Page Text
________________
मणोरमा-कहां
मारद्धो सूरिणा। दारएण भणियं--"जइ अवस्सकायव्वमेयं भवया तो णिसुणेसु एगमक्खाणयं ।" सूरिणा वि चितियं-- 'अमाणुसा अडवी । कहेउ अक्खाणयं । एयं पि सुयं भवउ । पच्छा नियसमीहियं साहिस्सामि' त्ति अणुण्णाओ कहिउमाढत्तो दारगो
पाडलिपुत्ते नयरे पसण्णपंको नाम कूलालो परिवसइ । अणुकुल-कम्मोदएण सफलारंभो अग्घइ तस्स भंडयं । संपज्जइ पउरदविणजायं, वियरइ दीणाण भिक्खा , देइ देवयाण पूयाबलि, पोसेइ नियनाइवग्गं । अण्णया गओ मट्टियाए खाणिमझे मट्टियं खणंतो पडिहायपडिया दोत्तडियए । नासंतो चेव चंपिओ । पढियं च तेणजेण भिक्खं बलि देमि जेण पोसेमि नायए । सा मे मही अइक्कमइ जायं मे सरणओ भयं ।।१६३।। मया वि सरत्थिणा सरणागयवच्छलो किल तुम सरणं । पडिवण्णो सरणाओ मज्झं वि मरणमुवट्ठियं ।। १६४।।
हरिणा भणियं--"अइपंडिओसि बालय !" गलं मोडिऊण मारिओ। पक्खित्तं पडिग्गहे आभरणं । हरिसियमाणसो पुरओ पत्थिओ । देवेण चितियं-'निरवेक्खो तावेसो पुढविकाए।' तओ दरिसिओ तारिसो चेव दारओ सो वि तहेव सूरिसरणमागओ। पुच्छिओ सूरिणा--"को तुम ?" तेण भणियं--"आउकाइयनामो दारओ । तक्कर-भयभीओ तुह सरणमल्लीणो।" सूरिणा वि मारिउमारद्धो । तेण भणियं-“जइ एवं तो निसुणेसु कहाणयमेगं ।" सूरिणा भणियं--"कहसु !" कहिउमाढतो दारगो
__ वाणारसीए नयरीए अणेगवुत्तंतसवणावधारण-बुद्धी रामायण-भारहाइचित्तकहाकहण-समावज्जिय-बहुजणमाणसो बहस्सुओ पाडलो नाम मालागारो परिवसइ । गंगापरतीरे तस्स मलयं । गंगं तरिऊण पइदिणं मलयाओ कुसुमाई आणेइ । अण्णम्मि दिणे पुप्फ-करंडएण समं चेव वुब्भंतो दिह्रो पाडलो तीरट्ठियजणेण । भणिओ व सोवहासं-- बहुस्सुयं चित्तकहं गंगा वहइ पाडलं । बुज्झमाणग ! भई ते लव ता किचि सुभासियं ।।१६५।। जेण' पाएमि हं मलयं जेण जीवंति करिसया ! तस्स मज्झे विवज्जामि जायं मे सरणओ भयं ।।१६६।।
"ता भयवं! जहा सो जलेण जीवंतो जलेण चेव मरणं पाविओ सरणं पि मरणकारणं तस्स जायं । एवं तमं पि मया जीवियत्थिणा सरणो'त्ति सरणं पवण्णो तुमाओ चेव जइमरणं वहइ तो कस्स साहेमि ?" सूरिणा वि "अइपंडिओसि बालय!' भणिऊण मारिओ। छठं पडिग्गहगे आभरणं । पत्थिओ परोहत्तं पह?माणसो । देवेण चितियं-'आउकाए वि निरवेक्खो ।' तओ विउविओ तारिसो चेव अण्णो दारओ । सो वि तहेव सूरिसरणमागओ । पुच्छिओ सूरिणा--"को तुमं ?" तेण भणियं--"तेऊकाइयाभिहाणो दारओ चोरभयसंभंतो तुह सरणमागओ ।" 'कल्लाणपरंपरा एस'त्ति मण्णंतेण वावाइउमाढतो सूरिणा । तेण भणियं--"जइ एवं तो णिसणेस एगं कहाणयं] ।" सूरिणा भणियं-- "भणसु ।" दारएण भणियं-- ..
जवसारो नाम गामो । जवबहुलो नाम तत्थ कोडुबिओ परिवसइ । दूरे तस्स खेत्तं । जवपाग-समाए कयं तेण खेत्ते चेव खलयं । तत्थेवं एगागी वसिउमारद्धो । अण्णया निसुओ तेण वग्धबोक्कार-रवो । भयभीय-चित्तेण पुच्छिया बीयदिणे वयवढ-पुरिसा । 'कहं वग्घाओ छुट्रिज्जइ?" तेहिं भणियं--"जलंतो जलणो समासण्णे धरिज्जइ ।" तं सुणिय गओ खेत्तं । वुत्थो तत्थेव एगागी । मुक्को उडवय-दुवारे जलणो । समागया निद्दा । वाउवसेण दुवाराओ चेव लग्गो उडवओ। नीहरिउमचयंतेण२मया वग्घस्स भीएण पावओ सरणं कओ। तेण मे उडवओ दड्ढो जायं मे सरणओ भयं ।।१६७।। १. रोहति बीयाणि २. जमहं दिया य राओ य तप्पेमि महसप्पिसा । तेण मे उडओ दड्ढो जायं सरणओ भयं ।। अथवा-वग्घस्स मए भीएणं पावगो सरणं कओ । तेण दड्ढे महं अंगं दड़ढं जायं मे सरणओ भयं ।।
उत्त. नि. १२७।१२८ ।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |