Page Text
________________
सम्मत्त-लंभो णाम बीओ अवसरो तत्थ य दुगु'छाए सुहंकताकहा
वज्जिय सुहकम्मोदएण अंतरियमिमीए सेसं अंतेउरं वसीकओ राया । कया पट्ट-महादेवी । पइट्टावियं 'तिहुयणतिलय' त्ति नामं । सेणिएण सह सिणेहसारं विसयसुहमणुहवंतीए वच्चइ कालो ।
अण्णया रज्जकज्ज-समत्तीए अंतेउरमुवागएण पारद्धो वोज्झणकीलारसो । तत्थ जो हारइ सो आसो व्व पट्ठीए समारुहिऊण वाहिज्जइ । एवं किलंताण जया सेसअंतेउरिया जिणंति तया वत्थंचलेण कंधरा बंधिऊण पिटीए करं काऊण वाहिति । जया पुण राया जिणइ तया पिट्ठीए समारुहइ ।
अण्णया कोलंतेण हारियं राइणा जियं तिहुयणतिलयाए । काऊण कच्छाबंधं विगयसंका समारूढा पुहवीपालपिछीए तुरंगमो व्व तरियगईए वाहिऊण मक्को । ईसि हसिऊण जंपियं राइणा समरियजिणवयणेण--"अहो विचित्ता कम्मपरिणई ।" तिहुयणतिलयाए तीए जायसंकाए भणियं--"अज्जउत्त ! किमयं हसिज्जइ कि वा कम्म-परिणई सुमरिया ?" रण्णा भणियं--“पिए ! अलं वियारेण ?" तीए भणियं--"सव्वहा साहेयव्वं न अन्नहा मे मणनिव्वुई ।" नाऊण निब्बंधं कहियं राइणा--"दुग्गंध-ांध-दूसिया जायमेत्ता चेव तुमं केण वि उज्झिया । अविनाय जाइ-कुल-सीला मए परिणीया । पत्ता महादेविपयं, परिणीया मए उण्णय-रायकुलवंस-संभवाओ अणेगाओ कण्णगाओ न ताओ एवंविहमासंघयं कुणंति । तए पुण एव महं वाहिओ । एयं मे हास-कारणं । कम्म-परिणई परिभावणं च तं सुणिय समुप्पण्णजाई-सरणाए जंपियं तिहुयण-तिलयाए--"अज्जउत्त! जाईसरणेण पुन्व-भव-वइयरं नाऊण निविण्णं मे संसारवासाओ माणसं । विसज्जेसु मं जेण समणस्स भगवओ महावीरस्स अंतिए पव्वयामि । अणमण्णिया राइणा । पसत्थवासरे महया निक्खमण-महसवेण हत्थि-खंधमारोविऊण सपरिवारो चेव गओ सेणीओ महावीरसमीवे । विहिणा वंदिऊण तित्थयरं दिण्णा सिस्सिणि-भिक्खा । पडिच्छिया भगवया गंतूण ईसाणकोणे विमुक्कवत्थाहरणा परिगहियसंजइनेवत्था समागया तित्थयरसमीवे । पव्वाविया सहत्थेण भगवया । समप्पिया अज्जचंदणाए । गहणासेवणसिक्खापुरस्सरं पढियाणि एक्कारसंगाणि । परिपालिऊण निक्कलंक सामण्णं खविऊण घणघाइ-कम्माणि, उप्पाडिऊण लोयालोय-पयासं केवलनाणं काऊण जोग-निरोहेण सेलेसिं सिद्धिवसहिमुवगया । एवं दारुण-विवागा वि दुगुंछा न कायव्वा धम्मत्थिणा ।।। संपयं अमूढदिट्टिम्मि [अरिहचंदसावय]उदाहरणं--
अत्थि इहेव भारहेवासे पुहइमहिला-भाल-यल-तिलय-तुल्लं हत्थिणाउरं नाम नयरं । अरिहचंदो नाम सावओ तत्थ परिवसइ । अहिगयजीवाजीवो उवलद्धपुण्ण-पावो निग्गंथे पावयणे गहियट्ठो विणिच्छियट्ठो अट्ठि-मिंजपेमाणुरागरत्तो परपासंड-परमाइसयपूयासक्कारदसणे वि अमूढदिट्टी । समणे निग्गंथे फासुएणं एसणिज्जेणं असण-पाण-खाइम-साइमेणं वत्थ-पडिग्गहकंबलरओहरणेणं पीढफलग-सेज्जा-संथार-ओसह-भेसज्जेणं पडिलाभमाणे कालं गमेइ । तस्स आजम्माओ दालिकंदली-कंद-कप्पो नियपोट-भरणे वि असमत्थो विवण्ण-जणणि-जणओ सिरिहरो नाम बंभणसूओ वत्ताणत्तयं करेइ । सो अण्णया सीयंत-परियणब्भत्थणा कयत्थिज्जंतो चेव निग्गओ घराओ । गओ दक्खिणावहं तत्थ वि तस्स न किंपि संपज्जइ । जओ-- दूरं वच्चइ पुरिसो एत्थ गओ निव्वुई लहिस्सामि । तत्थ वि पुव्व कयाई पुव्वगयाइं पडिक्खंति ॥१३१॥ जत्थ गया तत्थ गया पुरिसा दारिद्द-भायणं होंति । जेहिं न भयवं धम्मो तिहुयणचितामणी चिण्णो ॥१३२॥
अण्णया गओ समुद्दोवकंठसंठिय-थाणेसरं नाम पट्टणं । तत्थ परिब्भमंतो मिलिओ हरहंस-परिवायगस्स। नीओ तेण नियमढं। पुच्छिओ य--"को तुमं? कत्तो वा समागओ ? कहि वा गंतव्वं ?" 'साहिओ तेण सव्वो वि अप्पणो वइयरो। गंतव्वं पुण जत्थेव उयरपूरणं भवइ । तेण भणियं--"जइ एवं तो मह समीवे चे[व] चिट्ठसु जेण माणुसं करेमि।" ठिओ सो तत्थेव आराहिओ परमविणयकरणेणं हरहंसो समागयचित्तण जंपियं तेण--"अहो पत्तभूओ तुम गिण्हसु इमं परिव्वायग-वयं जेण ते विज्जा-मंत-पयाणि पयच्छामि।" पडिवण्णं सिरिहरेण । दिक्खिओ पसत्थ-वासरे। समाराहिओ विसेसेण हरहंसो । कइवयवरिसावसाणे संकामियाणि तेण तस्स विज्जा-मंत-पयाणि । परियडइ कणय
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |