Page Text
________________
सम्मत्त-लंभो णाम बीओ अवसरो तत्थ य दीवयपूयाफले तेयसारनिवकहा
२०५
समए पसूया जाओ से नियकतिसमुज्जोइय-भवणब्भतरो दारओ । कयं वद्धावणयाइउचियकरणिज्ज । सुहेण समइक्कंतो मासो तेयब्भहिओ त्ति काऊण पइट्टावियं से नाम तेयसारो' त्ति सियपक्ख-ससि-मुत्ति व्व वढिओ देहावचएणं [कलाकलावेण य । अईव सत्ताहिओ धम्मकलावियक्खणो य पाणेहितो वि पिओ जणणि-जणयाण सम्मओ सयलपरियणस्स। समाणवय-वेस-रायसुयसहिओ विविहकीलाहिं कीनंतो कालं गमेइ ।
अण्णया मरणपज्जवसाणयाए जीवलोगस्स उवरया कमला-महादेवी। कयाणि मय-किच्चाणि । टिओ कइवय दिणाणि ससोगो राया। पच्छा सविसेसणेहेण तेयसारं पेच्छंतो रज्जकज्जाणि चितिउमारतो । अहिसित्ता पट्टमहादेविपए कमलसिरी नामसवक्कि-जणणी । जाया राइणो अईववल्लहा । समुप्पण्णो तीए पुत्तो। कयं नामं सीहविक्कमो । सम्मओ राइणो।
अण्णम्मि दिणे रयणीए वासभवणागएण सदुक्खं रुयमाणी दिट्ठा कमलसिरी। राइणा पुच्छिया य-"सुयणु ! कि कारणं रोइज्जइ ? वयणाणतर-संपज्जतसव्वकज्जम्मि मह रज्जम्मि कि ते न संपज्जइ ?" तक्खणसमुप्पण्णा मइ]भेएण जंपियमिमीए---"अज्जउत्त! संपज्जइ सव्वं तुम्ह पाय-पसाएण। किंतु पए पए अक्कोसिज्जइ य सीहविक्कमो तेयसारेण । मए वि [जीविए] धरमाणीए जइ एस एवं विडंबिज्जइ मयाए कावि गई भविस्सइ न नज्जइ ?” राइणा भणियं-"पिए ! अलं अणिचिताए। तहा जइस्सं जहेस सुत्थिओ भविस्सइ।” तीए भणियं-जेट्ठो तेयसारो। तस्स रज्जाभिसेए सविसेस एस दुत्थिओ भविस्सइ।" रण्णा भणियं--"सुयणु ! चयसु विसायं । रज्जं पि सीहविक्कमस्स वियरिस्सामि। परितुद्रा एसा। पभाया रयणी। कयगोसकिच्चो निसण्णो अत्थाणमंडवे राया। सेवासमय-समागएस अमच्च-सामंताइएसु, सट्ठाणठिएसु भड-भोइएसु, बहुवयंस-परिवारिओ पायवडणत्थं समागओ तेयसारकुमारो। पणमिओ राया। पायवीढ-निसण्णो अवलोइऊण रुक्खदिट्ठीए निठुरवयहि भणिओ तेयसारो राइणा--"अरे ! वाहि व्व पवढमाणो परपीडाकरो तुमं। कि निमित्तं सीहविक्कमकुमारं कयत्थेसि ? अहो ते कुलीणत्तं ?" तेयसारेण भणियं"ताय ! न मए अवरद्धं कइया वि कुमारस्स। अलियं केणावि तायपायाणं निवेइयं ।" राइणा भणियं--"कयावलावजणियपावं अवसर मे दिट्टिपहाओ । न मे किंपि तए पओयणं । सयलसहासमक्खमेवं फरुस-वयण-जणियमाणभंगो विच्छायवयण-कमलो काऊण पणामं उदिओ तेयसारो । मुणियनरवइमणोगएहि अवमाणिज्जइ कुमारो मंति-सामंतेहि । न करेइ वयणं परियणो । न बहुमण्णइ नयरलोओ। तओ सविसायं चितिअमणेणवरं मओ वरं दद्धो मा संजाओ वरं नरो । वरं गम्भे विलीणो सो जो पराभवभायणं ।।३४३।। पाएणब्भाहयं संतं जमुच्छायकयग्गहं । करेइ तं वरं रेणु माणहीणाओ जंतुणो ॥३४४।। कि जीविएण इमिणा परिभवखेत्तेणसयललोयस्स । वच्चामि तत्थ कत्थवि न सुणिज्जइ जत्थ नाम पि ।।३४५।।
___ एवं कए देसंतराणि वि बहुगुणनिबंधणाणि दिट्ठाणि भवंति । जओ-- अदिट्टपुहइकोऊहलाण भीरुण मूसगाणं व । एक्क बिलेच्चिय निच्चं वच्चइ कालो वसंताण ।।३४६।। न विलासा न पंडिच्च न यावि मइवित्थरो । न देसभासाविण्णाणं न देसायारनिउणया ।।३४७ ।। णेग धुत्तसयाइण्णा नाणावुत्तंतसंकुला । नाणेगसो परिब्भंता पुरिसेण वसुंधरा ।।३४८।।
एवं चितिऊण अकहितो चेव निग्गओ निसाए नयरीए । पइदिण-वहंतो पत्तो दुम्मासमेत्तेण कालेण आसापूरं नाम पट्टणं। पविट्ठो तयभंतरे। इओ तओ भमंतेण दिट्टो एगो छत्तमढो। पविठ्ठो तत्थ। दिद्वाणि एगत्थ पिडियाणि पंच चट्टसयाणि । तं मज्झे गंगदत्तो नाम उवज्झाओ। काऊण पणाम उवज्झायस्स उवविठ्ठो तेयसारो। पुच्छिओ उवज्झाएण"वच्छ ! कत्तो समागओ? कहि वा गंतव्वं ?" तेण भणिमं-उच्छण्णवसो विज्जत्थी देसंतराणि भमामि।" भणिय
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |