Page Text
________________
समत्त-लंभोणाम बीओ अवसरो तत्थ य तेयसारनिवकहा
अण्णम्मि दिणे भणिओ चंदचूडो समरसूरेण---"अत्थि मे जीविय भूया केरला नामधूया । तं जइ कुमरो परिणेइ तो महई मे मण-निव्वुई भवइ ।” चंदचूडेण भणियं--ससंगयमेयं मज्झ वि धूया कुमारकरगाहणाय सुहिया होउ। आणाविया केरला । निरूविओ पाणिग्गहणवासरो । महया विच्छड्डेण विवाहियाओ तेयसिरिकेरलाओ कुमारेण । दिण्णं कण्णयाण करि-तुरय-मणि-कणयमाइयं जणएहि । एत्थंतरे पुवपरिणीयाओ विज्जुसेणापमुहाओ समागयाओ पंच वि घरिणीओ। काऊण करयलंजलि जंपियं विज्जुसेणाए--"अज्जउत्त! सा मह भाया तुह परक्कम-निज्जियाए विज्जाए मक्को। तह वि गहियखग्गो अम्ह वहणत्थं उवट्ठिओ। विरसमारसंती धाविऊण गहिया केसेसु कणगावली। कहमज्जउत्तस्स मुहं दंसिस्सामि त्ति चितिऊण पहओ सो मए इसिखग्गेण। भवियव्वया निओएण विमुक्को जीविएण। जइ भणह तो तस्स सलिलंजलि देमि ।" कुमारेण भणियं--"न सोहणं तए कयं जं सपक्खे अवयरियं । कयमईयचिताए करेहि मयकिच्चाणि । तीए वि तहेव कयाणि । समरसूरसाहेज्जकरणमुवागया मिलिया तत्थेव विजयसिरिपमुहाणं चउण्ड कण्णगाण जणया। साहिओ सुयाहिं सव्वो वि जोगिय-विज्जाहरावहारमाईओ तेयसारपाणिग्गहणपज्जंतो नियवईयरो । समचियवर-कर-गहणेण पमुइया ते माणसे । संताणविरहिया नियरज्जेसु तेयसारमहिसिंचिऊण वणवासं गया केरला-विजयसिरि-जणया। कुमरो वि विसयसुहमणुहवंतो कालं गमे ।।
अण्णम्मि दिणे रयणीए वासभवणे नुवण्णो चेव पच्चूसे पेच्छइ अत्ताणयं सरासण्णसत्तभूमि-पासायपल्लंके पमुत्तं एगागिणं । विम्हियमाणसो चितिउमारद्धो--हंत ! न सा पंपापुरी। न सो सया सण्णिहिओ परियणो। विविहवणराइविराइयं सुण्णारणमिणं । को एत्थ परमत्थो ?" एयं विचितियंतो जाव चिद्रइ तावागया दिव्वायारधारिणी एगा इत्थिया। पणमिऊण पुच्छिया कुमारेण--"अंब! का तुम? कस्स वा परिग्गहे एस पासाओ?" सा वि बाहजलभरियलोयणा भणिउमाढत्ता-"वच्छ ! तारा नामाहं वणदेवया। पासाओ एस मए चेव कारिओ। समासण्णसरोवरं पि मज्झेव किता।" कुमारेण भणियं--"अम्मो जहिच्छाचारिणीओ तुब्भे वणदेवयाओ। कि काहिहह पासाएण सरोवरेण वा?" ताराए भणियं--"सुणेउ वच्छो
अत्थि सयलभारहवासे लच्छीविलासभवणं विविहवणसंडमंडियाणेगोववण-रमणीयं अरुणमणिमंदिर-पहापहावदुल्लक्खदिण-विभावरीविभागं विलासउरं नाम नयरं। तस्थ य भरहसगराइरायसरिसो कित्ति-पब्भार-भरिय-भूमंडलो समरसेणो नाम राया। तिहुयण-तिलया से महादेवी। तीसे अणेगेहि उवाइयएहि महमेगा कन्नया जाया। पइ[द्वा] वियं नाम जयसुंदरी। कमेण पवड्ढमाणा पत्ता जोग्यणं । परिणीया वच्छाहिवसुएण अवंतिवद्धणेण । तेण सह विसयसुहमणुहवंतीए संभूओ गम्भो। उवरओ अतिवद्धणो निस्संताणो त्ति काऊण अहिसित्तो तप्पए कित्तिवम्मो नाम भाइणिज्जो। वच्चइ कालो।
अण्णया पुच्छिओ तेण मइगम्भो नाम नैमित्तिओ-"चिरं मे रज्जमेयं चलं वा?" तेण भणियं-"जयसुंदरीकुच्छि-संभवं दुहियरं जो परिणेही तस्सेसा रायसिरी चिरा भविस्सइ। संजायसंकेण संपूइऊण पेसिओ नेमित्तिओ।
अण्णम्मि दिणे सया सण्णिहिओ विस्सासठाणं भणिओ कित्तिवम्मेण दठधम्मो नाम नियपुरियो-“एयं जयसुंदर पसवणटा पिइहरपराणयणमिसेण अमाणुसाडवि नेऊण पणजीवियं करेसु जेणेसा रायलच्छी थिरा भवइ।" सो वि 'तहत्ति पडिवज्जिऊण तव्वयणं, गहाय मम, एत्थागओ । साहिऊण रायसासणं उक्खया तेणासिधेणुया । पवणा हयलय व्व कंपिउमारद्धाहं। अइसंभमेण पडिओ महीयले गब्भो। तिव्ववेयणाभिभूया विमुक्का जीविएण। समुप्पण्णा एत्थेव ताराहिहाणा वंतरी। सो वि अहिय-बुद्धीए तं बालियं गिण्हतो विणासिओ वण-देवयाए । संगहिया सा दारिया । वित्थरियो सव्वम्मि लोए एस वइयरो । अहं पि विन्भंगेण विण्णायपुव्वभव-वइयरा परम-पीइए नियदुहियं परिपालेमाणी कालमइवाहयामि । वहुसो उम्मुहवयणं हरिणाभिमुहं पलोयंती दळूण गुणनिप्फण्णं एणामुहि त्ति नामं पइट्ठियं । पइदिणमेणगैहि सद्धि कीलमाणी अमयरसोवमेहिं पाण-भोयणेहि पोसिज्जमाणी वरवत्थाहरण-विभूसणा पत्ता जोव्वणं । समुप्पण्णा महमणे चिता। कस्सेसा दायव्वा ? भूमिगोयरतणय त्ति काऊण न देवाण न वा माणवेसु इमीए समुचिओ वरो विज्जड़ । अओ गंतूण वेयडढं विज्जाहरेसु निस्वेमि । कयनिच्छया पासायमिममारूढा । जाव-सुणेमि एवंविहं तीए वयणं--
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |