Page Text
________________
१४०
मणोरमा-कहाँ समारूढो जाणवत्तो। उक्खित्ता नंगरा। पूरिओ सियवडो। गंतुं पयत्तं जाणवत्तं । कइवयदिणेहिं गच्छंताण समुद्दमज्झे संजायं मेह-दुद्दिणं । मत्तो समुद्दो। वियंभिओ पडिकूलो पवणो । सुमरणसेसो संजाओ सियवडो । अवसीभूयं जाणवत्तं चिरं भमिऊण तत्थेव महत्तावत्ते विणट्ठ । पणट्ठो सपरियणो सायरदत्त-सेट्ठी ।
इओ य पसूया असोगसिरी । जाओ दारओ । कयं वद्धावणयं । अवयरिऊण एगम्मि पत्ते जंपियं समुद्दाहिवेण-मए एस दिण्णो । अओ नत्थि ममाओ इमस्स मरणं, वोत्तूण कयपूओ सट्ठाणं गओ । पइट्ठावियं मासावसाणे समुद्दपूयापुरस्सरं समुद्ददत्तो त्ति नामं। वच्चंति दिणाणि ।।
अण्णया समागया सेट्ठी-मरण-पउत्ती। चिरं सोइऊण कइवयदिणावसाणे असोगा जाया असोगसिरी । वडिढउं पयत्तो समुद्ददत्तो। दूसल-दुम्मुहा वि न कुणंति गोरखं, न दंसिति राउले, न पयडंति घरसिरि, मग्गिया विति-भागं घरसारस्स 'नत्थि' त्ति पयंपंति । एवं तेहिं परिभूयस्स वच्चइ कालो समुद्ददत्तस्स ।।
इओ य सा रंभावली चइऊण ताओ देवलोगाओ इमाए चेव जयमंडणाए नयरीए नरदत्तसेट्ठिणो नरकताए भारियाए कुच्छिसि दारियत्ताए समुप्पण्णा। उचियसमएण पट्टावियं नामं तारावली। वल्लहा जणणि-जणयाणं । गहिया इत्थीजण-जोगं कला-कलावं । अण्णया सहियणसहिया विचित्त-कीलाहिं कीलमाणी गया एगं सरोवरं । दिट्ठो तत्थ जलमज्जणं काउमत्तिण्णो समुदत्तो। तारावलीए निरूविओ सुइरं अणिमिसाए दिट्ठीए। वढिया पुवभवाणुराय-सलिले सिणेह-कंदली। समुद्ददत्तो तं पइ संजाय-सिणेहो वलियकंधरं पुणो पुणो तम्मुहमवलोइंतो गओ सट्टाणं । गए वि समुददत्ते तयभिमुहं निरूवयंती चित्तलिहिय व्व टिया तारावली । भणिया चित्तन्नुयाभिहाणाए दासचेडीए--"सामिणि ! संवरेहि उभयंसुविसंठुलं विलुलिति सकेस-कबरि । सट्ठाणमाणेसु ठाण-भट्ठमुत्तरिज्जयं । संठवेसु ईसिल्हसियं कडिल्लयं । मुंचसु किलीवत्तणं । अंगीकरेसु धीरत्तणं। गम्मउ संपयं सभवणं पच्छा वि जं लहियब्वं तमवस्सं पाविस्सइ सामिणी।" एयमायपिणऊण लज्जोणयमुही सघर गया तारावली। निवारिया तीए चित्तन्नुया-"हला ! न तए एस वइयरो जणणि-जणयाण परओ पयासियव्वो।" पडिवण्णमिमीए ।
अण्णया समागओ सिरिउर-नयराओ नरसुंदरो नाम सेट्ठी। पविट्ठो नरदत्तसेट्ठि-मंदिरे । मग्गिया तेण नियसुयसारस्स निमित्तं तारावली। पडिवण्णा नरदत्तण । एत्थंतरे भणिया चित्तण्णुया तारावलीए-"हला ! गंतण साहेसु अंबाए न मम विवाहेण पओयणं ।” “जं सामिणी समाइसई" भणिऊण गया चित्तण्णया। कहिओ तारावलीसंदेसओ। तीए वि गंतूण भिण्णरहस्सो कओ सेट्ठी न दिन्ना सेट्रिणा । पायपडण-समागया भणिया सेट्रिणा तारावली-“वच्छे ! कि निमित्तं तए विवाहविग्घो कओ । सा वि अदिण्ण-पडिवयणा लज्जोणयमहा स-दुक्खं रोविउं पबत्ता। विसज्जिया सेट्रिणा । गया सट्टाणं । दुक्खकारणमविदमाणा समाउला जणणि-जणया। पुच्छिया चित्तन्न्या जणणीए-"हला! तुम छाय व्व सया सन्निहिया, वच्छाए । जाणेसि किपि दुक्खकारणं ?" तीए भणियं-"आम", सेट्टिणीए भणियं-"केरिसं?" तीए भणियं-“सागरदत्तसेट्ठिसुय-समुद्ददत्तदंसणं ।” तं सुणिय समुप्पण्णकोवानलाए भणिओ सेट्ठी सेट्ठिणीए-“सच्छंदा ते सुया विभिण्णमज्जाया ।" कहिओ सब्बो वि वइयरो। कूविओ सेटठी । सहाविआ तत्थेव तारावली । निब्भच्छिया खरफरुसवयहि । कयमरण-ववसाया लहिऊण अंतरं निग्गया रयणीए । समद्ददत्तो वि तविरह-दुक्खिओ कत्थवि रइमलहतो एगागी चेव रयणीए चलिओ तं पइ सरोवरं जत्थ सा दिवा अंतरा बड-पायव-हेदुओ । निरूविया सदुक्खं रुयमाणी तारावली। पुच्छिया उवसप्पिऊण "सुंदरि ! का तुमं? कि निमित्तं वा सदुक्खं स्यसि ? कहेसु जइ कहणीयं ।" तारावलीए भणियं-"नरदत्तसेट्टिदुहिया तारावली नाम कण्णगा। रोझ्यव्वे पुण इमं कारणं । अण्णत्थ बद्धाणुराया अन्नत्थ जणणि-जणएहि दिज्जामि । तुम पि साहेसु नियवइयरं को तुमं? कि निमित्तं वा एगागी रयणीए इहागओ?" साहिओ सव्वो सवित्थरो नियवइयरो । भणियं च णाए अणकलो विही जेण तए सह दंसणं संपाडि वि भविस्सइ संपयं मणनिव्वुई । जाव विविहालावेण खणमेत्तं चिट्ठति ताव गया पयाणुसारेण नरदत्तसेट्ठी-गवेसगा। सोऊण पय-संचारं दूरीकओ समुद्ददत्तो । नीया तेहि तारावली । समप्पिया सेट्ठिणो। संतूसिया तेण कोमल-बयणेण । भगिया य-“वच्छे ! न तए विसाओ कायव्वो। जं ते अभिरुइयं तमहं करेस्सामि चिट्रसु तुमं समाहाणेण।" एयं सोऊण महरिसा जाया तारावली ।
For Private & Personal Use Only
www.jainelibrary.org
Jain Education International 2010_04
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |