Page Text
________________
सम्मत्त-बीय-लंभो णाम पढमो अवसरो तत्थ य भावणाधम्मे चंदणसेट्ठिकहा
मा पडिबंधं करेहि केवलं काऊण जोगसद्धि विहेहि निम्मलमत्ताणयं । पच्छा निसल्लो संतो पव्वयाहि।" तेण भणियं-- "भयवं ! कुकम्मकारी अहयं अओ पउट्ठो मह एत्थ राया ता अन्नत्थ गंतूण पव्वयामो।" केवलिणा भणियं-"भट्ट ! न भाइयव्वं । पभाए समागए नरनाहे समागंतव्वं जेण सव्वं सोहणं हवइ ।" ‘एवं होउत्ति, भणिऊण गओ सट्राण साहसमल्लो । पभाए पूणोवि बंदण-बडियाए समागओ राया नयरजणवओ य । सो वि य तेणो आगंतुण निसण्णो केवलिसमासण्णो। पारद्धा देसणा भयवया । छिण्णा अणेग-जणाण तीयाणागय-वट्टमाणकाल-भाविणो संसया। पुच्छिओ केवली राइणा-“भयवं ! को सो तक्करो? कत्थ वा संपयं चिट्ठइ ? जेण परिमुसिया स-पासंडा मह नयरी ।" केवलिणा भणियं-“साहसमल्लाभिहाणो संपयं एत्थेव चिटुइ मम वामभागे निसण्णो । परं न तं पइ पओसो कायव्यो । जओ पडिनियत्तं कुकम्मकरणाओ एयस्स माणसं । संजाओ कम्मसेल-वज्जासणिकप्पो चारित्त-परिणामो । ता महाराय ! मोक्खमग्ग-पवण्णस्स इमस्स सहायगत्तणं कायव्वं ।" राइणा भणियं-"जं समाइसाइ भयवं तं करेमि।"
तओ गओ राइणा समं नियघरं साहतमल्लो । समाप्पियं जहानायं धणं सामियाणं, सेसं नरवइणो । कया निक्खमणमहिमा नरिदेण । पब्बइओ केवलि-समीवे समं जणणीए साहसमल्लो । गहिऊण पढमदिणे चेव गुरु-समवेतवाभिग्गहो---"आजम्मं मए मासाओ पारेयव्वं'। उक्वहिओ गुरुणा पसंसिओ नरवईणा सेसलोएहिं य। गहिया दुविह सिक्खा। जाओ पंचसमिओ तिगुत्तो मुणिवरो। तओ तस्स एगमासाइछम्मासंतं तवं तवंतस्स वोलाणा अणेगे वासा । खवियप्पायं जायं दुग्गइ-निबंधणं पावकम्म। समल्लसिओ सुहो परिणामो । निद्दड्ढ-घाइकम्मिधणस्स उप्पणं केवलवर नाणं। विहरिऊण केवलि-परिवाएण किपि कालं, काऊण जोग-निरोहं समारुहिऊण सेलेसोकरणं, असंस-कम्म-दिप्प. मुक्को निव्वाणं संपत्तो। तित्थयरो चउनाणी सुरमहिओ सिज्झियव्वय-धुयम्मि । अणिगूहिय-बल-विरिओ तवोवहाणम्मि उज्जमइ ।। किं पुण अवसेसेहि दुक्खक्खय-कारणा सुविहिएहि । होइ न उज्जमियव्वं सपच्चवायम्मि कयलोए' ॥६८४॥ भूरिभव-संचियाणं दुच्चिण्णाणं विवाग-विरसाणं । तवसा जायइ खवणं कम्माण निकाइयाणंपि ।।६८५।। काऊण तवं घोरं दढप्पहाराइपाणिणोणेगे । होऊण कूर-कम्मा सुच्चंति जिणागमे सिद्धा ॥६८६।। तम्हा जह सत्तीए अणसणमाइम्मि काउसग्गंते । बारस-भए भव्वा तवोवहाणम्मि उज्जमह ॥६८७।। संपयं भावणाधम्मोवरि चंदणसेट्ठिकहा भण्णइ--
___ अत्थि इहेव भारहे वासे बहुं दिवसवण्णणिज्जा चंदउरी नाम नयरी । तत्थ अधरिय-धणवइ-विहवो, दसदिसि. पसरत-सरय-ससि-सरिस-कित्ति-पब्भार-भरिय-भुवणयलो, पूरियाऽसेस-अस्थि-सत्थमणोरहो जिणदत्तो नाम सेट्ठी परिवसइ अभग्ग-सोहग्ग-गुण-निज्जिय-संकर-वल्लहा जिणमई नाम तस्स भारिया । ताण जम्मतरोवज्जिय-पुण्णतरु-कुसुम-समं विसय सुहमणुहवंताण पवर-फलभूओ संजाओ कुल-नंदणो । उचियसमए कयं से नाम चंदणो त्ति। पत्तो कुमारभावं। सम. प्पिओ लेहारियस्स । कयं कलागहणं । 'जाओ भोगसमत्थो । परिणीया तत्थेव वत्थव्वगस्स पियंकर-सेट्टिणो दुहिय सुहंकरा नाम । तीए सह विसय-सुहमणुहवंतस्स अइक्कतो कालो।
____ अण्णया जिणभवणगयस्स वण्णिओ सब्भूयगुणो जिणिदस्स गायणेणं रंजिओ चंदणो। दिण्णो दोणारलक्ख पसंसिओ सयललोएण। धण्णो सलाहणिज्जो सुलद्धजम्मो जयम्मि सुपसिद्धो । जिणदत्तो सेट्टिपुत्तो ठाणे चाओ कओ जेण ॥६८८।। विलसंति दिति भुंजंति बहुविहं एत्थ विहविणो णेगे। विरलाण पुणो दाणं सुट्ठाणे दीसइ भुवणे ॥६८९।। १. 'माणुस्से ?' पंचवस्तक गा. ८४२ ।
Jain Education International 2010_04
For Private & Personal Use Only
www.jainelibrary.org
| SR No. | 002596 |
| Book Title | Manorama Kaha |
| Original Sutra Author | Vardhmansuri |
| Author | Rupendrakumar Pagariya |
| Publisher | L D Indology Ahmedabad |
| Publication Year | 1983 |
| Total Pages | 402 |
| Language | Sanskrit |
| Classification | Book_Devnagari & Literature |
| File Size | 11 MB |