Page Text
________________
१२०
मणोरमा-कहा
पडिलाहिया साहुणो फासुय-एसणियवत्थ-पत्त-असण-पाण-खाइम-साइमाइणा । दंसेइ धणदेवादओ नरसीहकुमारस्स पदिण्णंजिणपूयाइयं । गच्छंति तेहि समं सूरिसमीवे । कुणंति धम्मदेसणं आरिया वण्णंति देव-गुरु-धम्मतत्त-सवणपुरस्सरं साहु सावयगुणे। एवं कुणंताण ताण वोलीणा अट्ठ वासरा ।
तओ नरसोहकुमारसमक्खं काऊण परमवित्थरेण सयल-संघ-पूयं निक्खंता अमियतेयसूरिसमीवे धणदेवादओ। जाया परा समणा । परिपालियविसुद्धचरणा, उप्पाडियवरकेवलनाणदंसणा, पडिवज्जियसेलेसि निवियासेसकम्मंसा सिद्धिवसहिमुवगया। नरसाहकुमारो वि हरिसियमाणसो चितिउमारद्धोपुन्वापराविरुद्धो सुद्धो तव-च्छेय-कस-पयारेहि । निरुवम-दम-कलिओ जिणधम्मो सुंदरो एसो ॥७५६।। गयराग-दोस-मोहो, परमप्पा परमरूवसंपण्णो । परहियकरणेक्करओ पसंत-मुत्ती जिणो भयवं ।।७५७। सावज्ज-जोग-विरया निस्संगा निम्ममा निरारंभा। परतत्ति-विप्पमुक्का सेयंबर-साहुणो धण्णा ।।७५८ ।। विहि-विहिय-देव-जत्ता गुरुयण-भत्ता विसाल-वरचित्ता । उचियपवित्ति-पहाणा विवेगिणो सावजणा वि ।। देव-गुरु-धम्म-तत्तेहिं संगओ सोहणो इमो धम्मो। सीहकुमारेणेवं पसंसयंतेण अणवरय ॥७६०।। लद्धं अलद्ध-पुव्वं चिंतामणिकाम-धेणु-माहप्पं । सयल-कुसलेक्कमूलं जिणधम्मो बोहिबीयं तु ।।७६१।।
जिणजत्ताइदंसणेण पसंसणेण पुणो-पुणो पोसयंतो कालं गमेइ।
अण्णम्मि दिणे अत्थाणमंडवे सीहासणनिसण्णो विण्णत्तो पडिहारेण राया-“देव ! चंडसेणसमोवाओ समागओ देवदंससुओ दूओ दुवारे चिट्ठइ।” राइणा भणियं-"लहुं पवेसेहि ।" पविट्ठो काऊण पणामं निसण्णो दंसियासणे । नरवइ-समणुण्णाओ जंपिउमारद्धो-“देव ! साहियं मए गंतूण सव्वत्थआपडिहयं तुम्ह सासणं चंडसेणस्स। विसमबलगविएण न पडिवणं तेण ।" तं सुणियसमुप्पण्णकोवानलेण रण-रस-फुरफुरायमाणदाहिण-भुयदंडेण समाइट्ठो बलवाउओ नरिदेण-"अरे! पऊणी करेहि चउरंग पि बलं ।"अप्पणा वि निग्गंतूण ठिओ बाहिरुज्जाणे परिवारिओ समागंतूण सयल-बलेण। पायवडणागएण विण्णत्तो सीहकुमारण-"ताय ! को तम्मि समारंभो? न य बलकालिए वि जंबुए केसरी-कम सज्जेह। देह ममात्ति जेण कइवयदिण-मज्ञ बंधिऊण तं ताय-चलणेस पाडेमि ।” राइणा भणियं-“पुत्त ! बालो तुमं । अदिट्ठ-समर-संरंभो य मायावी विसमबलगविओ य चंडसेणो ।" कुमारेण भणियं-"समर-संरभदंसणे वि एस चेव उवाओ। किच तुम्ह पायाणभावेण सव्वं सोहणं भविस्सइ।" नाऊण निच्छयं अणमन्नियं राइणा। पहाणबल-सहिओ पत्तो तन्विसय-संधि कुमारो। पेसिओ दूओ। भणिओ तेण चंडसेणो--"सयल नरिंद-विंद-वंदिय-पय-कमलस्स नरकेसरि-महारायस् सेवं वा पडिवज्जसु, देसं वा मुंचसु, जुज्झसज्जो वा भवसु !"
तओ सोवहासं जंपियं चंडसेणेण-"अरे ! को एस नरकेसरी?" दूएण तओ भणियं-"कमलवणस्स व न सोहणं तुज्झ संपुण्ण-मंडलं नरकेसरि-चंदं हसंतस्स । विहिय-विविहोवयारं पहुं पि पहसंति केइ कुकुलीणा । पम्हसिया सामि सुकयाण अहव किल केत्तयं एयं ।७६२ जओजस्सेव पभावुम्मिलियाइं तं चेव हय कयग्घाई। कुमुयाइं अप्पसंभावियाई चंदं उवहसंति ।।७६३।। अप्प-परस्स विसेसं अयाणमाणस्स कुद्धदेवस्स । फरुसाभिभासिणो ननु नट्ठा बुद्धी धुवं तुज्झ ।।७६४।। सोऊण दूय-वयणं कोवानल-मिसिमिसित-वयणेण । अवलोइऊण खग्गं. पयंपियं चंडसेणेण ।।७६५।। बुद्धीबल अप्पबला वयंति कि सत्त-जुत्तस्स करेइ बुद्धी। किं ते कहं नेस सुया कयाइ वसुंधरेयं जह वीर-भोज्जा । गयघड-विहडण-निवडिय-पोरुसो हरिण-पोअगेण समं । हरिणाहिवो न जुज्झइ तस्स वि य पलायणं जुत्तं ।।
_Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |