जणिय-सयलपूओ आवज्जियगरुयपुण्णपब्भारो। चंदो व्व सीयलो सो सुहभाई जायई जीवो ॥४८६।।
भणिय विजयाए-“भयवं! जहा-सत्तीए तुज्झोवएसं संपाडिस्सामि।” वंदिऊण साहुं मुक्कमरणज्झवसाणा पुणो वि नयरं पविट्ठा विजया ।
अण्णया जिण-भवण-पविट्ठाए दिळं अचिरनिव्वत्तियमज्जणं रूवाइसयाणंदियं सज्जणं जिणबिंबं । समुप्पण्णपूया-परिणामाए विजयाए सच्छसीयल-सलिल-पडिपुण्णाणि चंदण-चच्चाइणा सुणेवत्थाणि काऊण ढोइयाणि जिणपूरओ पच्चग्गकुंभयाणि । संजाय-सुह-परिणामाए पुणो अत्ताणयमणुमोयमाणीए मज्झिम-गुणजोगओ बद्धं मणुयाऊयं । अहाउक्खएण मरिऊण सलिल-पूया पभावेण समुप्पण्णा बलाहियत्ताए सो य पुण तुमं ।" एयं सोऊण संजाय-जाई-सरणो, विलीणसंसार-वासणो, दाऊण भाइणेज्जस्स निय-पयं, राइणा अणुण्णाओ, संपूइय-सुहिसयणवग्गो, सम्माणिय-सयल-संघो, दीणाणाहदिण्णदाणो, समं सुमंतपुत्तेण महाविभूईए कुरुचंदगुरुसमीवे निक्खंतो अमरगुत्त-बलाहिओ । परिपालियाकलंकसामण्णो समाहिमरणेण मरिऊण सव्वट्ठसिद्धे समुप्पण्णो । तओ चुओ परमपयं पाउणिस्सइ । एवं पायवंदणपुरस्सरं भणिओ पियंकरायरिएण समुद्ददत्तो-- एसा जिणाण पूया अट्टविहा दंसिया समासेणं । सोदाहरणा संपइ सामण्णेणं निसामेहि ॥४८९।। सव्वा वि हु जिणपूया विसुद्ध-सद्धाए चेव किज्जती । तं नत्थि जं न साहइ कल्लाणं भव्वसत्तणं ।।४९०॥ जिणपूया परिणामो हंदि ! महाविसावगमो मुणेयव्वो। दुग्गयनारीपमुहा ढिता एत्थ ढुव्वा ॥४९१।। निधभुयदंडोवज्जिन धणेण धण्णो करेइ जिणपूयं । पुण्णाणबंधिपुण्णेहि जस्स जम्मो जए ननं ।।४९२॥ विविहाहरणविलेवणमहग्घदुल्लंभवत्थुसत्थेहिं । परमगुरुपूयणेणं पवड्ढए सुद्धपरिणामो ॥ ४९३ ॥ कप्पूरागरु-सिरिखंड-घुसिण-मिगनाहि-परिमलग्घवियं । भत्त ए भुवण-गुरुणो पूयं पूयारिहो कुणइ ।।४९४।। सिंगार-कारणाई विलेवणाहरण-कुसुम-वत्थाणि । संवेगं चिय जणयंति वीयरायंग-लग्गाई ॥४९५॥ पूयाए पूयणिज्जाण भुवण-बंधण वीयरागाण । धण्णाण धणं विणिओगमेइ सुकयत्थजम्माण ।।४९६।। जिणपूपालोयसमुल्लसंतसंतोस-सलिल-विद्दविओ । भव्वाण चिर विलग्गो वि झत्ति पज्झ रइ कम्ममलो ।। पूया भाव-विसुद्धी भाव-विसुद्ध ए सुकयसंपत्ती । सुकएण होइ सुगई सुगईए परंपरा मोक्खो ।।४९८।। जिण-पूयं कुणमाणो भव्वो भावेण हरिस-पडहत्थो । भोत्तुं नरसोक्खं कमेण सिद्धि पि पावेइ ॥४९९।। ता वुणह सयलकल्लाणकारणं आयरेण जिण-पूयं । पूयाए जओ सुव्वंति विविहफल-भाइणो समए ।।५००।।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |