Page Text
________________
धूयपूयाफले सोमिलकहा
१९५
समुप्पणी तुमं दरिमाणकुलम्मि । उववण्णमेत्तस्स वि उवरयाणि अम्मा पिईणि । वड्ढिओ अया थणेण । सेसं पाएण भवओ विपच्चकखं । एवं भणिऊण पुणरवि पुव्व-पत्थुया चेव धम्मदेसणा मुणिणा पारद्धा - " सा [व]य ! जिणपूया विसया तत्थ वि धूवपूयाफलं भणतेण इमं भणियं-
घणसारागरुधूओ सुरभी धम्मत्थिणा दयव्वो । तिहुयण गुरुजिणपुरओ जम्म-फलं एत्तिय चेव ।। २६५ ।। ते चेव करा घण्णा सलाहणिज्जा य ते करा चेव । जिण-बिंबाणं पुरओ समुद्धओ जेहिं वरधूओ ।। २६६॥ जिणपडिमा पुरओ जो दहइ भत्तिभरियंगो । सो भोत्तॄण सुरासुरनररिद्धि जाइ सिद्धी || २६७।।
एवं सुणिऊण संजायसड्ढो गओ सोमिलो । भणिओ य माउलगेण -- “रे सोमिल ! गंधियावणाओ धूयपुडिय एगरूवगेण गहाय लहुं समागच्छ ।" गओ सो कयकज्जो पडिनियत्तो । उमिठ-मत्त करिवर- चमढणाभीओ पलाइऊण पविट्ठो अचिर- निव्वत्तिय मज्जण घणसारुम्मिस्स-मलयसार विलित्त-गत्त-पवर-पुप्फ-पूइय- जिण-पडिमालंकिय-गब्भहरजिणमंदिरं । दिट्ठा जिणपडिमा । निविडदंसण-मोहणिज्जकम्म- खओवसमेणं उल्लसिओ भावो - "एसो सो सुरासुरलोयपूजणिज्जो मणि भणिओ जिणो ।” छोडिया पुड़ी । पक्खित्तो धूय - दहणे धूओ । पवड्ढमाणसुहभावेण समुग्गाहिओ । बहल - धूमेण वासि गब्भहरं । ठिओ खणमेगं तत्थेव जिर्णाबिबपुरओ । मज्झिमगुणजोगओ निबद्धं भोगसारं मणुयाऊयं । गओ पुणो वि गंधियावणं । भणिओ गंधिओ - "अहं ते पेसणमेगं करिस्सामि । देहि मे एगरूवयस्स धूयं" दिण्णं तेण कथं मतो गओ । समप्पिया धूयपुडिया ।
अणम्मि दिणे बंभणो त्ति कलिय भुंजाविओ एगेण वणियसुएण पिउ-वारिसियकाराट्टयए घयपूरोहिं । समुप्पण्णा राईए विसूइया । मओ य तीए दोसेण । समुप्पण्णो इहेव जंबूद्दीवे वेयड्ढसिहरि दाहिण - सेढीए विज्जाहर-जणाइणे उत्तुंगमरगय-मणिमय- तोरणविराइयगोउर-दुवारदेसे निरुद्ध- नहंगणा भोग-पासाय- मालोवसोहिए कुलहरे व्व सयल-तियलोक्कलच्छीए विज्जुप्पहे नयरे विज्जुदेवस्स खेयराहिवस्स रयणमालाए भारियाए कुच्छिसि पुत्तत्ताए । जम्मादिणे य सयलविज्जा हर-जणचित्त- चमक्कार - कारयं कारियं पिउणा परमहरिसेण वद्धावणयं । वोलीणे बारसाहे महामहसवेण पइट्टावियं नामं विज्जुसेहो । कमेण पवड्ढमाणो जाओ अट्ठवारिसिओ । पसत्थवासरे समप्पिओ उवज्झायस्स । नियमई माहप्पेण अब्भा [स]-वय-गुणेण गहियाओ थोवकालेण वि सयलकलाओ नियकुलकमागयाओ दिण्णाओ पिउणा पण्णत्तपमुहाओ विज्जाओ । जहा विहिणा साहियाओ विज्जुसेहरेण । पत्तो जुवइजणमणहरं जोव्वणं ।
अणम्मि दिने समाणजोव्वण-गुण-वयंस-परिवारिओ पत्तो विज्जुसेहरो अणेय तरु-संड-मंडियं मयणनंदणं नाम उज्जाणं । विविकोलाहि कीलंतो जाव चिट्ठइ खणंतरं ताव दिट्ठा तेण पसरतपवर रयणदित्तिविच्छुरिय-नहयलाभोया, वाउद्धुय-धवल - धयवड रेहिरा, दाहिणदिसाओ उत्तराभिमही पयट्टा विज्जाहर - विमाण- रिछोली । तओ पुच्छिओ तेण दाहिणभुयासण्णो मेहरहो नाम नियवयंसओ -- “भद्द ! कहि एस पवरचलंत-पोमराय-कुंडलविलिहिज्ज माणगंडत्थलो, हरहास-धवलहारविराइय- वच्छ्यलो, वरनेवत्थाइविज्जाहरसुंदरीसहिओ चलिओ विज्जाहरलोओ ?" ईसि हसिऊण जंपियं मेहरहेण - " अहो ! ते वयंस ! सुहसागरोवगाढया, अहो ! ते निच्चितया जमेयं पि न याणसि सुपसिद्धमेव एयं वेयड्ढे वसंताण जं सिद्धाययणेसु जिणपडिमादंसणत्थं आगच्छंति देवासुरविज्जाहरा पसिद्धपयोयणे वि पुच्छा हासं जणेइ ।” विज्जुसेहरेण भणियं - "वयंस ! महाविच्छड्डेण गच्छंता दीसंति अओ पुच्छ ज्इ ।” तओ सविसेसं वितविकऊण जंपियं मेहरहेण - "हुं विष्णायं, पारद्वाओ सिद्धाययणेसु जत्ताओ ।" जओ-
पसरंत सुरहिमलयानिलेण नज्जइ जयम्मि ओइण्णो । पल्लवियसयल -वण- गहण मणहरो हे मित्त ! महुमासो । दाहिण-पवण-पकं पिय-विसाल-साहाहिं हरिसिया संती । महुमास-समागमणे नच्चंति व तरुवरा धणियं । २६९ । कुसुम-मयरंद-लंड-अलिउल- झंकार - मणहरसरेण । गायंति वतरुनियरा वसंतमासागमे तुट्ठा ॥२७०॥ कल कोइल-मुहलाओ महिलागण माण- गंठिदलणाउ । सियकुसुमेहिं हसंति च वणराईओ वसंतम्मि || २७१॥ अच्छउ ता फलकालो कुसुमारंभे त्रि कालिमा वयणे । इय कलिउ व पलासो चत्तो दूरेण पत्तेहि ॥ २७२ ॥
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |