Page Text
________________
सम्मत्तलंभोणाम बीओ अवसरो तत्थ य उववूहाए जिनसेहरसेट्टि कहा
सावए, कयलक्खणे णं जिणसेहरे सावए, सुलद्धे णं जस्स जीवियफले जिणसेहरसावयस्स, जस्स णं निग्गंथे पावयणे अविचलाभत्ती, निच्चलं सम्मत्तं, मोत्तण परमपूयारिहे अरहते साह-साहम्मिए य न अण्णस्स पाणपरिच्चाए वि पणाम करेइ ।" एयं सुणिऊण एगो भवणवासी देवो विवरीय-दसणो असतो असुरिंद-वयणं तस्स परिक्खण-निमित्तं काऊण उत्तर-वेउव्वियंताए उक्किटाए चंडाए चवलाए दित्ताए देवगईए जेणेव सूतोसं नयरं तेणेव सिग्धं समागओ। जोगाणंदरूवं विउव्विऊण सरीरचिंताए विणिग्गयस्स जिणसेहरस्स दंसिओ अप्पा। जंपियं च सिणेहसारं जोगाणंदेण--“भो ! भद्द ! सुहजोगो तुमं कल्लाण-भायणं च लक्खीयसि । ता इओ अदूरदेस-संठियमुज्जाणं समागच्छ जेण अदरिदं करेमि भवंतं ।" गओ जिणसेहरो पविट्ठो उज्जाणमज्झट्ठिय-रत्तकणवीर-लया-परिवेढिए चंडियायणं । जोगाणंदेण पूइयं रत्तकणवीर-कुसुमेहिं चंडिया-चलणज्यलं । चलणेसु निवडिऊण जिणसेहरसमक्खं रसप्पओगेण पाडिया कणगकोडी । जोगाणंदेण भणिओ जिणसेहरो-"वच्छ ! वंदिऊण भयवई सव्वसिद्धि-परमकारणं । पणमिऊण पत्थयरिद्धि-निबंधणं मम चलण-जयलं । गिण्हस सुवण्णयं । जिणसेहर-सावएण वि उभय-वंदणं पि समत्त-कलंक-कारणं । इह लोग-सहनिबंधणं कणयं, सासय-सुह-परमहेऊ निक्कलंक-सम्मत्त-परिपालणं"त्ति चितिऊण भणिओ जोगानंदो--"भो पर निरय ! पच्चक्खायं मए जावज्जीवं परतित्थियदेवयाण परपासंडत्थाण य वंदण-पूयणाइ करणस्स ।" जोगाणदेण भणियं"न अण्णहा सुवण्णयं लब्भइ ।" जिणसेहरो वि 'सुवण्णेण वि न किंपि कज्ज जेणेवं पाविज्जइ'त्ति भणिऊण गओ सघरं । कहिओ वुत्तंतो जणयस्स। 'सोहणं कयंति पसंसिओ तेण वोलीणो वासरो। समागया रयणी। काऊण संझोचियमणुट्ठाणं पंच-परमेट्टि-सुमरणपुरस्सरं सुत्तो जिणसेहरो । अद्धरत्तच्छदुप्पेच्छ-विडंबियमुहं मुह-विणित-जलणजालाकरालदसणं मइरामय-मत्तंचलं इओ तओ घुम्मंतयं पच्चक्खमिव पेक्खइ मज्झिमवए वट्टमाणं एगं इत्थियं । असंभंत-चित्तण भणिया जिणसेहरेण--"भद्दे ! का तुमिं] ? किं निमित्तं वा पयडिय-वियराल-रूवा अवेलाए समागया ?" तीए भणियं"तुम्हाण कुल-देवया सुतारा नाम । अवमाणिया हं तुम्हेहिं न करेह वंदण-पूयणाइयं नेय सरह पव्वदियहेसु वि, सहियं मए एत्तियं कालं, संपई जइ न मह भत्ति करिस्सह तो धणमाणुसहाणि करिस्सामि' त्ति भणिऊण अदंसणं गया।
पभाया रयणी साहिओ सव्वो वि रयणिवइयरो जणणि-जणयाण । मणागमासंकिय-माणसेहिं भणियमणेहिं-- "पुत्त ! देवयाभिओगेण कीरउ इमीए वंदण-पूयणाइ ।" तेण भणियं—“अलमिमाए संकहाए । पाण-परिच्चारण वि नाहमेयं समायरिस्सामि ।" नाऊण निबंधं मोणमासिया जणणि-जणयाणि । तओवहिया चेव अवहडं सव्वं चउप्पयं चोरेहि, रितीकयं कणकोदारा, अवहरियं भूमि-गोवियं दविण-जायं, विवण्णाणि जलहिमझे जाणवत्ताणि, गहिया थलपह-पेसिया बलद्दाइ सत्था भिल्लेहिं, घरे वि समुवट्ठियं दारुणमसिवं, वियंभिओ दुस्सहो जर-वियारो, परिसडंति तेण माणुसाणि, उवरयं जिणसेहर-संतियं पुत्तजुवलं, दाहजराभिभूयाणि तुला समारूढाणि जणणि-जणयाणि । जिणसेहरो व सूलच्छिदाहवेयणाभिभूओ चिट्ठइ । समागच्छंति सुहिसयणा सामंतलोगा य पडियरणत्थं । भणंति य-'को एस वइयरो?' भणियं जिणसेहरेण--"पुव्वकयकम्मदोसो एस ।” एत्यंतरे पत्तोवयारेण जंपियं देवेण--"भो भो लोया ! कुलदेवयाहमिमाण मए इमं सव्वं पि कयं । जइ म पूइंति तो सव्वत्थ संती भवइ इमाण मंदिरे ।" लोएण भणि पओयणं । पूइऊण विसज्जिया कुलदेवया ।" तओ भणिया लोएहि जिणसेहरस्स अम्मा-पिय "जिणसेहरं मण्णावेह ।” गया सुहि-सयणा [त]यंतियं भणिओ बहुप्पयारं सो तेहिं न पडिवण्णमणेण । दूमियमणो गओ सव्वो वि लोगो । नाऊण निच्छयं उवसंहरियमसिवं देवेण । तहेव अवहरियं दालिदं । अणुकलीकओ राया । सद्दावेइ सिणेहसारं जिणसेहरं । करेड तेण सह संकहं । कयत्थं मण्णइ अप्पाणं तहसणेण । रंजिज्जइ तस्स बद्धिपगरिसेण ।
अण्णम्मि दिणे भणिओ सबहमाणं राइणा जिणसेहरो--"पत्थेमि किपि भवंतं जइ पत्थणाभंग न करेह ।" तेण भणियं--"जमुचियं तं करिस्सामो।" राइणा भणियं--"गिण्हसु मे मंतिपयं ।" तेण भणियं--"महाराय ! अणुचियमेयमम्हाण ।” राइणा भणियं--"मह वयणं कुणंतेण अणुचियं पि कायव्वं ।" तेण भणियं--"ताएण समं समालोचिऊण जं कायव्वं तं कहिस्सामि"त्ति भणिऊण गओ सभवणं जिणसेहरो । कहिओ अम्मा-पिईण रायवृत्तंतो । तेहिं भणियं-- "जं राया भणइ तं कीरइ ।" जिणसेहरेण भणियं--"पडिवण्णाहिगारेहिं पणामो कायव्वो नरवइस्स । मए पुण एवं न
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |