Page Text
________________
सम्मत्तलंभो णाम बीओ अवसरो तत्थ य कणसारसेट्ठिपुव्वभवकहा
२२१
अवगच्छामि । भवओ जीवियप्पयाणेण परमोवयारिणा अणक्लविहिवसेण घरमागयस्स परिचत्त-सव्व-संगओ रणनिवासी परिओसवसमुल्लसंतमाणसो किमुवगारं करेउ अम्हारिसजणो। तह वि गिण्हाहि एयं पढियमेतसिद्ध अक्खय-अक्खयनिबंधणं बहसो दिट्रपच्चयं गुरुपरंपरागयं मंतं । इमं च थावर-जंगम-विस-विणासकारगं गारुडमंतं।" अदिण्ण-पडिवयणो अहो-महो ठिओ गणदत्तसेट्ठी। जोगिणा भणियं--"महाभाग ! न संखोहो कायव्वो। परकज्जकरणरसिया चेव महापूरिसा हवंति। भविस्सइ एतो परोवयारो वि। किं च जइ एयं मम पत्थणं विहलेसि तो निरत्थं दंसणं पि मण्णेमि।" 'न अण्णा गइ'त्ति पडिवण्णं सेट्टिणा। गहियं तज्जयलं पि। ठिया दोवि सह जोगेण ।
इओ य संवस्सरावसाणे रयणदीवाओ चलिया दो वि मंगलालय-सुलोयणा। तं पएसं पत्ते जाणवते। गहिय पूओवगरणा समागया चंडियायणं। पूजिया चंडिया। वंदिओ विमलहंसो। पूच्छिया हंसगब्भहंसविलासपउत्ती तेहिं। जोगिणा भणियं--"सुमरणसेसा संजाया ते भगवंतो। अहं पि तप्पा उगा-सेवगो ।" तेहिं भणियं--"भयवं! जेण पओयणं?" गणदत्तसेट्रि दंसयंतेण भणियं जोगिणा--"एस महाणभावो चंदो व्व नियउदयादि परोवयार-पहाणधणजीविओ विहिवसेण विस [मा]वडिओ जहा सट्टाणं पाउणइ तहा करेह ।” अणुग्गहं मण्णमाणेहि पडिवण्णमणेहिं । पणमिऊण जोगियं गुणदत्तेण समं गया जाणवत्तं । उक्खित्ता नंगरा। पेल्लियं जाणवत्तं। कइवयदिणेहि पत्ता तीरं। पाविओ सट्टाणं गणदत्तसेट्ठी । विहल-ववसायं नाऊण न ढोयंति सयणाइया ववहरणजोग्गं दव्वं । रयणीए भणिया अभयसिरी सेट्रिणा--"पिए ! नियाभरणं कइ[वय दियहे मह समप्पेहि ।" समप्पियमिमीए। तेण विक्किणिऊण गहियं चाउल-घय-तेल्ल-गुल-खंडाइयं । ववहरिउमारद्धो। मंताणुभावेण दितस्स वि न झिज्जइ पुणो पूणो पिडेइ तंदुल-घयाइयं ।
अण्णया परिवद्दले काले अणिट्ठिए तंदुले विक्किणंतो जाओ अणेगकोडीसरो। समल्लियंति सव्वओ सयणाइया। वह मण्णंति नायरया। पसाएण पेच्छइ नरनाहो। विणा वि पयत्तेण सिझंति सव्वकज्जाणि।
अण्णम्मि दिणे उज्जाणे कीलंतो अहिणा डक्को रायउत्तो। मिलिया सब्वे वि गारुडिया। न कओ केण वि विसेसो। तओ घोसावियं पडहेण राइणा--"जो रायउत्तं जीवावेइ तस्स राया सवण्णकोडि देइ । सेट्रिणा पडहओ। गओ राय-समीवं । दिट्ठो निच्चेट्ठो रायउत्तो। आलिहियं मंडलं । धरिया धारणा। सुमरिओ गारुडमंतो । खणंतरेण वियंभंतो उट्टिओ कुमरो । तुट्ठो राया । कारावियं वद्धा[व]णयं । भणिओ भंडारिओ--"देहि सेट्रिस्स सूवण्णकोडि ।" सेट्टिणा भणियं--"देव ! एसा चेव सुवण्णकोडी जं कूमारो जीविओ। चाउलमेत्त-संतुस्स कि मे सवण्णकोडीए?" इसि हसिऊण भणिओ राइणा कोद्वारिओ--"अरे! तहा करेस जह--जहा एग-वरिस-संतिया सव्वे वि भोग-तंदुला सेट्रि-घरे पविसंति।" सेटिणा भणियं--"सामि ! संति में तंदूला अलमइनिबंधेण?" राइणा भणियं-- “अवस्सं कायव्वमेयं भवया।" पडिवण्णं सेट्टिणा। काराविया सच्चविया सव्वविसए पगामं कणकोद्रारा। पुव्वाभिहाणमंतरिऊण 'कणसारो त्ति पसिद्धि गयं वीयमहिहाणं तंदूलवंताण मज्झे मही-मंडले पढमा तस्स रेहा। विणीयाणकलपुत्तमुह-दसणपमुइओ विसयसुहमणुहवंतो कालं गमेइ।
अण्णया समागया तत्थ ओहिण्णाण-वियाणिय-रूवि-वत्थुवित्थरा सुरसुंदराभिहाणा सूरिणो। समोसरिया नयरवाहिरुज्जाणे। निग्गया वंदणवडियाए नागरया ति पयाहिणा पूरस्सरं वंदिऊण सूरि-पय-पंकयं निसण्णा समचियासणे। पत्थूया भगवया धम्मदेसणा। संसय-तिमिर-दिवायरं पेच्छिऊण भयवंतं लद्धावसरेण भणियं कणसारेण--"भयवं! कि मए पूव्वभवे पुण्णं समज्जियं जेण पवड्ढमाणा तंदुला होऊण विहडिया? पूणो विसेसेण पवढमाणा एवं जाया?" मूरिणा भणियं-"सोम! सुणसु कारणं-"
अस्थि इहेव भारहेवासे वसंतविलासो नाम गामो। तम्मि तुम सयबाहनामकोविय-दारओ अहेसि । जणयम्मि उवरए पत्तो परमदारिदं । परघरेस कुकम्माणि कृणंतेण लद्धा तए चाउल-सेइआ। 'विसेसकज्ज किपि साहिस्सामि इमीए' चितिऊण सुसंगोविया कया।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |